Thimo 3

Mũrũ wakwa, ndũkanariganĩrũo nĩ Watho wakwa, Na ngoro yaku nĩ ĩrũmagĩrĩre Maathani makwa,

Tondũ nĩ megũkuongerera matukũ maingĩ Hamwe na mĩaka ya gũtũũra muoyo na ũgĩe na thayũ.

Ndũkanareke ũtugi na Ũhoro Wa Ma igũthame. Cioherere ngingo-inĩ yaku; Ciandĩke kĩhengere-inĩ kĩa ngoro yaku;

Nawe weka ũguo ũkĩyonagĩre wega wa Yahweh na ũgataũkĩrwo we Maitho-inĩ ma Kĩhoti na ma andũ.

Wĩhokage Yahweh na ngoro yaku yothe, Na ndũgetiranagie na mbuguĩro yaku mwene.

Ikaraga ũmũmenyete mĩthiĩre-inĩ yaku yothe, Nake nĩ arĩkũrũngagĩra njĩra ciaku ciothe.

Ndũkaneyone ta wĩ mũũgĩ maitho-inĩ maku mwene. Wĩtigagĩre Yahweh na wