Thimo 5

Mũrũ wakwa, thikĩrĩria ũũgĩ ũyũ wakwa. Ndegera gũtũ ũigue ũtaũku wakwa,

Nĩgetha ũgitagĩra ũgerereri waku wa maũndũ. Na mĩromo yaku ĩrangagĩre ũmenyo.

Tondũ mĩromo ya mũndũ mũka ũrĩa wa kwene ĩtaataga ũũkĩ, Na kanua gake nĩ kanyoroku gũkĩra maguta.

No marigĩrĩrio-inĩ akoragwo arũrĩte o ta mũtathia. Na akohĩga o ta rũhiũ rwa njora rũnooretwo mĩena yerĩ.

Magũrũ make maikũrũkanagia gĩkuũ-inĩ. Makinya make matongoragia ĩmwe kwa ĩmwe nginya thĩinĩ wa Mbĩrĩra.

Ndecũranagia ũhoro wa njĩra ya muoyo. Njĩra ciake njagaagu, We ndũĩ na kũrĩa cierekeire.

Rĩu inyuĩ ciana, thikĩrĩriai Na mũtikahutatĩre maũndũ marĩa ndĩroiga na kanua gakwa.

Ikaraga haraya mũno nake; Ndũgakuhĩrĩrie mũromo wa nyũmba yake,

Ndukanae kũhe andũ gĩtĩo kĩa riri waku, Kana ũnenganĩre mĩaka yaku harĩ ũcio ũtarĩ tha;

Nĩguo ageni matikeehũnie hinya waku. Na indo iria ũnogeire ithiĩ nyũmba-inĩ ya mũndũ wa kũngĩ.

Waga gwĩka ũguo, nĩ ũgaacakaya mũthia-inĩ wa ũtũũro waku Rĩrĩa nyama cia mwĩrĩ waku o hamwe na mwĩrĩ waku igakorwo ithirĩrĩkĩire.

Nawe uugage, Wũii! “Na nĩguo ndathũire kũrũngwo! Na nĩguo ngoro yakwa yamenete gũkaanio!

Ndiekĩrĩire kĩene mũgambo wa ataarani akwa Kana ngĩtegera arutani akwa gũtũ.

Na o kahinda-inĩ gatarĩ kĩene, ngĩingĩria waganu-inĩ wothe, o ngĩonagwo ndĩ Kĩũngano-inĩ, o na gĩkundĩ-inĩ.”

Nyuaga maĩ ma itahĩro rĩaku mwene Na ũnyuage maĩ marĩa mathereraga moimĩte gĩthima-inĩ gĩaku mwene.

Ithima ciaku-rĩ, hihi nĩ ciagĩrĩire kũhurunjũka na kũu nja, Na njũũĩ ciaku cia maĩ ihurunjũke barabara-inĩ cia mũingĩ?

Reke ikoragwo irĩ ciaku wiki, No ti ciaku hamwe na ageni arĩa mwĩnao.

Itherũkĩro rĩaku mwene rĩrorathimwo, Na ũrokenaga hamwe na mũhiki ũcio wa wanake waku,

Anga ũcio ndakĩhaana ta thwariga thaka nyendeku ya mũgoma, na ta gathiya ka mũgoma karĩa kega. Reke nyondo ciake itũmage ũiganĩre mahinda-inĩ mothe. Ũkagucagĩrĩrio nĩ rwendo rwake hingo ciothe.

Mũrũ wakwa, nĩ kĩĩ kĩngĩgĩtũma ũgucĩrĩrio ũtahwo nĩ mũka ũcio mũgeni? Kana ũhĩmbĩrie gĩthũri kĩa mũka ũcio wa kũngĩ?

Nĩ gũkorũo mĩthiĩre ya mũndũ ĩ maitho-inĩ ma Yahweh; Nĩ ataranagia ikĩro ciake ciothe.

Mũndũ ũrĩa mwaganu nĩ agwatĩtio nĩ mahĩtia make mwene, Na akoohwo nĩ mĩkwa ya mehia make mwene.

Agaakua tondũ ndeetĩkĩrire kũrũngwo Na akahĩtia njĩra nĩũndũ wa ũrimũ wake kũingĩha.