Thimo 4

Ciana ciakwa thikĩrĩriai rĩrĩa thoguo aramũrũnga; Tegai matũ nĩguo mũgĩe na ũtaũku,

Nĩ gũkorũo nĩ ndamũheire ũtaaro mwega; Mũtikanatiganĩrie Watho wakwa.

Ndarĩ mwana harĩ baba, O mwana mwende, na ndarĩ itote maitũ akĩnyona.

Baba aandutire akĩnjĩra atĩrĩ: “Ngoro yaku ĩrorũmia ciugo ciakwa biũ. Menyagĩrĩra Maathani makwa nĩguo ũthiĩ na mbere gũtũũra muoyo.

Etha ũũgĩ-ũrĩa-wa-ma! Etha na ũtaũku! Ndũkanariganĩrũo, na ndũkanahutatĩre ũhoro ũyũ wa kanua gakwa.

Menya gũkanatigana na mũndũ-wa-nja ũcio wĩtagwo Ũũgĩ-ũrĩa-wa-ma, reke akũgitagĩre. Mwendage, na nĩ arĩkũrangagĩra.

Kĩambĩrĩria kĩa ũũgĩ-ũrĩa-wa-ma nĩ rĩ: Nĩ kũweetha! Na warĩkia kwĩgĩĩra na ũũgĩ ũcio wa ma, weethe ũtaũku!

Mũtũũgĩrie, nake ũreke akwambatĩrie. Nĩ arĩkũrehagĩra riri warĩkia kũmũhĩmbĩria.

Nĩ arĩkũhumbaga thũmbĩ ng’emu ya mahũa mũtwe; Nĩ arĩkugitagĩra na thũmbĩ ya ũthaka.”

Mũrũ wakwa, igua na wĩtĩkĩre ciugo ciakwa, Nĩguo ũgĩtũme mĩaka ya ũtũũro waku ĩkĩingĩhe.

Nĩ ngũtaarĩte ngakuonereria njĩra ya ũũgĩ ũrĩa wa ma; Ngagĩkwerekeria mĩthiĩre-inĩ ĩrĩa mĩerekereru.

Rĩrĩa ũgũthiĩ, makinya maku matirĩhĩngĩcagwo; Na rĩrĩa wateng’era, ndũrĩhĩngagwo.

Rũmia ũtaaro; ndũkanareke mũndũ-wa-nja ũcio wĩtagwo Ũũgĩ-ũrĩa-Wa-Ma akweherere. Mũgitĩre, nĩ gũkorũo niwe muoyo waku.

Ndũkanatonye gacĩra-inĩ ka andũ arĩa aganu, Na ndũkanagerere njĩra-inĩ ya andũ oru.

Mĩĩtheme, ndũkanamĩgerere; Mĩhutatagĩre, ũkehĩtũkĩra.

Nĩ gũkorũo matingĩona toro matekĩte ũndũ mũũru. Nĩ kũũrwo moragwo nĩ toro mangĩkorwo matatũmĩte mũndũ agũe.

O nĩ marĩte mũgate wa waganu, Na makanyua ndibei ya ũhinya.

No njĩra ya ũthingu-inĩ ĩhaana ta ũtheri wa rũcinĩ gũgĩkĩa.

Njĩra ya andũ arĩa aganu ĩtariĩ ta nduma; Matimenyaga kĩrĩa kĩmahĩngaga.

Mũrũ wakwa, kĩigue ciugo ciakwa; Tegera gũtũ na kinyi mĩario yakwa.

Ndũkanareke ĩthenge maitho-inĩ maku; Mĩige ngoro-inĩ yaku thĩinĩ biũ ũmĩmenyagĩrĩre.

Nĩ gũkorũo ĩyo nĩ muoyo harĩ arĩa magĩaga nayo Na nĩ kĩhonia kĩa mĩĩrĩ yao yothe.

Makĩria ma indo iria ciothe ũgitagĩra, gitagĩra ngoro yaku, Nĩ gũkorũo thĩinĩ wayo nĩkuo ihumo cia muoyo irĩ.

Ingata ũcio wĩna mĩario mĩogomu ehere haria ũrĩ, Nake ũcio wĩna mĩario ya ũraathoni-rĩ, reke akoragũo haraya nawe.

Maitho maku ta merekagĩrie o na mbere, Nacio imone ciaku ũcirorie o na mbere tu.

Baaraga wega mĩthiĩre yaku, Nacio ng'endo ciaku ciothe nĩ irĩgacagĩra.

Ndũkanehũke na mwena wa ũrĩo kana wa ũmotho. Garũra kũgũrũ gwaku kuume ũũru-inĩ.