Thimo 6

Mũrũ wakwa, angĩkorũo nĩ ũneanĩte kĩndũ gĩa kũrũgamĩrĩra thiirĩ wa mũndũ ũngĩ, Angĩkorũo nĩ ũgeithĩtie mũgeni na guoko mũkarĩkanĩra ũndũ nake,

Angĩkorũo ũndũ ũrĩa wĩranĩire nĩ ũgũtegete, Ũkanyitwo nĩ ciugo cia kanua gaku,

Ĩka atĩrĩrĩ mũrũ wakwa, nĩguo wĩteithũre, Tondũ nĩ ũgũĩte guoko-inĩ kwa mũndũ ũcio: Thiĩ wĩnyihie na ũthaithe mũndũ ũcio na ihenya.

Ndũkareke maitho maku makome, Kana imone ciaku icũnge.

Wĩteithũre ta thiya kuuma guoko-inĩ kwa mũhĩti, Ta nyoni kuuma guoko-inĩ kwa mũtegi wa nyoni.

Thiĩ kũrĩ thigiriri, wee kĩgũũta gĩkĩ; Wĩrorere njĩra ciayo nĩguo ũũhĩge.

O na gũtuĩka ndĩkoragwo na mũtongoria, kana mũnene, kana mwathi,

Nĩ ĩhaaragĩria irio ciayo hĩndĩ ya ũrugarĩ, Na ĩgacokanĩrĩria kando kayo hĩndĩ ya magetha.

Wee kĩgũũta gĩkĩ, ũgũkoma hau nginya rĩ? Ũrĩũkĩra rĩ ũtigane na toro ũcio waku?

Gũkomakoma hanini, gũcũnga hanini, Gũkũnja moko hanini nĩguo ũhurũke,

Gũgũtũma ũthĩni waku ũũke o ta mũtunyani, Na wagi waku ũũke ta mũndũ ũrĩ na matharaita.

Mũũra-huhu-rĩ, mũndũ mwaganu athiaga akĩaragia mĩario ya ũrathoni.

Oinagĩra andũ riitho, akonanĩrĩria na kũgũrũ, na akorota na ciara ciake.

Tondũ ngoro yake nĩ ruurugĩ rũiyuire kuo, Hĩndĩ ciothe abangaga maũndũ moru na agatheremia ngũĩ.

Nĩ ũndũ ũcio, mwanangĩko wake ũgooka aterĩgĩrĩire; Akoinangwo o rĩmwe ũndũ atangĩhona.

Nĩ harĩ maũndũ matandatũ Yahweh athũire; O na nĩ maũndũ mũgwanja onaga marĩ magigi:

Maitho ma ngũrũ, rũrĩmĩ rũrĩa rũheenanagia, moko marĩa maitaga thakame ĩtarĩ na mahĩtia,

Ngoro ĩrĩa ĩbangaga njama cia waganu, na magũrũ marĩa mateng’eraga na ihenya ũũru-inĩ,

Mũira wa maheeni ũtumũraga na mathaara, Na mũndũ wothe ũhandaga ngũĩ gatagatĩ-inĩ ka andũ a ithe ũmwe.

Mũrũ wakwa, rũmagĩrĩra rĩathani rĩa thoguo, Na ndũkanatigane na ũrutani wa maitũguo.

Ohagĩrĩra maũndũ macio ngoro-inĩ yaku hĩndĩ ciothe; Mohagĩrĩre ngingo-inĩ yaku.

Rĩrĩa ũgũthiĩ, nĩ marĩgũtongoragia; Rĩrĩa wakoma, nĩ marĩkũrangagĩra; Na rĩrĩa wokĩra, nĩ marĩkwaragĩria.

Tondũ rĩathani nĩ tawa, Na watho nĩ ũtheri, Namo motaaro ma kũrũnga mũndũ nĩ njĩra ya muoyo.

Nĩ marĩkũgitagĩra kuuma harĩ mũtumia ũrĩa mũũru, Kuuma harĩ rũrĩmĩ rũnyoroku rwa mũka ũcio mũgeni.

Ndũkanerirĩrie ũthaka wake ngoro-inĩ yaku Kana wĩtĩkĩre akũgũgwatie na imone cia maitho make,

Nĩ gũkorũo mũmaraya atũmaga mũndũ mũrũme atigwo athĩnĩte nginya aahoyage kenyũ ka mũgate, No mũka mũtharia akoragwo akĩguĩma muoyo wene, arĩ guo kĩndũ kĩa goro mũno.

Hihi mũndũ no acokanĩrĩrie mwaki gĩthũri-inĩ gĩake na nguo ciake ciage kũhĩa?

Kana hihi mũndũ no agere igũrũ rĩa makara mahiũ na makinya make mage kũhĩa?

Ũguo noguo gũthiaga harĩ mũndũ wothe ũkomaga na mũtumia wa mũndũ ũngĩ; Gũtirĩ mũndũ ũhutagia mũtumia ũcio ũkaaga kũherithio.

Andũ matimenaga mũici Angĩiya nĩguo arĩe ahũne rĩrĩa arĩ mũhũtu.

No rĩrĩa anyitwo, arĩhaga maita mũgwanja; Aneanaga indo ciothe cia goro cia nyũmba yake.

Mũndũ wothe ũtharagia na mũtumia ndakoragwo na wĩcirio; Mũndũ ũrĩa wĩkaga ũguo erehagĩra mwanangĩko we mwene.

Kĩrĩa akoona no nguraro na thoni, Na gĩconoko gĩake gĩtikeherio.

Nĩ gũkorũo ũiru nĩ ũtũmaga mũthuri arakare mũno; Ndagaakorũo na ũcayanĩri hĩndĩ ĩrĩa akerĩhĩria.

Gũtirĩ marĩhi agetĩkĩra; Ndakahoorerio, o na ũngĩkorũo na kĩheo kĩnene atĩa.