Thaburi 10

Atĩrĩrĩ Yahweh, nĩ kĩĩ gĩtũmaga ũrũgame o haraya? Wĩhithaga nĩkĩ hĩndĩ ya mĩtangĩko?

Mũndũ ũrĩa mwaganu athingataga ũrĩa ũtarĩ hinya arĩ na mwĩtĩo, Ĩndĩ nĩ akaanyitwo njama-inĩ icio abangaga.

Nĩ gũkorũo mũndũ ũrĩa mwaganu erahaga ũhoro-inĩ wĩgiĩ merirĩria make ma mwĩyendo Na akarathima mũndũ ũrĩa mũkoroku; נ [Nun] Ndaheaga Yahweh gĩtĩo.

Nĩ ũndũ wa gũkorũo na mwĩtĩo, mũndũ ũrĩa mwaganu gũtirĩ ũthuthuria ekaga; Meciria make mothe nĩ atĩ: “Gũtirĩ Kĩhoti.”

Njĩra ciake ithiaga na mbere kũgaacĩra, No matuĩro maku nĩ makĩrĩte ũtaũku wake; Anyũrũragia thũ ciake ciothe.

Oigaga ũũ ngoro-inĩ yake: “Gũtirĩ hĩndĩ ngenyenyeka; Nginya njiarũa na njiarũa Gũtirĩ hĩndĩ ngoona ũũru.” פ [Pe]

Kanua gake kaiyũire irumi, maheeni, na maũndũ ma kwĩhĩtanĩra; Rungu rwa rũrĩmĩ rwake kũrĩ na ũũru na maũndũ ma gũtuurithia.

Aikaraga ohetie andũ hakuhĩ na matũũra; Arĩ handũ harĩa ehithaga, nĩ oragaga mũndũ ũtarĩ na mahĩtia. ע [Ayin] Maitho make maikaraga macũthĩrĩirie mũndũ ũrĩa ũtarĩ na wa kũmũteithia.

Aikaraga ohetie arĩ handũ harĩa ehithaga, o ta mũrũthi ũrĩ kĩmamo-inĩ kĩaguo. Etagĩrĩra nĩguo anyite mũndũ ũrĩa ũtarĩ hinya. Anyitaga mũndũ ũcio ũtarĩ hinya rĩrĩa aguucia neti yake akamĩhinga.

Mũndũ ũcio wanyitwo ahehenjagwo na akarũndwo thĩ; Arĩa matarĩ na wa kũmateithia magũaga moko-inĩ make.

Oigaga ũũ ngoro-inĩ yake: “Kĩhoti nĩ ariganĩirũo. Nĩ ahũgũrĩte ũthiũ wake akarora na kũngĩ. Gũtirĩ hĩndĩ onaga.” ק [Qoph]

Arahũka wee Yahweh. Ambararia guoko gwaku na igũrũ wee Kĩhoti. Ndũkariganĩrũo nĩ andũ arĩa matarĩ hinya.

Nĩ kĩĩ gĩtũmĩte mũndũ ũrĩa mwaganu age kũhe Kĩhoti gĩtĩo? Oigaga ũũ ngoro-inĩ yake: “Wee ndũkaanjirithia.” ר [Resh]

No wee nĩ wonaga thĩna na mĩtangĩko. Ũroraga maũndũ macio na ũkoya ikinya. Mũndũ ũrĩa ũtarĩ na wa kũmũteithia-rĩ, wee nĩwe ehokaga; Wee nĩwe mũteithia wa mwana ũrĩa ũtarĩ ithe. ש [Shin]

Una guoko kwa mũndũ ũrĩa mwaganu na mũũru, Nĩguo hĩndĩ ĩrĩa wacaria waganu wake, Ndũgacoke kũwona rĩngĩ.

Yahweh nĩ Mũthamaki tene na tene. Ndũrĩrĩ nĩ iniinĩtwo ikehera thĩinĩ wa thĩ. ת [Taw]

No wee Yahweh nĩ ũrĩiguaga ihoya rĩa andũ arĩa ahooreri. Ũrĩtũmaga ngoro ciao ikorũo irĩ nũmu na ũkamathikĩrĩria biũ.

Ciana iria itarĩ maithe o na andũ arĩa mahehenjekete nĩ ũrĩtũmaga mone kĩhooto, Nĩguo mũndũ wa gũkũ thĩ ndakanacoke gũtũma metigĩre.