Thama 31

Yahweh agĩcoka akĩarĩria Musa akĩmwĩra ũũ:

“Atĩrĩrĩ, nĩ thuurĩte Bezaleli mũrũ wa Uri mũrũ wa Huri wa mũhĩrĩga wa Yahuda

Na nĩ ngũmũiyũria roho wa Yahweh, ndĩmũhe ũũgĩ, ũtaũku, na ũmenyo wĩgiĩ ũbundi wa mĩthemba yothe,

wa gũthondeka indo ng’emu, na wa kũruta wĩra na thahabu, betha, na gĩcango,

wa gũconga na kũbanga tũhiga, na gũthondeka mĩthemba yothe ya indo cia mbaũ

Na rĩrĩ, nĩ thuurĩte Oholiabu mũrũ wa Ahisamaku wa mũhĩrĩga wa Dani nĩguo amũteithĩrĩrie, na andũ arĩa othe marĩ na ũũgĩ, nĩ ngũmongerera ũũgĩ ngoro-inĩ ciao, nĩgetha mathondeke indo iria ciothe ngwathĩte:

hema ya gũtũnganwo, ithandũkũ rĩa Ũira na gĩkunĩko kĩarĩo, indo ciothe cia hema ĩyo,

metha na indo ciayo, mũtĩ wa kũigĩrĩrũo matawa wa thahabu therie na indo ciaguo ciothe, kĩgongona kĩa ũbumba,

kĩgongona gĩa kũrutĩra igongona rĩa njino na indo ciakĩo ciothe, kĩraĩ na handũ hakĩo ha gũkĩigĩrĩra,

nguo ndume wega, nguo nyamũre cia Haruni mũthĩnjĩri-Yahweh, nguo cia ariũ ake nĩ ũndũ wa gũtungata marĩ athĩnjĩri-Yahweh,

maguta ma gũitanĩrĩrio, na ũbumba ũranunga wega wa handũ harĩa hamũre. Megwĩka ũrĩa wothe ngwathĩte.”

Yahweh agĩcoka akĩarĩria Musa akĩmwĩra atĩrĩ:

“Aria na Aisiraeli ũmeere atĩrĩ, ‘Makĩria ma maũndũ mothe, mũrũmagie thabatũ ciakwa, nĩ gũkorũo nĩ rũũri gatagatĩ gakwa na inyuĩ njiarũa-inĩ cianyu nĩguo mũmenye atĩ niĩ, Yahweh, nĩ kũmwamũra ndĩramwamũra

No mũhaka mũrũmagie Thabatũ, tondũ nĩ kĩndũ kĩamũre harĩ inyuĩ. Ũrĩa ũrĩmĩthahagia agĩrĩire kũũragwo. Mũndũ o wothe angĩruta wĩra wa mũthemba o wothe mũthenya ũcio, agĩrĩire kweherio gatagatĩ-inĩ ka andũ ao

Wĩra ũrĩrutagwo thikũ ithathatũ, ĩndĩ mũthenya wa mũgwanja nĩ Thabatũ ya kũhurũka biũ. Nĩ kĩndũ kĩamũre harĩ Yahweh. Mũndũ o wothe ũkaaruta wĩra mũthenya wa Thabatũ agĩrĩire kũũragwo

No mũhaka Aisiraeli marũmagie Thabatũ; magĩrĩire kũrũmia Thabatũ njiarũa-inĩ ciao ciothe. Nĩ kĩrĩkanĩro gĩa gũtũũra

Rũu nĩ rũũri rwa gũtũũra gatagatĩ-inĩ gakwa na andũ a Isiraeli, nĩ gũkorũo Yahweh oombire igũrũ na thĩ thikũ ithathatũ na mũthenya wa mũgwanja akĩhurũka na agĩĩcanjamũra.’”

Na rĩrĩa aarĩkirie kwaria nake Kĩrĩma-inĩ gĩa Sinai, akĩnengera Musa ihengere igĩrĩ cia Ũira, ihengere cia mahiga ciandĩkĩtwo na kĩara kĩa Yahweh.