Thimo 7

Mũrũ wakwa, rũmagĩrĩra ciugo ciakwa, Na ũige maathani makwa ta arĩ mũthithũ.

Rũmagĩrĩra maathani makwa nĩguo ũtũũre muoyo; Gitagĩra ũrutani wakwa o ta kĩũma kĩa riitho rĩaku.

Moherere ciara-inĩ ciaku; Maandĩke kĩhengere-inĩ kĩa ngoro yaku.

Ĩra ũũgĩ atĩrĩ, “Wee ũrĩ mwarĩ wa maitũ,” Na wĩte ũtaũku “mũndũ wa mbarĩ citũ,”

Nĩguo ikũgitagĩre kuuma harĩ mũka ũcio wa kwene, Kuuma harĩ mũka ũcio wa kũngĩ o na ciugo ciake nyoroku.

Ndĩ ndirica-inĩ ya nyũmba yakwa, Nĩ ndacũthĩrĩirie mĩanya-inĩ ya ndirica ngĩrora thĩ,

Na rĩrĩa nderoragĩra andũ arĩa mataarĩ na ũmenyo, Nĩ ndonire kĩmwana kĩmwe gĩtaarĩ na wĩcirio gatagatĩ-inĩ ka andũ ethĩ.

Gĩkĩgerera barabara-inĩ hakuhĩ na kona ya kwa mũndũ mũka ũcio, Na gĩgĩthiĩ kĩerekeire nyũmba-inĩ yake

Hwaĩ-inĩ, gũkĩgĩa mairia, Kũrĩ hakuhĩ gũtuka na kũgĩa nduma.

Ngĩcoka ngĩona mũndũ-wa-nja agĩthiĩ gũgĩtũnga, Ehumbĩte ta mũmaraya, arĩ na ngoro ya ũhinga.

Nĩ mũka warĩ na mbĩrĩrĩka na mũng’athia. Gũtirĩ hĩndĩ akindagĩria mũciĩ gwake.

Rĩmwe arĩ nja, rĩrĩa rĩngĩ arĩ ihaaro-inĩ cia mũingĩ, Ohagĩria andũ kona-inĩ ciothe.

Akĩnyita kĩmwana kĩu na agĩkĩmumunyania; Agĩcoka agĩkĩĩra ũũ atekũigua thoni:

“Ndĩna ndĩa ya igongona rĩa ũiguano. Ũmũthĩ nĩ hingirie mĩĩhĩtwa yakwa.

Na nĩkĩo ndaumagara ngũtũnge, Ndoka gũgũcaria, na nĩ ndakuona!

Nĩ njarĩte ũrĩrĩ wakwa macuka marĩa mega, Ma gatani ya marangi maingĩ kuuma Misiri.

Nĩ njitĩrĩirie ũrĩrĩ wakwa manemane, thubiri, o na mũndarathini.

Ũka twĩnyotore na wendo o nginya rũcinĩ; Nĩ twĩkenie na wendo mũnene,

Nĩ gũkorũo mũthuri wakwa ndarĩ mũciĩ; Nĩ athiĩte rũgendo kũndũ kũraya.

Arathiire akuuĩte mũhuko wa mbeca, Na agaacoka o mũthenya ũrĩa mweri ũgaakorũo ũrĩ mũgima.”

Agĩkĩiguithia kĩmwana kĩu mũno na ndeto ciake nyoroku cia uuhi nginya gĩkĩhenerereka.

Nakĩo o hĩndĩ ĩyo gĩkĩrũmĩrĩra mũndũ mũka ũcio, o ta ndegwa ĩgĩthiĩ gũthĩnjwo, O ta kĩrimũ kĩũra matũ gĩgĩthiĩ kũherithio kĩna bĩngũ,

O nginya gĩthecwo ini nĩ mũguĩ; O ta nyoni ĩgĩteng’era ĩtonye mũtego-inĩ, Ĩndĩ kĩmwana kĩu gĩtiamenyire atĩ ũndũ ũcio nĩ ũgũtũma kĩũrũo nĩ muoyo wakĩo.

Na rĩu inyuĩ ciana, thikĩrĩriai; Tegai matũ mũigue ciugo ciakwa.

Ndũkanareke ngoro yaku ĩgarũrũke ĩrũmĩrĩre njĩra ciake. Ndũkanatuĩke wa kwangaga ũkĩmũrũmĩrĩra,

Nĩ gũkorũo nĩ agũithĩtie andũ aingĩ arĩa atihie, ĩĩni, nĩ ang'eete njamba nyingĩ karaũ.

Nyũmba yake yerekagĩria o Mbĩrĩra-inĩ; Ĩthiaga o nginya tũnyũmba twa thĩinĩ twa gĩkuũ.