Thama 17
Kĩrĩndĩ gĩothe kĩa Isiraeli gĩkĩambĩrĩria rũgendo kuuma werũ wa Sini, gĩkoima handũ hamwe gĩgathiĩ harĩa hangĩ kũringana na ũrĩa Yahweh aathanaga, na gĩkĩamba hema Refidimu. No kũu gũtiarĩ na maĩ ma kũnyua.
Nĩ ũndũ ũcio andũ makĩambĩrĩria gũtetia Musa makĩmwĩra ũũ: “Tũhe maĩ ma kũnyua.” No Musa akĩmoria atĩrĩ: “Mũrandetia nĩkĩ? Nĩ kĩĩ kĩratũma mũgerie Yahweh?”
No andũ acio nĩ maanyotete mũno marĩ kũu, na nĩ maanugunagĩra Musa makamwĩra ũũ: “Nĩ kĩĩ gĩatũmire ũtũrute Misiri ũũke ũtũũrage na nyota tũrĩ hamwe na ariũ aitũ na mahiũ maitũ?”
Musa agĩgĩkaĩra Yahweh akĩmwĩra atĩrĩ: “Rĩu andũ aya ngũmeka atĩa? Matigĩtie hanini maahũũre na mahiga!”
Nake Yahweh akĩra Musa atĩrĩ: “Thiĩ mbere ya andũ aya, mũrĩ hamwe na athuri amwe a Isiraeli na ũkuue rũthanju rũrĩa wagũthire Rũũĩ rwa Misri naruo. Ũthiĩ ũrũnyitĩte na guoko
Na rĩrĩ, ngũkorũo ndũgamĩte mbere yaku ihiga-inĩ kũu Horebu. Nawe ũgũthe ihiga rĩu, na maĩ nĩ mekuuma thĩinĩ warĩo, nao andũ manyue.” Nake Musa agĩka ũguo athuri acio a Isiraeli makĩĩyonagĩra
Kwoguo agĩta handũ hau Masa na Meriba nĩ ũndũ wa ũguo Aisiraeli maatetire na tondũ wa ũrĩa maageririe Yahweh makĩũria atĩrĩ: “Hihi arĩ hamwe na ithuĩ-ĩ, kana ndarĩ hamwe na ithuĩ?”
Thutha ũcio Aamaleki magĩthiĩ kũrũa na Aisiraeli kũu Refidimu
Nake Musa akĩra Joshua ũũ: “Tũthuurĩre arũme mathiĩ makarũe na Aamaleki. Rũciũ nĩ ngaarũgama kĩrĩma igũrũ, nyitĩte rũthanju rũrĩa Yahweh aanjĩrire nguue.”
Joshua agĩgĩka o ta ũrĩa Musa aamwĩrire, na akĩrũa na Aamaleki. Nao Musa, Haruni, na Huri magĩthiĩ kĩrĩma igũrũ.
Rĩrĩa rĩothe Musa aaikaraga oete moko na igũrũ, Aisiraeli nĩ maatooragia, no angĩarekire macoke thĩ, Aamaleki magatooria
Rĩrĩa Musa aanogire moko, makĩoya ihiga makĩmũigĩra aikarĩre. Magĩcoka makĩmũnyitĩrĩra moko, Haruni mwena ũmwe nake Huri mwena ũcio ũngĩ, nĩ ũndũ ũcio moko make magĩikara mehandĩte nginya riũa rĩgĩthũa
Joshua agĩkĩhoota Amaleki na andũ ake na rũhiũ rwa njora.
Yahweh akĩra Musa ũũ: “Andĩka ũndũ ũyũ ibuku-inĩ ũtuĩke kĩririkania na wĩre Joshua, ‘Nĩ ngweheria Aamaleki biũ nĩguo matikanaririkanwo mũhuro wa riũa.’”
Musa agĩcoka agĩaka kĩgongona agĩgĩta Yahweh-nisi,
akiuga atĩrĩ: “Tondũ Aamaleki nĩ mokĩrĩire gĩtĩ kĩa ũnene kĩa Yah, Yahweh egũtũũra arũaga nao kuuma njiarũa nginya njiarũa.”