Thama 15

Hĩndĩ ĩyo Musa na Aisiraeli makĩinĩra Yahweh rwĩmbo rũrũ: “Nĩ ngũinĩra Yahweh, tondũ nĩ atũũgĩrĩte mũno. Nĩ aikĩtie mbarathi na mũmĩtwarithia iria-inĩ.

Yah nĩwe hinya na ũhoti wakwa, nĩ gũkorũo nĩ atuĩkĩte ũhonokio wakwa. Ũyũ nĩwe Kĩhoti wakwa, nĩwe ndĩrĩgoocaga; Kĩhoti wa ithe witũ, nĩwe ndĩrĩtũũgagĩria.

Yahweh nĩ njamba ya ita ĩrĩ hinya. Yahweh nĩrĩo rĩĩtwa rĩake.

Nĩ aikĩtie ngaari cia mbaara cia Firauni na mbũtũ yake iria-inĩ, Nacio njamba ciake cia ita iria irĩ hinya mũno agatũma irikĩre Iria-inĩ Itune.

Maĩ maracokanĩrĩire maramahumbĩra, nao mararikĩra na thĩ o ta ihiga.

Guoko gwaku kwa ũrĩo, wee Yahweh, nĩ kũrĩ hinya mũingĩ; Guoko gwaku kwa ũrĩo, wee Yahweh, no kũhehenje thũ.

Nĩ ũndũ wa hinya waku mũingĩ no ũtoorie arĩa magũũkagĩrĩra; Ũtũmaga marakara maku manene, namo makamacina o ta mahuti.

Mĩhũmũ ya maniũrũ maku ĩratũmire maĩ meiganĩrĩre; Mararũgama mehandĩte, maragirĩrĩria kũgĩe na mũiyũro; Maĩ macio maranyitanire kũu gatagatĩ ka iria.

Thũ ĩroigĩte atĩrĩ: ‘Nĩ ngũmarũmĩrĩra! Nĩ ngũmakinyĩra! Ngũmataha indo o nginya njiganie! Nĩ ngũcomora rũhiũ rwakwa rwa njora! Guoko gwakwa nĩ gũkũmatooria!’

Ũrahuuhire na mĩhũmũ yaku, iria rĩramahumbĩra; Mararikĩra o ta cuma nditũ maĩ-inĩ maingĩ.

Nĩ kĩhoti ũrĩkũ ũhaana tawe, wee Yahweh? Nũũ ũhaana tawe, o wee ũkoragwo ũrĩ mũtheru mũno? Nĩ Wagĩrĩire gwĩtigĩrũo na kũgoocwo, o Wee wĩkaga maũndũ ma magegania.

Ũratambũrũkirie guoko gwaku kwa ũrĩo, thĩ ĩramameria.

Andũ arĩa ũkũũrĩte ũmatongoretie ũrĩ na wendo mwĩhokeku; Ũkũhũthĩra hinya waku kũmatongoria nginya gĩikaro-inĩ gĩaku kĩamũre.

Ikundi cia andũ ikũigua ũhoro ũcio, cinaine; Aikari a Filistia nĩ mekũgĩa na mĩtangĩko.

Hĩndĩ ĩyo anene a Edomu nĩ mekũmaka mũno, Nao atongoria arĩa marĩ hinya a Moabi mainaine. Aikari othe a Kanaani nĩ megũkua ngoro.

Mekũnyitwo nĩ guoya na mamake. Megũikara matekwĩnyagunyia o ta ihiga nĩ ũndũ wa hinya wa guoko gwaku. Nginya andũ aku wee Yahweh mahĩtũke, O nginya andũ arĩa wĩgĩrĩire mahĩtũke.

Ũkũmatwara na ũmahande kĩrĩma-inĩ kĩrĩa kĩa igai rĩaku, Handũ harĩa ũhaarĩirie hatuĩke gĩikaro gĩaku, wee Yahweh, Handũ hamũre, harĩa hathondeketwo na moko maku wee Yahweh.

Yahweh egũtũũra athanaga arĩ mũthamaki tene na tene.

Rĩrĩa mbarathi cia Firauni na ngaari ciake cia mbaara o na thigari ciake iraingĩrire iria-inĩ, Yahweh aratũmire maĩ ma iria macokane maracihumbĩra, No andũ a Isiraeli maragereire thĩ nyũmũ maratuĩkania iria rĩu.”

Nake Miriamu ũrĩa warĩ mũnabii, mwarĩ wa nyina na Haruni akĩoya manyanga, nao atumia othe makĩmũrũmĩrĩra makĩinagia manyanga na magĩthũngũthaga

Miriamu akĩamũkĩria arũme akĩina ũũ: “Inĩrai Yahweh, tondũ nĩ atũũgĩrĩte mũno. Nĩ aikĩtie mbarathi na mũmĩtwarithia iria-inĩ.”

Thutha ũcio Musa agĩtongoria ciana cia Isiraeli kuuma Iria-inĩ Itune merekeire werũ-inĩ wa Shuri, na magĩthiĩ rũgendo rwa thikũ ithatũ kũu werũ-inĩ, no mationire maĩ

Magĩkinya Mara, ĩndĩ matiahotire kũnyua maĩ ma Mara tondũ maarĩ marũrũ. Na nĩkĩo eetire handũ hau Mara

Kwoguo andũ makĩambĩrĩria kũnugunĩra Musa, makiugaga atĩrĩ: “Tũkũnyua kĩĩ?”

Nake agĩkaĩra Yahweh, na Yahweh akĩmuonia kamũtĩ. Rĩrĩa aaikirie kamũtĩ kau maĩ-inĩ, maĩ macio magĩthira ũrũrũ.

Akĩmeera ũũ: “Angĩkorũo nĩ mũrĩthikagĩrĩria na kinyi mũgambo wa Yahweh Kĩhoti wanyu na mwĩkage maũndũ marĩa magĩrĩire maitho-inĩ make na mwathĩkagĩre maathani make na mũkarũmagĩrĩra mawatho make, ndirĩ hĩndĩ ngaamũrehera mĩrimũ ĩrĩa ndareheire Amisiri, nĩ gũkorũo niĩ Yahweh nĩ ngũmũhonia.”

Thutha ũcio magĩkinya Elimu, kũrĩa kwarĩ na matherũkĩro 12 ma maĩ na mĩtĩ 70 ya mĩkĩndũ. Makĩamba hema hakuhĩ na maĩ macio.