Thaburi 89

Ngũtũũra nyinaga igũrũ rĩgiĩ ũrĩa Yahweh onanagia ũtugi wake tene na tene. Nĩ ngũmenyithania na kanua gakwa wĩhokeku waku kũrĩ njiarũa ciothe.

Tondũ njugĩte ũũ: “Ũtugi ũgũtũũra wakĩtwo tene na tene, Na nĩ ũhandĩte na ũkarũmia wĩhokeku waku kũu igũrũ.”

“Nĩ thondekete kĩrĩkanĩro hamwe na mũndũ ũrĩa niĩ thuurĩte; Nĩ ndĩhĩtĩte harĩ Daudi ndungata yakwa:

‘Nĩ ngaatũma mbeũ yaku ĩĩhande wega tene na tene, Na nĩ ngaaka gĩtĩ gĩaku kĩa ũnene njiarũa-inĩ ciothe.’” (Sela)

Igũrũ nĩ rĩgathagĩrĩria magegania maku, wee Yahweh, Rĩkaraha wĩhokeku waku thĩinĩ wa kĩũngano kĩa arĩa amũre.

Tondũ rĩrĩ, nũũ kũu matu-inĩ ũngĩringithanio na Yahweh? Nũũ gatagatĩ-inĩ ka ariũ a ihoti ũhaana ta Yahweh?

El nĩ wa gwĩtigĩrũo kĩgomano-inĩ kĩa arĩa amũre; Nĩ mũnene na wa gwĩtigĩrũo harĩ arĩa othe mamũthiũrũrũkĩirie.

Yahweh Kĩhoti mũnene wa ita, Nũũ ũrĩ hinya tawe, wee Yahu? Wĩhokeku waku nĩ ũtũire ũkũrigicĩirie.

Nĩ wathaga iria hĩndĩ ĩrĩa rĩrahũyũka; Rĩrĩa makũmbĩ ma rĩo mambatĩra, nĩ ũmahooragĩria.

Nĩ ũhehenjete Rahabu ĩkahaana o ta mũndũ ũũragĩtwo. Nĩ ũhurunjĩte thũ ciaku ũkĩhũthĩra guoko gwaku kũrĩ hinya.

Igũrũ nĩ rĩaku, o na thĩ nĩ yaku; Bũrũri ũrĩa ũrĩ maciaro na indo iria ciyũrĩte thĩinĩ waguo—wee nĩwe watũmire ciĩhande wega.

Wee nĩwe wombire mwena wa rũgongo na wa mũhuro; Taboru na Herimoni nĩ igoocaga rĩĩtwa rĩaku ikenete.

Guoko gwaku nĩ kũrĩ ũhoti; Guoko gwaku nĩ kũrĩ hinya; Guoko gwaku kwa ũrĩo nĩ gũtũũgĩru.

Ũthingu na kĩhooto nĩcio mũthingi wa gĩtĩ gĩaku kĩa ũnene; ũtugi na ũhoro ũrĩa wa ma irũgamaga mbere yaku.

Kũrathimwo nĩ andũ arĩa moĩ mũgambo wa rũgooco. Ĩĩni Yahweh, acio mageragĩra ũtheri-inĩ wa ũthiũ waku.

Nĩ makenaga nĩ ũndũ wa rĩĩtwa rĩaku mũthenya wothe, Na magatũũgĩrio nĩ ũndũ wa ũthingu waku.

Tondũ wee nĩwe riri wa hinya wao, Na nĩ ũndũ wa gwĩtĩkĩrĩka nĩwe, hinya witũ nĩ ũtũũgagĩrio.

Nĩ gũkorũo ngo itũ nĩ Yahweh, Na nowe mũthamaki witũ ũrĩa mwamũre wa Isiraeli.

Hĩndĩ ĩyo nĩ warĩirie arĩa aku ehokeku kĩoneki-inĩ ũkiuga atĩrĩ: “Nĩ heete mũndũ ũrĩ ũhoti hinya; Nĩ ndũũgĩrĩtie mũndũ ũrĩa ũthuurĩtwo kuuma harĩ andũ.

Nĩ nyonete Daudi ndungata yakwa; Nĩ ndĩmũitĩrĩirie maguta makwa marĩa mamũre.

Guoko gwakwa nĩ kũrĩmũtiiragĩrĩra, Na guoko gwakwa gũkamwĩkĩra hinya.

Gũtirĩ thũ ĩrĩmwĩtagia marĩhi, Na gũtirĩ mũndũ ũtarĩ mũthingu ũrĩmũhinyagĩrĩria.

Nĩ ngũhehenja thũ ciake tũcunjĩ tũcunjĩ ciehere mbere yake Na njũrage arĩa mamũthũire.

Wĩhokeku wakwa ona ũtugi wakwa irĩ hamwe nake, Na hinya wake nĩ ũgũtũũgĩrio nĩ ũndũ wa rĩĩtwa rĩakwa.

