Thama 29

“Ũndũ ũyũ nĩguo ũgwĩka nĩguo ũmamũre mandungatagĩre marĩ athĩnjĩri-Yahweh: Oya gategwa kamwe, ndũrũme igĩrĩ itarĩ na kaũgũ,

mĩgate ĩtarĩ mĩkĩre ndawa ya kũimbia, mĩgate ĩtekĩrĩtwo ndawa ya kũimbia ĩtukanĩtio na maguta, na tũmĩgate tũceke tũtekĩrĩtwo ndawa ya kũimbia tũhakĩtwo maguta. Wagĩrĩirũo gũthondeka mĩgate ĩyo ũkĩhũthĩra mũtu mũhinyu wa ngano

Na ũmĩkĩre gĩkabu-inĩ na ũmĩrehe mbere yakwa ĩrĩ gĩkabu-inĩ kĩu, hamwe na ndegwa ĩyo na ndũrũme icio igĩrĩ.

“Na ũrehe Haruni na ariũ ake mũromo-inĩ wa hema ya gũtũnganwo na ũmathambie na maĩ

Ũcoke woe nguo icio na ũhumbe Haruni kanjũ, kagooti gatarĩ moko ka ebodi, ebodi, na gakuo ga gĩthũri, na ũmuohe mũcibi wa gũtumwo wa ebodi ũũrũmie wega njohero-inĩ

Ningĩ ũmwĩkĩre kĩremba mũtwe na wĩkĩre rũũri rũu rwamũre rwa kwamũrũo igũrũ rĩa kĩremba kĩu;

na woe maguta ma gũitanĩrĩrio ũmũitĩrĩrie mũtwe ũmwamũre.

“Ũcoke ũrehe ariũ ake ũmahumbe kanjũ

Na ũmohe mĩcibi, Haruni o hamwe na ariũ ake, na ũmekĩre ngũbia; naguo wĩra wa ũthĩnjĩri-Yahweh ũtuĩke wao, ũndũ ũcio ũtuĩke watho wa gũtũũra ũrũmagĩrĩrũo. Ũguo nĩguo ũkwamũra Haruni na ariũ ake nĩguo matungatage marĩ athĩnjĩri-Yahweh.

“Ningĩ ũtware ndegwa ĩyo mbere ya hema ya gũtũnganwo, nake Haruni na ariũ ake maigĩrĩre moko mao mũtwe-inĩ wa ndegwa ĩyo

Na ũthĩnje ndegwa ĩyo ũrĩ mbere ya Yahweh, mũromo-inĩ wa hema ya gũtũnganwo

Woe thakame ĩmwe ya ndegwa ĩyo ũkĩhũthĩra kĩara gĩaku ũmĩhake hĩa-inĩ cia kĩgongona, na ũite thakame ĩyo ĩngĩ yothe gĩtina-inĩ gĩa kĩgongona

Ũcoke woe maguta mothe marĩa mahumbĩrĩte mara, na maguta marĩa marĩ ini-inĩ, na higo cierĩ hamwe na maguta marĩa marĩ igũrũ rĩacio, na ũmacine nĩguo marutĩre ndogo kĩgongona-inĩ

No nyama cia ndegwa ĩyo na rũũa rwayo hamwe na taatha wayo, wagĩrĩirũo gũcicina na mwaki nja ya kambĩ. Rĩu nĩ igongona rĩa mehia.

“Ũcoke woe ndũrũme ĩmwe ya icio, nake Haruni na ariũ ake maigĩrĩre moko mũtwe-inĩ wa ndũrũme ĩyo

Ũmĩthĩnje na woe thakame yayo ũmĩminjaminjie mĩena-inĩ yothe ya kĩgongona

Ningĩ ũtinangie ndũrũme ĩyo icunjĩ, na ũthambie mara na matharigo mayo, na ũbange icunjĩ icio hamwe na mũtwe wayo

Wagĩrĩirũo gũcinĩra ndũrũme ĩyo yothe kĩgongona-inĩ ĩrute ndogo. Rĩu nĩ igongona rĩa njino rĩa kũrutĩrũo Yahweh, rĩrĩ na mũtararĩko mwega. Nĩ igongona rĩa gũcinwo na mwaki rĩa kũrutĩrũo Yahweh.

