Thama 20

Yahweh agĩcoka akiuga ciugo ici ciothe:

“Niĩ nĩ niĩ Yahweh Kĩhoti waku, ũrĩa wakũrutire bũrũri wa Misiri, kuuma nyũmba-inĩ ya ũkombo

Ndũkanagĩe na ihoti ingĩ tiga niĩ.

Ndũkanethondekere mũhianano kana kĩonerũo kĩa kĩndũ o gĩothe kĩrĩ igũrũ matu-inĩ, kana kĩrĩ thĩ gũkũ thĩ, kana kĩrĩ maaĩ-inĩ marĩa marĩ rungu rwa thĩ.

Ndũkanacinamĩrĩre kana ũcitungatĩre, nĩ gũkorũo niĩ Yahweh Kĩhoti waku, ndĩ Kĩhoti wĩ ũiru, na ngakinyĩria ciana waganu wa maithe, nginya rũciaro rwa gatatũ na rwa kana rwa arĩa mathũire,

na ngaiguĩra andũ ngiri na ngiri tha, arĩa manyendete na marũmagĩrĩra maathani makwa.

“Ndũkanahũthĩre rĩĩtwa rĩa Yahweh Kĩhoti waku tũhũ, nĩ gũkorũo Yahweh ndakaaga kũherithia ũrĩa ũhũthagĩra rĩĩtwa Rĩake tũhũ.

“Ririkanaga mũthenya wa Thabatũ na ũwamũrage

Ũrĩrutaga wĩra waku wothe thikũ ithathatũ,

no mũthenya wa mũgwanja nĩ Thabatũ ya Yahweh Kĩhoti waku. Ndwagĩrĩirũo kũruta wĩra o na ũrĩkũ, wee kana mũrũguo kana mwarĩguo kana ngombo yaku ya mũndũrũme kana ngombo yaku ya mũirĩtu kana mahiũ maku o na kana mũndũ wa kũngĩ ũrĩa ũrĩ thĩinĩ wa matũũra manyu

Tondũ Yahweh oombire igũrũ na thĩ, na iria rĩrĩa inene, na indo iria ciothe irĩ thĩinĩ wacio ihinda-inĩ rĩa thikũ ithathatũ, na mũthenya wa mũgwanja akĩambĩrĩria kũhurũka. Nĩkĩo Yahweh aarathimire mũthenya wa Thabatũ na akĩwamũra.

“Tĩaga thoguo na nyũkwa, nĩgetha ũtũũre ihinda iraya bũrũri-inĩ ũrĩa Yahweh Kĩhoti waku arakũhe.

“Ndũkanoragane.

“Ndũkanatharie.

“Ndũkanaiye.

“Ndũkanarute ũira wa maheeni wĩgiĩ mũndũ ũngĩ.

“Ndũkanerirĩrie nyũmba ya mũndũ ũngĩ. Ndũkanerirĩrie mũtumia wa mũndũ ũngĩ, kana ngombo yake ya mũndũrũme kana ngombo yake ya mũirĩtu kana ndegwa yake kana ndigiri yake kana kĩndũ kĩngĩ o gĩothe gĩake.”

Na rĩrĩ, andũ acio othe nĩ maaiguaga marurumĩ na mũgambo wa coro, na makona heni o na kĩrĩma kĩu gĩgĩtoga; na thutha wa kuona na kũigua maũndũ macio, makĩinaina marũgamĩte haraya

Makĩra Musa atĩrĩ: “Twaragĩrie arĩ wee, na nĩ tũrĩthikagĩrĩria, no ndũkareke Yahweh atwaragĩrie nĩguo tũtigakue.”

Nake Musa akĩra andũ acio ũũ: “Tigai gwĩtigĩra, tondũ Kĩhoti ũrĩa wa ma okĩte kũmũgeria, nĩgetha mũtũũre mũmwĩtigĩrĩte nĩguo mũtikehie.”

Nao andũ acio magĩthiĩ na mbere kũrũgama o haraya, no Musa agĩthiĩ hakuhĩ na itu rĩu rĩirũ harĩa Kĩhoti ũrĩa wa ma aarĩ.

Yahweh agĩcoka akĩra Musa atĩrĩ: “Ũndũ ũyũ nĩguo ũkwĩra Aisiraeli, ‘Inyuĩ ene nĩ mweyonera atĩ ndaria na inyuĩ kuuma igũrũ

Mũtikanathondeke ihoti cia betha mũcithathayagie hamwe na niĩ, na mũtikanethondekere ihoti cia thahabu

Nĩ mũgaathondekera kĩgongona gĩa tĩri, na mũrutagĩre igũrũ rĩakĩo magongona manyu ma njino, magongona manyu ma ũiguano, mbũri na ng’ondu cianyu, na ng’ombe cianyu. Kũndũ kũrĩa guothe ngaathuura rĩĩtwa rĩakwa rĩririkanagwo, nĩ ngookaga kũrĩ inyuĩ na ngamũrathima

Mũngĩgaathondekera kĩgongona kĩa mahiga, mũtikanagĩthondeke na mahiga maicũhie. Tondũ mũngĩkaahũthĩra indo cia gwacũhia, nĩ mũgaagĩthahia

Na mũtikanambate kĩgongona-inĩ gĩakwa mũkĩhũthĩra ngathĩ, nĩgetha njaga yanyu ndĩkanaguũrio.