Nĩ ngũiga guoko gwake igũrũ rĩa iria Na guoko gwake kwa ũrĩo ndĩkũige igũrũ rĩa njũũĩ.

Nĩ arĩngayagĩra akoiga atĩrĩ: ‘Wee nĩwe awa, El wakwa na Rwaro rwa Ihiga rwa ũhonokio wakwa.’

Na nĩ ngũmũtua irigithathi, Atuĩke mũnene makĩria harĩ athamaki a thĩ.

Ngũtũũra ndĩmuonetie ũtugi wakwa tene na tene, Na kĩrĩkanĩro gĩakwa hamwe nake gũtirĩ hĩndĩ gĩtakahinga.

Mbeũ yake ngũtũma ĩtũũre ĩĩhandĩte tene na tene Na ndũme gĩtĩ gĩake kĩa ũnene gĩtũũre o ta igũrũ.

Ariũ ake mangĩgatigana na watho wakwa Na mage gũthiĩ kũringana na matuĩro makwa,

Mangĩkagarara mawatho makwa Na mage kũrũmia maathani makwa-rĩ,

Nĩ ngaaherithia kwaga gwathĩka kwao na rũthanju Na herithie mahĩtia mao na iboko.

No gũtirĩ hĩndĩ ngaatiga kũmuonia ũtugi wakwa kũna, Kana njage kũhingia kĩĩranĩro gĩakwa.

Ndikagarara kĩrĩkanĩro gĩakwa Kana ngarũrĩre ũndũ ũrĩa mĩromo yakwa yugĩte.

Nĩ ũndũ wa ũtheru wakwa-rĩ, nĩ ndĩĩhĩtĩte riita rĩmwe rĩa kũigana; Ndirĩ hĩndĩ ngera Daudi ũhoro wa maheeni.

Mbeũ yake ĩgũtũũra tene na tene; Gĩtĩ gĩake kĩa ũnene gĩtũũre mbere yakwa o ta riũa.

Gĩgũtũũra kĩĩhandĩte wega tene na tene o ta mweri, O ta mũira mwĩhokeku kũrĩa matu-inĩ.” (Sela)

Ĩndĩ wee nĩ ũmũtiganĩirie na ũkamũrega; Nĩ ũrakarĩte mũno nĩ ũndũ wa ũcio waku mũitĩrĩrie maguta.

Nĩ ũtiganĩirie kĩrĩkanĩro kĩrĩa warĩkanĩire na ndungata yaku; Nĩ ũthahĩtie thũmbĩ yake na njĩra ya kũmĩikia thĩ tĩri-inĩ.

Nĩ ũmomorete thingo ciake ciothe cia mahiga; Mĩĩgitio yake ũtũmĩte ĩtuĩke mwanangĩko.

Ehĩtũkĩri othe nĩ mamũtunyaga indo ciake; We nĩ kĩndũ gĩa kũnyũrũrio harĩ andũ arĩa mariganĩtie nake.

Nĩ ũtũmĩte thũ ciake ihootane; Ũtũmĩte thũ ciake ciothe ikene.

Ningĩ nĩ ũhũndũrĩte rũhiũ rwake rwa njora, Na ũgatũma ahootwo mbaara-inĩ.

Nĩ ũtũmĩte riri wake ũkinye mũthia Na ũkagũithia gĩtĩ gĩake kĩa ũnene thĩ tĩri-inĩ.

Nĩ ũkuhĩhĩtie matukũ ma ũnyinyi wake, Na ũkamũhumba gĩconoko. (Sela)

Atĩrĩrĩ Yahweh, ũgũtũũra wĩhithĩte nginya rĩ? Hihi nĩ nginya tene na tene? Marakara maku-rĩ, hihi megũthiĩ o na mbere gwakana ta mwaki?

Ririkana ũrĩa ũtũũro wakwa ũrĩ mũkuhĩ! Hihi wombire andũ othe hatarĩ na muoroto o wothe?

Nĩ mũndũ ũrĩkũ ũngĩtũũra muoyo na age kuona gĩkuũ? Hihi no ahote kwĩhonokia kuuma harĩ hinya wa Mbĩrĩra? (Sela)

Ciĩko ciaku cia tene cia maũndũ mega ma ũtugi-rĩ, irĩ kũ, wee Yahweh, Iria wehĩtĩire Daudi nĩ ũndũ wa ũhoro waku wa ma?

Wũũi Yahweh, ririkana inyũrũri iria cierekagĩrio ndungata ciaku; Ũrĩa bataraga gũkirĩrĩria inyũrũri cia ikundi ciothe cia andũ;

Ũririkane inyũrũri cia thũ ciaku, wee Yahweh; Ũrĩa inyũrũrĩtie ikinya o rĩothe rĩa ũrĩa waku mũitĩrĩrie maguta.

Yahweh arotũũra arĩ mũrathime tene na tene. Amein na Amein.