Thama 16
Kĩrĩndĩ gĩothe kĩa Isiraeli kĩoima Elimu, gĩgĩkinya werũ wa Sini, ũrĩa ũrĩ gatagatĩ ka Elimu na Sinai mũthenya wa 15 wa mweri wa kerĩ kuuma moima bũrũri wa Misiri.
Thutha ũcio kĩrĩndĩ kĩu gĩothe kĩa Isiraeli gĩkĩambĩrĩria kũnugunĩra Musa na Haruni kũu werũ-inĩ
Aisiraeli acio maameeraga ũũ: “Nĩ kaba guoko kwa Yahweh kũngĩatũũragĩire bũrũri-inĩ wa Misiri kũrĩa twaikaraga hakuhĩ na nyũngũ cia nyama na tũkarĩa mĩgate nginya tũkahũna. Rĩu mũtũrehete gũkũ werũ-inĩ ũyũ nĩguo mũũrage kĩũngano gĩkĩ gĩothe na ng’aragu.”
Yahweh agĩcoka akĩra Musa atĩrĩ: “Ngũmuurĩria mĩgate kuuma igũrũ ta mbura, na o mũndũ arĩthiaga kũngania mũigana ũrĩa arabatara mũthenya o mũthenya, nĩguo ndĩmagerie nyone kana nĩ mekũrũmĩrĩra watho wakwa kana matikũũrũmĩrĩra
No mũthenya wa gatandatũ, rĩrĩa marahaarĩria kĩrĩa mongania, kĩagĩrĩire gũkorũo kĩrĩ maita merĩ ma kĩrĩa o mũndũ onganagia mĩthenya ĩyo ĩngĩ.”
Nĩ ũndũ ũcio, Musa na Haruni makĩra ciana cia Isiraeli ciothe atĩrĩ: “Hwaĩ-inĩ nĩ mũkũmenya na ma atĩ Yahweh nĩwe wamũrutire bũrũri wa Misiri
Na rũcinĩ nĩ mũkoona riri wa Yahweh, nĩ gũkorũo nĩ aiguĩte ũrĩa mũranugunĩra Yahweh. Ithuĩ tũrĩ a nĩguo mũtũnugunĩre?”
Ningĩ Musa akĩmeera ũũ: “Yahweh arĩkia kũmũhe nyama cia kũrĩa hwaĩ-inĩ, na rũcinĩ amũhe mĩgate nginya mũiganie, nĩ mũkaamenya atĩ Yahweh nĩ aiguĩte ũrĩa mũramũnugunĩra. Ithuĩ tũkĩrĩ a? Ti ithuĩ mũranugunĩra no nĩ Yahweh.”
Musa agĩcoka akĩra Haruni atĩrĩ: “Ĩra kĩrĩndĩ gĩothe kĩa Isiraeli ũũ, ‘Ũkai mbere ya Yahweh, nĩ gũkorũo nĩ aiguĩte ũrĩa mũranuguna.’”
O hĩndĩ ĩyo Haruni arĩkia kwarĩria kĩrĩndĩ gĩothe kĩa Isiraeli, makĩĩhũgũra makĩrora werũ-inĩ, na atĩrĩrĩ, riri wa Yahweh ũkĩoneka itu-inĩ.
Ningĩ Yahweh akĩaria na Musa akĩmwĩra ũũ:
“Nĩ njiguĩte ũrĩa Aisiraeli maranuguna. Meere atĩrĩ, ‘Hwaĩ-inĩ gũkĩgĩa mairia nĩ mũkũrĩa nyama, na rũcinĩ nĩ mũkaarĩa mĩgate nginya mũiganie, na nĩ mũkaamenya na ma atĩ niĩ nĩ niĩ Yahweh Kĩhoti wanyu.’”
Nĩ ũndũ ũcio, hwaĩ-inĩ ũcio gũgĩũka tũmakia arũme na tũkĩiyũra kũrĩa guothe maambĩte hema na rũcinĩ kwaiyũrĩte ime kũu guothe
Rĩrĩa ime rĩaitĩkire, kũu thĩ werũ-inĩ kwarĩ na kĩndũ kĩnyoroku kĩamethũkangaga, na kĩarĩ kĩnyoroku ta mbembe cia mbura
Aisiraeli mona ũguo, makĩambĩrĩria kũũrania atĩrĩ, “Nĩ kĩĩ gĩkĩ?” nĩ gũkorũo matiamenyaga nĩ kĩĩ. Musa akĩmeera atĩrĩ: “Nĩ mĩgate ĩrĩa Yahweh amũheete ĩtuĩke irio cianyu
Yahweh oigĩte ũũ, ‘O mũndũ onganie iria angĩigania. Mũnganie gĩthimi kĩmwe kĩa omeri harĩ o mũndũ kũringana na andũ arĩa o mũndũ arĩ nao thĩinĩ wa hema yake.’”
