Thama 18

Na rĩrĩ, Jethero mũthĩnjĩri-kĩhoti wa Midiani, ũrĩa warĩ ithe wa mũtumia wa Musa, akĩigua maũndũ marĩa mothe Yahweh eekĩire Musa o hamwe na andũ ake a Isiraeli, ũrĩa Yahweh aarutire Aisiraeli kuuma Misiri

Jethero, ithe wa mũtumia wa Musa, aaikaraga na Zipora mũtumia wa Musa, thutha wa Musa kũmwĩra acoke mũciĩ

Hamwe na ariũ ake erĩ. Musa eetire mũrũ wake ũmwe Gerishomu, tondũ ooigire, “Nduĩkĩte mũgeni bũrũri-inĩ wene,”

nake ũcio ũngĩ akĩmwĩta Eliezeri, tondũ ooigire, “Kĩhoti wa baba nĩwe mũndeithia, o we waahonokirie kuuma harĩ rũhiũ rwa njora rwa Firauni.”

Jethero, ithe wa mũtumia wa Musa, hamwe na mũtumia wa Musa na ariũ ake, magĩthiĩ kũrĩ Musa werũ-inĩ kũrĩa aambĩte hema kĩrĩma-inĩ gĩa Kĩhoti ũrĩa wa ma

Agĩcoka agĩtũmana Musa erũo ũũ: “Niĩ, Jethero, ithe wa mũtumia waku, ndĩ njĩra ngĩũka na mũtumia waku na ariũ ake eerĩ.”

O hĩndĩ ĩyo Musa agĩthiĩ gũtũnga ithe wa mũtumia wake, na akĩinamĩrĩra na akĩmũmumunya. O mũndũ akĩũria ũrĩa ũngĩ ũhoro wake, magĩcoka makĩingĩra hema-inĩ.

Musa agĩkĩganĩra ithe wa mũtumia wake maũndũ marĩa mothe Yahweh eekĩte Firauni na Misiri nĩ ũndũ wa Isiraeli, moritũ marĩa mothe maacemanĩtie namo njĩra-inĩ, na ũrĩa Yahweh aamahonokirie

Jethero agĩkena mũno nĩ kũigua maũndũ mothe mega marĩa Yahweh eekĩire Isiraeli harĩ kũmahonokia kuuma Misiri

Jethero agĩcoka akiuga ũũ: “Yahweh arogoocwo, o we wamũhonokirie kuuma Misiri na kuuma harĩ Firauni, na akĩhonokia andũ ake kuuma ũkombo-inĩ wa Misiri

Rĩu nĩ menyete atĩ Yahweh nĩ mũnene gũkĩra ihoti iria ingĩ ciothe, nĩ ũndũ wa ũrĩa eekire arĩa maahinyagĩrĩria andũ ake na mwĩtĩo.”

Ningĩ Jethero, ithe wa mũtumia wa Musa akĩrehe igongona rĩa njino na magongona ma kũrutĩra Yahweh, nake Haruni na athuri othe a Isiraeli magĩũka kũrĩanĩra nake marĩ mbere ya Kĩhoti ũrĩa wa ma.

Mũthenya ũrĩa warũmĩrĩire, Musa agĩikara thĩ o ta ũrĩa aamenyerete nĩguo atuithanie andũ ciira, nao andũ mookaga makarũgama mbere ya Musa kuuma rũcinĩ nginya hwaĩ-inĩ

Rĩrĩa ithe wa mũtumia wa Musa oonire ũrĩa wothe eekagĩra andũ, akĩmũũria atĩrĩ: “Nĩ atĩa ũũ ũrekĩra andũ aya? Nĩ kĩĩ kĩratũma ũikare haha ũrĩ wiki nao andũ aya othe makarũgama mbere yaku kuuma rũcinĩ nginya hwaĩ-inĩ?”

Musa akĩmwĩra atĩrĩ: “Tondũ andũ mokaga kũrĩ niĩ nĩguo mamenye wendi wa Yahweh

Rĩrĩa kuoimĩra ciira, ũrehagwo kũrĩ niĩ nĩgetha ndĩmatuithanie, na ngamamenyithia matua ma Kĩhoti ũrĩa wa ma na mawatho make.”

Nake ithe wa mũtumia wa Musa akĩmwĩra atĩrĩ: “Ũndũ ũyũ ũreka ti mwega

Nĩ ũkũnoga mũno hamwe na andũ aya mũrĩ nao, tondũ mũrigo ũyũ nĩ mũritũ mũno harĩ wee na ndũngĩũhota ũrĩ wiki

Rĩu ta gĩthikĩrĩrie. Nĩ ngũgũtaara, na Yahweh nĩ arĩkoragwo hamwe nawe. Wee tuĩka wa kwaragia na Kĩhoti ũrĩa wa ma ithenya rĩa andũ aya, ũmenyithagie Kĩhoti ũrĩa wa ma maciira mao

Ũrĩmaheaga mũkaana wĩgiĩ matua na mawatho o na njĩra iria magĩrĩirũo gũthiĩra na wĩra ũrĩa magĩrĩirũo kũruta

Ningĩ ũthuure kuuma gatagatĩ-inĩ ka andũ arũme marĩ na ũhoti na metigĩrĩte Yahweh, arũme ehokeku mathũire uumithio ũtarĩ wa kĩhooto, na ũmaamũre matuĩke anene a andũ ngiri, anene a andũ igana, anene a andũ mĩrongo ĩtano, na anene a andũ ikũmi

Acio nĩo marĩtuithanagia andũ rĩrĩa kuoimĩra ciira, na magakũrehagĩra ciira wothe mũritũ, ĩndĩ ciira ũrĩa ũtarĩ mũritũ nĩo marĩtuaga. Wĩhũthĩrie mũrigo ũreke magũteithĩrĩrie

Ũngĩka ũguo, na ũndũ ũcio ũringane na wendi wa Yahweh, nĩ ũkũhota gwĩtiiria mũrigo ũcio, na andũ othe marĩinũkaga maiganĩire.”

Hĩndĩ o ĩyo Musa agĩthikĩrĩria ithe wa mũtumia wake na agĩka ũrĩa wothe aamwĩrire

Musa agĩthuura athuri marĩ na ũhoti kuuma gatagatĩ-inĩ ka Aisiraeli na akĩmaamũra matongoragie andũ, magĩtuĩka anene a andũ ngiri, anene a andũ igana, anene a andũ mĩrongo ĩtano, na anene a andũ ikũmi

Nao nĩo maatuithanagia andũ rĩrĩa kuoimĩra ciira. Maatwaragĩra Musa ciira ũrĩa mũritũ, ĩndĩ ciira wothe ũtarĩ mũritũ nĩo maatuaga

Thutha ũcio Musa akiumagaria ithe wa mũtumia wake, agĩcoka bũrũri wao.