Thimo 8

Githĩ mũndũ-wa-nja ũcio, o we wĩtagwo ũũgĩ-ũrĩa-wa-ma ti gwĩtana aretana? Na githĩ ũtaũku ndũranĩrĩra na mũgambo waguo?

Ũrĩ tũcũũmbĩrĩ-inĩ twa kũndũ gũtũũgĩru gũkuhĩ na njĩra, Nĩ arũgamaga handũ hake magomano-inĩ ma njĩra.

Hakuhĩ na ihingo cia kũingĩra itũũra, Itonyero-inĩ cia ihingo, Aikaraga akĩanagĩrĩra na mũgambo mũnene akoiga:

“Inyuĩ andũ aya, nĩ inyuĩ ndĩreta; Ndĩranĩrĩra na mũgambo wakwa njerekeirie kũrĩ inyuĩ ciana cia kĩrĩndĩ.

Inyuĩ mũtarĩ na ũmenyeru, mwĩrutei ũtaũku; Inyuĩ irimũ ici, gĩai na ngoro ĩrĩ na ũtaũku.

Thikĩrĩriai tondũ ũndũ ũrĩa ndĩroiga nĩ wa bata, Mĩromo yakwa ĩtumũkaga maũndũ o marĩa marũngĩrĩirie;

Nĩ gũkorũo kanua gakwa karagia ũhoro wa ma, Na mĩromo yakwa nĩ yonaga maũndũ ma waganu me magigi.

Ciugo cia kanua gakwa ciothe nĩ cia ũthingu. Gũtirĩ o na kĩmwe kĩogomu kana gĩtarĩ kĩrũngĩrĩru.

Ciothe nĩ ciugo hũthũ harĩ arĩa makoragwo na ũtaũku, Na nĩ njerekereru harĩ arĩa moonete ũmenyo.

Thuurai ũtaaro wakwa handũ ha betha, Na ũmenyo handũ ha thahabu ĩrĩa thuuranĩre mũno,

Tondũ ũũgĩ ũrĩa wa ma nĩ mwega gũkĩra ruru iria ndune; Indo iria ingĩ ciothe cia kwĩrirĩrio itingĩgerekanĩka nake.

Niĩ, o niĩ ũũgĩ ũrĩa wa ma, ndũũranĩtie hamwe na ũtaũku wa maũndũ; Nĩ ngĩĩte na ũmenyo na ũhoti wa kuona hau kabere.

Gwĩtigĩra Yahweh nĩ gũthũũra maũndũ moru. Nĩ thũrĩte mwĩtĩo, na mwĩtũgĩrio, njĩra ya waganu, o na mĩario ya ũũra thoni.

Nĩ ngoragwo na ũtaaro mwega na ũũgĩ ũrĩa mũkinyanĩru; Nĩ niĩ Ũtaũku naguo ũhoti nĩ wakwa.

Nĩ ũndũ wakwa-rĩ, athamaki nĩ mathiaga na mbere gwathana, Nao anene makaheana mawatho ma ũthingu.

Nĩ ũndũ wakwa-rĩ, anene nĩ mathiaga na mbere gwathana, Na arĩa marĩ igweta o nao, Nginya atuanĩri cira a gũkũ thĩ o nao.

Nĩ nyendete arĩa manyendete, Na arĩa manjaragia nĩ marĩnyonaga.

Ũtonga o na riri ikoragwo harĩ niĩ, Ũgaacĩru ũtathiraga o hamwe na ũthingu.

Maciaro makwa nĩ mega gũkĩra thahabu, o na thahabu ĩrĩa therie, Na uumithio wakwa nĩ mwega gũkĩra betha ĩrĩa thuuranĩre wega.

Ngeragĩra njĩra-inĩ ya ũthingu, O kũu ikĩro-inĩ cia matua ma cira marĩa marũngĩrĩru;

Andũ arĩa manyendete ngamatongia na igai rĩa goro, Na ngaiyũrĩrĩria mĩthithũ yao.

Yahweh nĩegĩrĩire na niĩ ndĩ kĩambĩrĩria kĩa njĩra yake, Ndĩ wa mbere biũ harĩ maũndũ ma tene mũno marĩa aahingirie.

Ndathondekirwo o mahinda ma tene, kuuma kĩambĩrĩria, mbere ya thĩ gũkorũo kuo.

Ndaciarirũo rĩrĩa gũtaarĩ maria-inĩ kũu kũriku, Rĩrĩa gũtaarĩ ithima ciyũrĩrĩirũo nĩ maĩ.

Mbere ya irĩma gũtobererio, Mbere ya tũrĩma tũgĩe kuo, nĩrĩo ndaciarirũo,

Rĩrĩa ataathondekete thĩ na ithaka ciayo Kana rũkũngũ rũa mbere rwa tĩri wa thĩ.

Rĩrĩa aahaaragĩrĩria igũrũ, niĩ ndarĩ ho; Rĩrĩa aathanire atĩ maĩ na kũu kũriku mũno metindagie,

Hĩndĩ ĩrĩa aarũmirie matu marĩa marĩ igũrũ, Rĩrĩa aathondekire matherũkĩro ma kũndũ kũrĩa kũriku agĩtũma marũme biu,

Rĩrĩa eekĩrĩire iria mĩhaka, Atĩ maĩ ma rĩo matikanakĩre harĩa athanĩte, Rĩrĩa aathanire atĩ mĩthingi ya thĩ ĩgĩe kuo,

Hĩndĩ ĩyo niĩ twarĩ hamwe nake ndĩ mũruti wĩra njorua ũhĩgĩrĩire wĩra-inĩ wake. Nĩ niĩ aakenagĩra mũno mũthenya o mũthenya; Nĩ ndakenaga ndĩ mbere Yake hĩndĩ ciothe;

Nĩ ndakenagio nĩ thĩ yake ya gũtũũrũo, Na kĩrĩa kĩangenagia mũno nĩ ariũ a andũ.

Na rĩu ciana ciakwa-rĩ, thikĩrĩriai; Kũrathimwo nĩ andũ arĩa marũmagĩrĩra njĩra ciakwa.

Thikĩrĩriai ũtaaro nĩguo mũũhĩge, Menyai gũkaaũrega.

Kũrathinwo nĩ mũndũ ũrĩa ũũthikagĩrĩria, Mũthenya o mũthenya agaikaraga eiguĩte e hau ihingo-inĩ ciakwa, Na agatungataga e hau itugĩ-inĩ cia mĩrango yakwa;

Nĩ gũkorwo mũndũ ũrĩa wothe ũnjethete akagĩa na niĩ nĩ akagĩa na muoyo, Na nĩ arĩgĩagĩra na ũtugi kuuma kwĩ Yahweh.

No ũrĩa wagararĩte watho wakwa nĩ kwĩguraria egurarĩtie we mwene. Arĩa othe mathũire nĩ gĩkuũ mendete.”