Thimo 10

Thimo cia Suleimani. Mwana mũũgĩ atũmaga ithe akene No mwana mũkĩgu atũmaga nyina agĩe na kĩeha.

Mĩthithũ yumanĩte na waganu ndĩkoragwo na ũguni, No ũthingu nĩguo ũhonokagia mũndũ kuuma gĩkuũ-inĩ.

Yahweh ndangĩreka ngoro ya mũndũ mũthingu ĩrĩo nĩ ng'aragu, No nĩ kũnyuguta anyugutaga merirĩria ma arĩa aganu akamate.

Moko magũtaru marehaga ũthĩni, No moko marĩ kĩyo marehaga ũtonga.

Mwana ũrĩa ũhũthagĩra ũũgĩ acokanagĩrĩria irio hĩndĩ ya ũrugarĩ, No mwana ũrĩa ũtindaga toro hĩndĩ ya magetha, nĩ njono arehage.

Irathimo ikoragwo mũtwe-inĩ wa mũndũ ũrĩa mũthingu, No kanua ka mũndũ ũrĩa mwaganu kahithaga maũndũ ma ũhinya.

Kĩririkano kĩa mũndũ ũrĩa mũthingu nĩ kĩrathimagwo, No rĩĩtwa rĩa andũ arĩa aganu nĩ kũbutha rĩkaabutha.

Mũndũ ũkoragwo na ngoro ĩrĩ na ũũgĩ nĩ etĩkagĩra Maathani, No mũndũ ũrĩ iromo ciaragia ũrimũ nĩ kũgũa agũaga.

Mũndũ ũrĩa ũthiaga na mĩthiĩre itarĩ ungumania athiaga atarĩ ũndũ ũkũmũmakia, No ũrĩa wogomagia ikĩro ciake we no akaamenyeka.

Mũndũ ũrĩa uunaga riitho rĩake na wara atũmaga kũgĩe na kĩeha, Na mũndũ ũrĩ iromo ciaragia maũndũ ma ũrimũ nĩ agũaga.

Kanua ka mũndũ ũrĩa mũthingu nĩ kĩhumo kĩa muoyo, No kanua ka mũndũ ũrĩa mwaganu kahithaga maũndũ ma ũhinya.

Rũmena nĩruo rũcogagĩra ngũĩ, No wendo nĩ ũhumbagĩra mehia mothe.

Ũũgĩ ũrĩa wa ma ũkoragwo mĩromo-inĩ ya mũndũ ũrĩa ũrĩ na ũtaũku, No rũthanju nĩ rwa mũgongo wa mũndũ ũrĩa ũtarĩ wĩcirio.

Andũ arĩa ogĩ nĩ meigagĩra ũmenyo ũrĩ ta mũthithũ, No kanua ga kĩrimũ kĩũra-matũ gagĩkuhagĩrĩria mwanangĩko-inĩ.

Ũtonga wa mũndũ mũtongu nĩ itũũra rĩake rĩrĩ na ũgitĩri. Mwanangĩko wa andũ arĩa athĩni nĩ ũthĩni wao.

Mũcara wa mũndũ ũrĩa mũthingu wĩkanagĩra muoyo; No maciaro ma mũndũ ũrĩa mwaganu makinyanagia wĩhia-inĩ.

Mũndũ ũrĩa wathĩkagĩra ũtaaro nĩ athiĩrĩire njĩra ya muoyo, No ũrĩa ũtetĩkagĩra kũrũngwo nĩ kũũra oraga njĩra.

Mũndũ ũrĩa ũhithaga rũmena rwake nĩ maheeni aragia, Na mũndũ ũrĩa ũtheremagia maũndũ ma njambanio nĩ mũkĩgu.

Hĩndĩ ĩrĩa ciugo ciaingĩha, wagarari watho ndũngĩĩthemwo, No mũndũ ũrĩa ũgiragĩrĩria mĩromo yake akoragwo e mũũgĩ.

Rũrĩmĩ rwa mũndũ ũrĩa mũthingu rũtariĩ ta betha ĩrĩa thuuranĩre wega, No ngoro ya mũndũ ũrĩa mwaganu ndĩrĩ bata o na atĩa.

Mĩromo ya mũndũ ũrĩa mũthingu nĩ ĩrĩithagia andũ aingĩ, No andũ arĩa akĩgu makuaga nĩ kwaga wĩcirio.

Kĩrathimo kĩa Yahweh nĩkĩo gĩtongagia mũndũ, Na ndarĩ ruo onganagĩrĩria nakĩo.

Kũbaanga maũndũ ma waganu nĩ ta mũthaako harĩ mũndũ ũrĩa mũkĩgu, No ũũgĩ nĩ wa mũndũ ũrĩa ũkoragwo na ũtaũku.

Mũndũ ũrĩa mwaganu nĩ agaakorũo nĩ ũndũ ũrĩa etigagĩra; No andũ arĩa athingu nĩ mahingagĩrio merirĩria mao.

Rĩrĩa kĩhuhũkanio kĩrahĩtũka, mũndũ ũrĩa mwaganu ndatigaraga kuo rĩngĩ, No mũndũ ũrĩa mũthingu atũũraga atariĩ ta mũthingi tene na tene.

O ta thiki ĩrĩ magego-inĩ, na ndogo ĩrĩ maitho-inĩ, No taguo kĩgũũta gĩtariĩ harĩ mũndũ ũrĩa ũgĩtũmaga.

Gwĩtigĩra Yahweh nĩ gũtũmaga matukũ ma ũtũũro wa mũndũ mongerereke, No mĩaka ya andũ arĩa aganu ĩkanyihio.

Kĩĩrĩgĩrĩro kĩa andũ arĩa athingu kĩrehaga gĩkeno, No kĩĩrĩgĩrĩro kĩa andũ arĩa aganu nĩ kĩhukaga.

Njĩra ya Yahweh nĩ mwĩgitio harĩ mũndũ ũrĩa mũkinyaniru kũna, No nĩ mwanangĩko harĩ arĩa mekaga maũndũ moru.

Andũ arĩa athingu gũtirĩ hĩndĩ mangĩenyenyeka, No andũ arĩa aganu matigaacoka gũtũũra thĩinĩ wa thĩ.

Kanua ka mũndũ ũrĩa mũthingu gaitũrũraga ũũgĩ ũrĩa wa ma, No rũrĩmĩ rũrĩa rwaragia maũndũ ma thoni nĩ gũtinio rũtinagio.

Mĩromo ya mũndũ ũrĩa mũthingu nĩ ĩmenyaga maũndũ marĩa maiguithanagia wega ngoro, No kanua ka andũ arĩa aganu karagia maũndũ o ma ũũra thoni.