Thama 3
Musa agĩtuĩka mũrĩithi wa rũũru rwa Jethero mũthĩnjĩri-kĩhoti wa Midiani, ũrĩa warĩ ithe wa mũtumia wake. Na hĩndĩ ĩrĩa aatwaraga rũũru rũu mwena wa ithũĩro rĩa werũ, agĩkinya Horebu, kĩrĩma gĩa Kĩhoti ũrĩa wa ma
Mũraika wa Yahweh akĩmuumĩrĩra rũrĩrĩmbĩ-inĩ rwa mwaki thĩinĩ wa kĩhinga kĩa mĩigua. Na rĩrĩa aarorire, akĩona kĩhinga kĩu kĩa mĩigua gĩgĩakana ĩndĩ gĩtiahĩaga
Nĩ ũndũ ũcio Musa akiuga ũũ: “Nĩ ngũthiĩ ho nyone ũndũ ũyũ wa kũgegania, menye kĩrĩa kĩratũma kĩhinga kĩĩrĩa kĩa mĩigua kĩage kũhĩa.”
Rĩrĩa Yahweh oonire atĩ nĩ athiĩ kũrora, akĩmwĩta arĩ hau kĩhinga-inĩ kĩu kĩa mĩigua: “Musa! Musa!” nake akiuga: “Ĩ niĩ ũyũ haha.”
Agĩcoka akĩmwĩra ũũ: “Ndũgakuhĩrĩrie makĩria ma ũguo. Ruta iratũ, tondũ handũ hau ũrũgamĩte nĩ handũ hamũre.”
Ningĩ akĩmwĩra: “Nĩ niĩ Kĩhoti wa thoguo, Kĩhoti wa Iburahimu, Kĩhoti wa Isaaka, na Kĩhoti wa Jakubu.” Nake Musa akĩhitha ũthiũ wake, tondũ nĩ eetigĩrire kũrora Kĩhoti ũrĩa wa ma
Yahweh agĩcoka akĩmwĩra atĩrĩ: “Hatarĩ nganja nĩ nyonete mĩnyamaro ya andũ akwa arĩa marĩ Misiri, na ngaigua kĩrĩro kĩao tondũ wa arĩa maramarutithia wĩra mũritũ; nĩ njũĩ wega ruo rũrĩa marĩ naruo
Nĩ ngũikũrũka ndĩmahonokie kuuma guoko-inĩ kwa Amisiri na ndĩmarute bũrũri ũcio ndĩmatware bũrũri mwega na mwariĩ, bũrũri ũiyũire iria na ũũkĩ, bũrũri wa Akanaani, Ahiti, Aamori, Aperizi, Ahivi, na Ajebusi
Na rĩrĩ, nĩ njiguĩte kĩrĩro kĩa andũ a Isiraeli, na ngona ũrĩa Amisiri maramahinyĩrĩria
Rĩu nĩ ngũgũtũma kũrĩ Firauni, na nĩ ũkũruta andũ akwa Aisiraeli kuuma Misiri.”
No rĩrĩ, Musa akĩũria Kĩhoti ũrĩa wa ma atĩrĩ: “Niĩ ndĩ ũ nĩguo thiĩ kũrĩ Firauni na ndute Aisiraeli kuuma Misiri?”
Nĩ ũndũ ũcio akĩmwĩra: “Nĩ ngũkorũo hamwe nawe, na gĩkĩ nĩkĩo kĩmenyithia gĩa kuonania nĩ niĩ ndagũtũma: Warĩkia kũruta Aisiraeli kuuma Misiri, nĩ mũgaatungatĩra Kĩhoti ũrĩa wa ma kĩrĩma-inĩ gĩkĩ.”
No Musa akĩũria Kĩhoti ũrĩa wa ma ũũ: “Ĩ ingĩthiĩ kũrĩ Aisiraeli ndĩmeere, ‘Kĩhoti wa maithe manyu ma tene nĩ andũma kũrĩ inyuĩ,’ nao manjũrie atĩrĩ, ‘Etagwo atĩa?’ Ngũmeera atĩa?”
Yahweh akĩra Musa atĩrĩ: “Nĩ Ngũtuĩka Kĩrĩa Ngũthuura Gũtuĩka.” Agĩcoka akiuga ũũ: “Ũkeera Aisiraeli atĩrĩ, ‘Nĩ Ngũtuĩka nĩwe ũndũmĩte kũrĩ inyuĩ.’”
O rĩngĩ Yahweh akĩra Musa ũũ:
Rĩu thiĩ ũcokanĩrĩrie athuri a Isiraeli ũmeere atĩrĩ, ‘Yahweh Kĩhoti wa maithe manyu ma tene nĩ anyumĩrĩire, Kĩhoti wa Iburahimu, Isaaka, na Jakubu, na akanjĩra ũũ: “Hatarĩ nganja nĩ ndĩmũririkanĩte na ngona maũndũ marĩa mũrekwo gũkũ Misiri
Nĩ ũndũ ũcio ndoiga ũũ, nĩ ngũmũruta mĩnyamaro-inĩ ĩyo mũranyamario nĩ Amisiri ndĩmũtware bũrũri wa Akanaani, Ahiti, Aamori, Aperizi, Ahivi, na Ajebusi, bũrũri ũiyũire iria na ũũkĩ.”’
“Hatarĩ nganja nĩ megũgũthikĩrĩria, na mũgũthiĩ hamwe na athuri a Isiraeli kũrĩ mũthamaki wa Misiri na mũmwĩre ũũ: ‘Yahweh Kĩhoti wa Ahibirania nĩ arĩtie na ithuĩ. Kwoguo, twĩtĩkĩrie tũthiĩ rũgendo rwa thikũ ithatũ werũ-inĩ tũkarutĩre Yahweh Kĩhoti witũ igongona.’
Ĩndĩ nĩ njũĩ wega atĩ mũthamaki wa Misiri ndekũmwĩtĩkĩria mũthiĩ o tiga ahatĩrĩirio nĩ guoko kũrĩ hinya eke ũguo
Nĩ ũndũ ũcio, nĩ ngũtambũrũkia guoko gwakwa hũũre Misiri na ciĩko ciakwa ciothe cia magegania, na thutha ũcio nĩ ekũmwĩtĩkĩria mũthiĩ
Na ndũme andũ aya metĩkĩrĩke maitho-inĩ ma Amisiri, na mũkiuma kuo, mũtikoima moko matheri
O mũtumia nĩ ageetia ũrĩa mariganĩtie nake o hamwe na mũtumia ũrĩa ũikaraga gwake mũciĩ arĩ mũgeni indo cia betha na cia thahabu o hamwe na nguo, mũcihumbe ariũ na aarĩ anyu; na nĩ mũgaataha Amisiri.”