Thimo 9

Mũndũ-wa-nja ũcio wĩtagwo Ũũgĩ wa ma nĩ akĩte nyũmba yake; Nĩ acũhĩtie itugĩ ciayo mũgwanja.

Nĩ athĩnjĩte ngoima ciake; Nĩ atukanĩtie ndibei yake; Ningĩ akaharĩria metha yake.

Nĩ atũmĩte ndungata ciake cia airĩtu Igetane irĩ kũndũ gũtũũgĩru itũũra-inĩ ciuge:

“Nũ ũcio wagĩte ũmenyeru! Nĩ akerũre atonye gũkũ!” Eraga mũndũ ũrĩa ũtarĩ wĩcirio atĩrĩ:

“Ũkai mũrĩe mũgate wakwa Na mũnyue ndibei ĩrĩa ndukanĩtie.

Tiganai na ũhoro wa acio matarĩ ũmenyeru nĩguo mũtũũre muoyo; Thiagĩrai ikĩro-inĩ ciĩna ũtaũku.”

Mũndũ ũrĩa ũkaanagia mũnyũrũrania egĩĩragĩra o gĩconoko, Na ũrĩa wothe ũrũngaga mũndũ mwaganu akegĩĩra kĩrema.

Ndũkanarũnge mũnyũrũrania, tondũ nĩ egũgũthũũra. Rũnga mũndũ mũũgĩ, nake nĩ egũkwenda.

Taara mũndũ mũũgĩ, nake nĩ ekũũhĩga makĩria. Ruta mũndũ mũthingu, nake nĩ ekuongerera maũndũ marĩa erutĩte.

Gwĩtigĩra Yahweh nĩkuo kĩambĩrĩria kĩa ũũgĩ ũrĩa wa ma Na kũmenya Ũrĩa Mwamũre nĩ ũtaũku.

Nĩ gũkorũo matukũ maku nĩ makaaingĩha nĩ ũndũ wakwa, Na wongererũo mĩaka ũtũũro-inĩ waku.

Ũngĩtuĩka mũũgĩ, wee nĩwe ũkũgunĩka nĩ ũndũ wa ũũgĩ ũcio, No ũngĩkorũo ũrĩ mũnyũrũrania, nowe wiki ũrĩkuaga ũndũ ũcio.

Mũndũ-wa-nja ũrĩa kĩrimũ nĩ wa mbĩrĩrĩka. akaaga ũmenyeru na gũtirĩ ũndũ oĩ.

Aikaraga thĩ mũromo-inĩ wa nyũmba yake Agaikarĩra gĩtĩ kũndũ kũrĩa gũtũũgĩru itũũra-inĩ,

Agetaga arĩa marahĩtũka, Acio marathiĩ merekeire kũrĩa megũthiaga, akameera ũũ:

"Nũũ ũcio ũtarĩ na ũmenyeru? Nĩ akerũre atonye gũkũ.” Eraga mũndũ ũrĩa ũtarĩ wĩcirio atĩrĩ:

“Maĩ ma ũici me cama, Na irio cia kũrĩĩrũo hitho-inĩ irĩ mũrio.”

No mũndũ ũcio ndamenyaga atĩ arĩa akuũ marĩ kũu, Atĩ ageni a mũka ũcio marĩ kũndũ kũrĩa kũriku thĩinĩ wa Mbĩrĩra.