Thaburi 9
Atĩrĩrĩ Yahweh, nĩ ngũkũgooca na ngoro yakwa yothe; Nĩ ngũmenyithania ũhoro wa mawĩra maku mothe ma magegania.
Nĩ ngũkena na njanjamũke nĩ ũndũ waku; Ngũina nyĩmbo ngooce rĩĩtwa rĩaku, wee ũrĩ Igũrũ Mũno. ב [Beth]
Thũ ciakwa ciacoka na thutha-rĩ, Ikũhĩngwo na iniinwo ciehere mbere yaku.
Nĩ gũkorũo ũnduagĩra ciira na kĩhooto na ũkangitĩra; Ũikaragĩra gĩtĩ gĩaku kĩa ũnene na ũgatuanĩra ciira na ũthingu. ג [Gimel]
Nĩ ũtuĩrĩire ndũrĩrĩ na ũkaananga arĩa aganu, Ũgatharia marĩĩtwa mao tene na tene.
Thũ nĩ iniinĩtwo biũ; Wee nĩ waanangire matũũra ma cio, Na itigaacoka kũririkanwo rĩngĩ o na rĩ. ה [He]
No Yahweh egũtũũra aikarĩire gĩtĩ gĩake kĩa ũnene tene na tene; Nĩ ahandĩte na akarũmia gĩtĩ gĩake kĩa ũnene nĩguo atuanĩre ciira na kĩhooto.
Nĩ agaatuanĩra ciira na ũthingu thĩinĩ wa thĩ ĩrĩa ĩikaragwo; Agaatuĩra ndũrĩrĩ kũgerera matuĩro ma ciira ma ũthingu. [Waw] l
Yahweh nĩ rĩũrĩro irũmu harĩ arĩa mahinyĩrĩirio, Akoragwo arĩ rĩũrĩro irũmu hĩndĩ ya mĩtangĩko.
Andũ arĩa moĩ rĩĩtwa rĩaku nĩ marĩkwĩhokaga; Wee Yahweh gũtirĩ hĩndĩ ũgaatiganĩria arĩa magũcaragia. ז [Zayin]
Inai nyĩmbo cia kũgooca Yahweh, o ũcio ũikaraga Zayuni; Menyithiai ikundi cia andũ ciĩko ciake.
Nĩ gũkorũo Ũrĩa ũrĩhagĩria thakame yao nĩ amaririkanaga; Gũtirĩ hĩndĩ akaariganĩrũo nĩ kĩrĩro kĩa arĩa maranyamarĩka. ח [Heth]
Njiguĩra tha wee Yahweh; rora mĩnyamaro ĩrĩa ndĩrareherũo nĩ arĩa mathũire, O wee ũnjarahũraga kuuma ihingo-inĩ cia gĩkuũ,
Nĩgetha menyithanie ciĩko ciaku cia kũgoocwo ndĩ ihingo-inĩ cia mwarĩ wa Zayuni, Na ngene nĩ ũndũ wa ciĩko ciaku cia kũhonokania. ט [Teth]
Ndũrĩrĩ nĩ irikĩrĩte na thĩ irima-inĩ rĩrĩa cienjire; Magũrũ ma cio nĩ manyitĩtwo nĩ neti ĩrĩa ciaambire.
Yahweh nĩ amenyekaga nĩ ũndũ wa matuĩro marĩa atuanagĩra. Mũndũ ũrĩa mwaganu nĩ ategetwo nĩ wĩra wa moko make we mwene. Higaioni. (Sela) י [Yod]
Andũ arĩa aganu macokaga na thutha merekeire Mbĩrĩra, Ũguo nĩguo gũthiaga harĩ ndũrĩrĩ ciothe iria iriganagĩrũo nĩ Kĩhoti.
No andũ arĩa aagi matigũtũũra mariganĩire; O na kĩĩrĩgĩrĩro kĩa andũ arĩa athĩnĩki gũtirĩ hĩndĩ gĩgaathira. כ [Kaph]
Arahũka, wee Yahweh! Ndũkareke mũndũ ahootane. Ndũrĩrĩ irotuĩrũo ciira irĩ mbere yaku.
Atĩrĩrĩ Yahweh, tũma andũ a ndũrĩrĩ maigue guoya, Reke ndũrĩrĩ imenye atĩ cio no andũ tu. (Sela) ל[Lamed]