“Ũcoke woe ndũrũme ĩyo ĩngĩ, nake Haruni na ariũ ake maigĩrĩre moko mao mũtwe-inĩ wa ndũrũme ĩyo

Ũthĩnje ndũrũme ĩyo na woe thakame ĩmwe yayo ũmĩhake moni-inĩ ya gũtũ kwa ũrĩo kwa Haruni na moni cia matũ ma ũrĩo ma ariũ ake na ciara-inĩ iria nene cia moko mao ma ũrĩo na ciara-inĩ iria nene cia magũrũ mao ma ũrĩo, na ũminjaminjie thakame ĩyo mĩena-inĩ yothe ya kĩgongona

Ningĩ woe thakame ĩmwe ĩrĩa ĩrĩ kĩgongona-inĩ na maguta mamwe ma gũitanĩrĩrio ũminjaminjĩrie Haruni na nguo ciake o hamwe na ariũ ake na nguo ciao, nĩgetha we na nguo ciake na ariũ ake na nguo ciao matuĩke amũre.

“Ũcoke woe maguta ma ndũrũme ĩyo, mũting’oe na maguta maguo, maguta marĩa mahumbĩrĩte mara, maguta marĩa marĩ ini-inĩ, higo cierĩ hamwe na maguta marĩa marĩ igũrũ rĩacio, na kũgũrũ kwa ũrĩo, tondũ nĩ ndũrũme ya kũrutwo hĩndĩ ya kwamũrũo

Ningĩ woe mũgate ũtarĩ ndawa ya kũimbia na mũgate ũrĩa wĩkĩrĩtwo maguta o na kamũgate gaceke kuuma gĩkabu-inĩ kĩrĩa kĩrĩ na mĩgate ĩtarĩ mĩkĩre ndawa ya kũimbia kĩrĩa kĩrĩ mbere ya Yahweh

Ũigĩrĩre indo icio ciothe moko-inĩ ma Haruni na moko-inĩ ma ariũ ake, na ũcicũgie mbere na thutha irĩ igongona rĩa gũcũgio mbere ya Yahweh

Ũcoke ũcioe kuuma moko-inĩ mao ũcicinĩre kĩgongona-inĩ, igũrũ rĩa igongona rĩa njino, ituĩke mũtararĩko mwega mbere ya Yahweh. Rĩu nĩ igongona rĩa gũcinwo na mwaki rĩa kũrutĩrũo Yahweh.

“Ningĩ woe gĩthũri kĩa ndũrũme ĩyo ya kũrutwo hĩndĩ ya kwamũrũo, ĩrĩa ĩrutĩtwo nĩ ũndũ wa Haruni, ũgĩcũgie mbere na thutha kĩrĩ igongona rĩa gũcũgio mbere ya Yahweh, na gĩgũtuĩka igai rĩaku

Wamũre gĩthũri kĩu kĩa igongona rĩa gũcũgio na kũgũrũ kwa igai rĩu rĩamũre rĩrĩa rĩgũcũgĩtio, o rĩu rĩrutirũo ndũrũme-inĩ ĩyo ya kũrutwo hĩndĩ ya kwamũrũo, kuuma harĩ kĩrĩa kĩrutĩtwo nĩ ũndũ wa Haruni na ariũ ake

Igũtuĩka cia Haruni na ariũ ake na ũndũ ũcio ũgũtũũra ũrũmagĩrĩrũo nĩ Aisiraeli, tondũ nĩ igai rĩamũre, na igũtuĩka igai rĩamũre rĩa kũheanagwo nĩ Aisiraeli. Rĩu nĩ igai rĩamũre rĩrĩa marĩrutagĩra Yahweh kuuma harĩ magongona mao ma ũiguano.

“Nguo icio nyamũre cia Haruni irĩhũthagĩrũo nĩ ariũ ake arĩa megũcoka ithenya rĩake rĩrĩa maitĩrĩrio maguta na maamũrũo matuĩke athĩnjĩri-Yahweh

Mũrũ wake ũrĩa ũrĩcokaga ithenya rĩake arĩ mũthĩnjĩri-Yahweh na agathiĩ gũtungata thĩinĩ wa harĩa hamũre hema-inĩ ya gũtũnganwo arĩĩhumbaga nguo icio thikũ mũgwanja.

