Thama 24

Yahweh agĩcoka akĩra Musa atĩrĩ: “Ambata ũũke kĩrĩma-inĩ, wee na Haruni, Nadabu na Abihu, hamwe na athuri 70 a Isiraeli, na mũinamĩrĩre mũrĩ o haraya mũũthathaiye

Musa nowe wiki wagĩrĩirũo gũkuhĩrĩria Yahweh; no acio angĩ matiagĩrĩirũo gũkuhĩrĩria, o na kĩrĩndĩ gĩtiagĩrĩirũo kwambata hamwe nake.”

Nake Musa agĩthiĩ akĩra kĩrĩndĩ ciugo icio ciothe cia Yahweh o na matuĩro mothe ma ciira, nakĩo kĩrĩndĩ gĩgĩcokia na mũgambo ũmwe gĩkiuga: “Nĩ twĩhaarĩirie gwĩka ũrĩa wothe Yahweh oigĩte.”

Musa agĩkĩandĩka ciugo icio ciothe cia Yahweh. Agĩcoka agĩũkĩra rũcinĩ tene agĩaka kĩgongona magũrũ-inĩ ma kĩrĩma na akĩhanda mahiga 12 kũringana na mĩhĩrĩga 12 ya Isiraeli

Thutha ũcio agĩtũma anake Aisiraeli, nao makĩruta magongona ma njino na makĩruta ndegwa irĩ magongona ma ũiguano harĩ Yahweh

Musa agĩcoka akĩoya nuthu ya thakame ĩyo akĩmĩkĩra mbakũri-inĩ, nayo nuthu ĩyo ĩngĩ ya thakame akĩmĩminjaminja kĩgongona-inĩ

Agĩcoka akĩoya ibuku rĩa kĩrĩkanĩro na agĩthomera kĩrĩndĩ kĩu na mũgambo mũnene. Nao andũ acio makiuga ũũ: “Nĩ twĩhaarĩirie gwĩka ũrĩa wothe Yahweh oigĩte, na nĩ tũrĩathĩkaga.”

Nĩ ũndũ ũcio Musa akĩoya thakame ĩyo akĩminjaminjĩria kĩrĩndĩ na akiuga: “Ĩno nĩyo thakame ya kĩrĩkanĩro kĩrĩa Yahweh arĩkanĩra na inyuĩ kũringana na ciugo icio ciothe.”

Musa na Haruni, Nadabu na Abihu, na athuri acio 70 a Isiraeli makĩambata,

na makĩona Kĩhoti wa Isiraeli. Harĩa aakinyithĩtie magũrũ make haarĩ na kĩndũ kĩahaanaga gacĩra ka mahiga ma safia, na gaatherete o ta igũrũ rĩo rĩene

Ndaigana gwĩka athuri acio atĩĩku a Isiraeli ũũru, na nĩ moonire kĩoneki gĩa Kĩhoti ũrĩa wa ma, na makĩrĩa na makĩnyua.

Nake Yahweh akĩra Musa atĩrĩ: “Ambata ũũke kĩrĩma igũrũ kũrĩ niĩ na ũikare kuo. Nĩ ngũkũnengera ihengere cia mahiga irĩ na watho na maathani marĩa ngwandĩka ma kũmataara.”

Kwoguo Musa magĩthiĩ na Joshua ndungata yake, nake Musa akĩambata kĩrĩma-inĩ gĩa Kĩhoti ũrĩa wa ma

No agĩtiga era athuri acio atĩrĩ: “Twetererei haha nginya rĩrĩa tũrĩcoka kũrĩ inyuĩ. Haruni na Huri nĩ megũkorũo hamwe na inyuĩ. Mũndũ o wothe ũngĩkorũo na ciira no amatwarĩre.”

Musa agĩcoka akĩambata kĩrĩma-inĩ hĩndĩ ĩrĩa kĩahumbĩrĩtwo nĩ itu.

Riri wa Yahweh ũgĩikara igũrũ rĩa Kĩrĩma gĩa Sinai na gĩkĩhumbĩrũo nĩ itu thikũ ithathatũ. Na mũthenya wa mũgwanja, arĩ thĩinĩ wa itu rĩu agĩta Musa

Aisiraeli arĩa meeroragĩra moonaga riri ũcio wa Yahweh ũrĩ gacũmbĩrĩ-inĩ ga kĩrĩma ũhaana ta mwaki ũrĩa ũniinanaga

Musa agĩcoka agĩtonya thĩinĩ wa itu rĩu na akĩambata kĩrĩma-inĩ kĩu. Musa agĩikara kĩrĩma-inĩ kĩu thikũ 40 ũtukũ na mũthenya.