Thama 13

Ningĩ Yahweh akĩaria na Musa akĩmwĩra atĩrĩ:

“Nyamũrĩrai marigithathi mothe thĩinĩ wa Isiraeli. Mwana wa mbere gũciarũo wa kahĩĩ nĩ wakwa, na nyamũ ya mbere gũciarũo ya njamba nĩ yakwa.”

Musa agĩcoka akĩra andũ ũũ: “Ririkanagai mũthenya ũyũ mwoimire Misiri, kũrĩa mwarĩ ngombo, nĩ gũkorũo Yahweh aamũrutire kuo kũgerera guoko kũrĩ hinya. Kwoguo mũtiagĩrĩirũo kũrĩa kĩndũ gĩĩkĩrĩtwo ndawa ya kũimbia

Mũthenya ũyũ, mweri-inĩ wa Abibu nĩguo mwoima kuo

Rĩrĩa Yahweh arĩmũkinyia bũrũri wa Akanaani, Ahiti, Aamori, Ahivi, na Ajebusi, ũrĩa eerĩire maithe manyu ma tene na mwĩhĩtwa atĩ nĩ akaamũhe, bũrũri ũiyũire iria na ũũkĩ, mũrĩkũngũyagĩra ũndũ ũyũ mweri-inĩ ũyũ

Mũrĩrĩaga mĩgate ĩtarĩ mĩkĩre ndawa ya kũimbia thikũ mũgwanja, na mũthenya wa mũgwanja ũrĩkoragwo ũrĩ gĩathĩ kĩa Yahweh

Mĩthenya ĩyo mũgwanja mũrĩrĩaga mĩgate ĩtarĩ mĩkĩre ndawa ya kũimbia; na mũtiagĩrĩirũo gũkorũo na kĩndũ gĩĩkĩrĩtwo ndawa ya kũimbia, na bũrũri-inĩ wanyu gũtikanoneke mũtu mwĩkĩre ndawa ya kũimbia

Na mũthenya ũcio ũkeera mũrũguo atĩrĩ, ‘Ndĩreka ũũ tondũ wa ũrĩa Yahweh aanjĩkĩire rĩrĩa aandutire Misiri.’

Na ũndũ ũcio ũgaatuĩka ta rũũri guoko-inĩ gwaku na ũtuĩke ta kĩririkania thiithi-inĩ waku, nĩgetha watho wa Yahweh ũikarage kanua-inĩ gaku, nĩ gũkorũo Yahweh aakũrutire Misiri kũgerera guoko kũrĩ hinya

Wagĩrĩirũo kũrũmagĩrĩra watho ũcio ihinda rĩrĩa rĩtuĩtwo o mwaka o mwaka.

“Rĩrĩa Yahweh arĩmũkinyia bũrũri wa Akanaani ũrĩa ehĩtĩte harĩ inyuĩ na harĩ maithe manyu ma tene atĩ nĩ akaamũhe,

no mũhaka ũrĩamũragĩra Yahweh mwana o wothe wa kahĩĩ wa irigithathi, o hamwe na marigithathi mothe ma njamba ma mahiũ marĩa ũgaakorũo namo. Njamba ciothe irĩkoragwo irĩ cia Yahweh

Irigithathi o rĩothe rĩa ndigiri ũkaarĩkũũraga na ng’ondu ĩmwe, na ũngĩaga kũrĩkũũra, no mũhaka ũkaariuna ngingo. Na mwana o wothe wa kahĩĩ wa irigithathi harĩ ariũ aku no mũhaka ũrĩmũkũũraga.

“Na thutha-inĩ mũrũguo angĩgakũũria, ‘Nĩ kĩĩ gĩtũmaga wĩke ũũ?’ ũkaamwĩra atĩrĩ, ‘Yahweh aatũrutire Misiri kũrĩa twarĩ ngombo kũgerera guoko kũrĩ hinya

Rĩrĩa Firauni oomirie ngoro akĩrega gũtwĩtĩkĩria tũthiĩ, Yahweh ooragire marigithathi mothe bũrũri-inĩ wa Misiri, marigithathi ma andũ o na ma nyamũ. Nĩkĩo ndutagĩra Yahweh igongona rĩa nyamũ yothe ya njamba ya irigithathi, na ngakũũra ariũ akwa othe a irigithathi.’

Ũndũ ũcio ũrĩkoragwo ũrĩ ta rũũri guoko-inĩ gwaku o na ũtariĩ ta gataama thiithi-inĩ waku, nĩ gũkorũo Yahweh aakũrutire Misiri kũgerera guoko kũrĩ hinya.”

Na rĩrĩ, hĩndĩ ĩrĩa Firauni eetĩkĩririe Aisiraeli mathiĩ, Yahweh ndaamagereirie njĩra ya bũrũri wa Afilisti o na gũtuĩka nĩyo yarĩ nguhĩ. Tondũ Yahweh ooigire atĩrĩ: “Andũ aya mangĩtharĩkĩrũo na mbaara, mahota gũcenjia meciria macoke Misiri.”

Nĩ ũndũ ũcio Yahweh agĩtũma andũ acio mathiũrũrũke magerere njĩra ya werũ merekeire Iria-inĩ Itune. No Aisiraeli mooimire bũrũri wa Misiri mebangĩte ta mbũtũ cia mbaara

Ningĩ Musa agĩkuua mahĩndĩ ma Jusufu, tondũ Jusufu nĩ eerĩte ariũ a Isiraeli mehĩte, akiuga atĩrĩ: “Hatarĩ nganja Yahweh nĩ ageeciria ũhoro wanyu, na inyuĩ no mũhaka mũgaakuua mahĩndĩ makwa mũkiuma gũkũ.”

Nao makiuma Sukothu magĩthiĩ makĩamba hema Ethamu, rũteere-inĩ rwa werũ.

Nake Yahweh aathiaga arĩ mbere yao mũthenya arĩ gĩtugĩ-inĩ gĩa itu nĩguo amonie njĩra, naguo ũtukũ agathiĩ arĩ gĩtugĩ-inĩ kĩa mwaki nĩguo amamũrĩkĩre, kwoguo nĩ maahotaga gũthiĩ mũthenya na ũtukũ

Gĩtugĩ kĩu kĩa itu gĩtieheraga mbere ya andũ mũthenya, o na gĩtugĩ kĩa mwaki gĩtieheraga ũtukũ.