Thaburi 90

Yahweh, ũkoretwo ũrĩ gĩikaro gitũ njiarũa-inĩ ciothe.

Mbere ya irĩma gũciarũo Kana rĩrĩa watũmire kũgĩe thĩ na bũrũri ũrĩa ũrĩ maciaro, Kuuma tene nginya tene, wee ũrĩ El.

Ũtũmaga mũndũ acoke rũkũngũ-inĩ; Uugaga atĩrĩ, “Cokai, inyuĩ ariũ a andũ.”

Tondũ maitho-inĩ maku mĩaka ngiri ĩmwe nĩ ta mũthenya wa ira ũrĩkĩtie kũhĩtũka, O ta ituanĩra rĩmwe rĩa ũtukũ.

Ũhaataga andũ ũkameheria; matuĩkaga o ta toro; Rũcinĩ mahaanaga ta nyeki ĩrĩa ĩthundũkaga.

Ĩringũkaga rũcinĩ na ĩkarura, No gũkinyĩria hwaĩ-inĩ ĩkahooha na ĩkoma.

Nĩ gũkorũo nĩ tũniinagwo nĩ marakara maku Na tũkamakio nĩ mang’ũrĩ maku.

Ũigaga mahĩtia maitũ mbere yaku; Hitho citũ nĩ iguũragio nĩ ũtheri wa ũthiũ waku.

Matukũ maitũ mathiraga nĩ ũndũ wa mathũgũta maku; Na mĩaka itũ ĩkinyaga mũthia o ta mĩheehũ.

Ũraihu wa ũtũũro witũ nĩ mĩaka 70, Kana 80 angĩkorũo mũndũ arĩ na hinya mũno. No ĩkoragwo ĩiyũire mĩtangĩko na kĩeha; Ĩthiraga na ihenya, na ithuĩ tũkombũka tũkabuĩria.

Nũũ ũngĩhota gũtaũkĩrũo nĩ hinya wa marakara maku? Mathũgũta maku nĩ manene o ta gwĩtigĩrũo kũrĩa gũkwagĩrĩire.

Tũrute gũtara matukũ maitũ Nĩguo tũgĩe na ngoro ĩrĩ na ũũgĩ.

Tũcokerere, wee Yahweh! Hihi ũndũ ũyũ ũgũthiĩ na mbere nginya rĩ? Iguĩra ndungata ciaku tha.

Tũhũnie na ũtugi waku rũcinĩ, Nĩgetha tũkũngũiyagie na tũgacanjamũkaga matukũ maitũ mothe.

Tũma tũkene matukũ maringaine na marĩa ũtũnyamarĩtie, Ihinda rĩa mĩaka mĩingĩ o ta ĩrĩa tũkoretwo tũgĩthĩnĩka.

Reke ndungata ciaku cione wĩra waku, Na ariũ a cio mone riri waku.

Riri wa ũthaka wa Yahweh Kĩhoti witũ ũrokorũo hamwe na ithuĩ; Reke wĩra wa moko maitũ ũgaacĩre. Ũtũme wĩra wa moko maitũ ũgaacĩre.