“Na woe ndũrũme ĩyo ya kũrutwo hĩndĩ ya kwamũrũo ũtherũkĩrie nyama ciayo handũ hamũre

Nake Haruni na ariũ ake marĩe nyama cia ndũrũme ĩyo na mĩgate ĩrĩa ĩrĩ gĩkabu-inĩ marĩ mũromo-inĩ wa hema ya gũtũnganwo

Magĩrĩirũo kũrĩa indo iria irutĩtwo cia kũhumbĩra mehia mao nĩguo maamũrũo matuĩke athĩnjĩri-Yahweh na matherio. No mũndũ ũtetĩkĩrĩtio ndagĩrĩirũo gũcirĩa, tondũ nĩ indo nyamũre

Nyama o yothe ya igongona rĩu rĩa kũrutwo hĩndĩ ya kwamũrũo o na mĩgate ĩngĩtigara gũkinyĩria rũcinĩ, wagĩrĩirũo gũcina na mwaki kĩrĩa gĩatigara. Gĩtiagĩrĩire kũrĩo, tondũ nĩ kĩndũ kĩamũre.

“Ũguo nĩguo ũgwĩka harĩ Haruni na ariũ ake, kũringana na maũndũ marĩa mothe ngwathĩte. Ũkũhũthĩra thikũ mũgwanja kũmaamũra matuĩke athĩnjĩri-Yahweh

Ũrĩrutaga ndegwa ya igongona rĩa mehia o mũthenya nĩ ũndũ wa kũhumbĩra mehia, na ũgatheria kĩgongona kuumana na mehia na njĩra ya kũruta igongona rĩa kũhumbĩra mehia nĩ ũndũ wakĩo, na ũgagĩitĩrĩria maguta nĩgetha ũkĩamũre

Ũkũhũthĩra thikũ mũgwanja kũruta igongona rĩa kũhumbĩra mehia nĩ ũndũ wa kĩgongona, na no mũhaka ũkĩamũre nĩguo gĩtuĩke kĩgongona kĩamũre mũno. Mũndũ wothe ũrĩhutagia kĩgongona agĩrĩirũo gũkorũo arĩ mwamũre.

“Ici nĩcio indo iria ũrĩrutaga kĩgongona-inĩ: o mũthenya tũtũrũme twĩrĩ twa mwaka ũmwe, hĩndĩ ciothe

Ũrĩrutaga gatũrũme kamwe rũcinĩ nako kau kangĩ ũgakaruta hwaĩ-inĩ gũkĩgĩa mairia

Gĩcunjĩ kĩmwe harĩ ikũmi gĩa gĩthimi kĩa eba kĩa mũtu mũhinyu ũtukanĩtio na gĩcunjĩ kĩmwe harĩ inya kĩa hini kĩa maguta ma kũhihwo, na gĩcunjĩ kĩmwe harĩ inya kĩa hini kĩa igongona rĩa ndibei, irĩrutagwo hamwe na gatũrũme kau ka mbere

Nako gatũrũme kau ga kerĩ ũrĩkarutaga hwaĩ-inĩ gũkĩgĩa mairia, hamwe na magongona ma mũtu na ma ndibei ta marĩa marĩrutagwo rũcinĩ. Ũrĩcirutaga irĩ mũtararĩko mwega, irĩ igongona rĩa gũcinwo na mwaki rĩa kũrutĩrũo Yahweh

Rĩu rĩrĩkoragwo rĩrĩ igongona rĩa njino rĩa kũrutagwo hingo ciothe nĩ njiarũa cianyu ciothe mbere ya Yahweh mũromo-inĩ wa hema ya gũtũnganwo, harĩa ndĩrĩkuumagĩrĩra nĩguo ngwarĩrie.

“Hau nĩho ndĩriumagĩrĩra Aisiraeli, na riri wakwa nĩ ũrĩtũmaga handũ hau hatuĩke hamũre

Nĩ ngũtheria hema ya gũtũnganwo hamwe na kĩgongona, na therie Haruni na ariũ ake nĩguo mandungatagĩre marĩ athĩnjĩri-Yahweh

Nĩ ndĩikaranagia na andũ a Isiraeli, na nduĩke Kĩhoti wao

Nao nĩ mekũmenya atĩ niĩ nĩ niĩ Yahweh Kĩhoti wao, ũrĩa wamarutire bũrũri wa Misiri nĩgetha njikaranagie nao. Niĩ nĩ niĩ Yahweh Kĩhoti wao.