Thaburi 91

Mũndũ o wothe ũikaraga handũ ha hitho ha Ũrĩa ũrĩ Igũrũ Mũno Arĩĩgitagia rungu rwa kĩĩruru kĩa El Shaddai.

Niĩ ngwĩra Yahweh atĩrĩ: “Wee nĩwe rĩũrĩro rĩakwa o na mwĩgitio wakwa, O wee Kĩhoti wakwa ũrĩa ndĩhokete.”

Nĩ gũkorũo nĩ egũkũhonokia kuuma mũtego-inĩ wa mũtegi wa nyoni, Akũhonokie kuuma harĩ mũrimũ mũũru ũrĩa ũrehaga mwanangĩko.

Nĩ arĩkũhumbagĩra na njoya ciake, Na rungu rwa mathagu make nĩho ũrĩũragĩra. Ũhoro wake wa ma ũrĩkoragwo ũrĩ ngo nene na rũthingo rwa kũgitĩra.

Ndũrĩĩtigagĩra imakania cia ũtukũ, Kana mũguĩ ũrĩa ũhĩtũkaga mũthenya,

O na kana mũrimũ mũũru ũrĩa ũceemaga nduma-inĩ, Kana mwanangĩko ũrĩa ũniinanaga mũthenya gatagatĩ.

Andũ ngiri nĩ makaagũa mwena-inĩ waku Na andũ ngiri ikũmi magũe mwena waku wa ũrĩo, No wee gũtirĩ ũndũ mũũru ũgaagũkuhĩrĩria.

Wee no kwĩrorera ũkerorera na maitho maku Wĩyonere iherithia rĩa andũ arĩa aganu.

Nĩ gũkorũo uugĩte atĩrĩ: “Yahweh nĩwe rĩũrĩro rĩakwa,” Nĩ ũtuĩte Ũrĩa ũrĩ Igũrũ Mũno gĩikaro gĩaku.

Gũtirĩ thĩna ũgaagũkora, Na gũtirĩ ihũũra rĩgaakuhĩrĩria hema yaku.

Nĩ gũkorũo nĩ agaatha araika ake ũhoro-inĩ waku, Nĩguo makũgitĩre njĩra-inĩ ciaku ciothe.

Nĩ magaagũkuua na moko mao, Nĩguo ndũkagũthwo kũgũrũ nĩ ihiga.

Nĩ ũgaakinyĩrĩria mũrũthi mwĩthĩ o na nduĩra; Ũkaarangĩrĩria mũrũthi ũrĩ hinya o na nyoka nene.

Yahweh oigĩte ũũ: “Tondũ nĩ anyendete, nĩ ndĩrĩmũhonokagia. Nĩ ndĩrĩmũgitagĩra tondũ nĩ oĩ rĩĩtwa rĩakwa.

Nĩ arĩngayagĩra, na niĩ ngamwĩtĩka. Ndĩrĩkoragwo hamwe nake hĩndĩ ya mĩtangĩko. Nĩ ndĩrĩmũhonokagia na ngamũtũũgĩria.

Ngũmũhe ũtũũro mũraya nginya aiganĩre, Na ndũme one ciĩko ciakwa cia kũhonokania.”