Aisiraeli makĩambĩrĩria kũngania; amwe makĩũngania nyingĩ na amwe makĩũngania tũnini
Na hĩndĩ ĩrĩa macithima na omeri, ũrĩa wonganĩtie nyingĩ ndaarĩ na nyingĩ makĩria, nake ũrĩa wonganĩtie nini ndaanyihĩirũo. O mũndũ onganĩtie iria angĩaiganirie.
Musa agĩcoka akĩmeera atĩrĩ: “Gũtirĩ mũndũ wagĩrĩirũo kũiga kĩndũ o na kĩnini giacio gĩkinyie rũcinĩ.”
No matiathikĩrĩirie Musa. Rĩrĩa andũ amwe maaigire imwe igĩkinyia rũcinĩ, ikĩgĩa igunyũ na ikĩnunga, nake Musa akĩrakara mũno nĩ ũndũ wao
Moonganagia o rũcinĩ o rũcinĩ iria mũndũ angĩaiganirie. Narĩo riũa rĩahiũha, iria ciakoragwo thĩ no kũringũka ciaringũkaga.
Mũthenya wa gatandatũ, makĩũngania maita merĩ ma iria moonganagia, ithimi igĩrĩ cia omeri harĩ o mũndũ. Nĩ ũndũ ũcio, atongoria a kĩrĩndĩ kĩu magĩthiĩ na makĩra Musa ũhoro ũcio
Nake akĩmeera atĩrĩ: “Ũguo nĩguo Yahweh oigĩte. Rũciũ nĩ mũthenya wa kũhurũka biũ, nĩ thabatũ yamũrĩirũo Yahweh. Rugai kĩrĩa mũrabatara kũruga, na mũtherũkie kĩrĩa mũrabatara gũtherũkia; mũcoke mũige kĩrĩa mũgũtigia o nginya rũcinĩ.”
Nĩ ũndũ ũcio, magĩciiga nginya rũcinĩ o ta ũrĩa Musa aamaathĩte, na itianungire kana ikĩgĩa igunyũ
Nake Musa akĩmeera atĩrĩ: “Cirĩei ũmũthĩ, tondũ ũmũthĩ nĩ thabatũ ya Yahweh. Ũmũthĩ gũtigũkorũo na cia kũngania
Mũrĩciũnganagia mĩthenya ĩtandatũ, no mũthenya wa mũgwanja, ũcio wa Thabatũ, itirĩkoragwo kuo.”
No rĩrĩ, andũ amwe nĩ maathiire kũngania mũthenya wa mũgwanja, no gũtirĩ kĩndũ moonire.
Nĩ ũndũ ũcio Yahweh akĩra Musa atĩrĩ: “Mũkũrega gwathĩkĩra maathani na mawatho makwa nginya rĩ
Ririkanai atĩ Yahweh nĩ amũheete Thabatũ. Na nĩkĩo mũthenya wa gatandatũ aramũhe irio cia thikũ igĩrĩ. Mũndũ o wothe no mũhaka aikarage harĩa arĩ; gũtirĩ mũndũ wagĩrĩirũo kuuma handũ hake mũthenya wa mũgwanja.”
Nĩ ũndũ ũcio, makĩgĩa na Thabatũ mũthenya wa mũgwanja.
Andũ a nyũmba ya Isiraeli magĩta irio icio “maana.” Ciarĩ cia rangi mwerũ ta mbegũ cia ndania, na ciacamaga ta keki irĩ na ũũkĩ
Musa agĩcoka akĩmeera atĩrĩ: “Yahweh athanĩte ũũ, ‘Iyũriai irio icio gĩthimi kĩmwe kĩa omeri itũũre ciigĩtwo nĩguo njiarũa cianyu ciothe ikoonaga irio iria ndamũheaga werũ-inĩ rĩrĩa ndamũrutaga bũrũri wa Misiri.’”
Nĩ ũndũ ũcio, Musa akĩra Haruni ũũ: “Oya maana gĩthimi kĩmwe kĩa omeri wĩkĩre ndigithũ-inĩ na ũmĩige mbere ya Yahweh nĩguo ĩtũũre hau njiarũa-inĩ cianyu ciothe.”
Haruni akĩmĩiga mbere ya Ũira o ta ũrĩa Yahweh aathĩte Musa nĩguo ĩmenyererũo
Aisiraeli maarĩire maana ihinda rĩa mĩaka 40, o nginya rĩrĩa maakinyire kũndũ gwatũũragwo nĩ andũ. Maarĩire maana o nginya rĩrĩa maakinyire mũhaka-inĩ wa bũrũri wa Kanaani
Omeri ĩmwe nĩ gĩcunjĩ kĩmwe harĩ ikũmi gĩa gĩthimi kĩa eba.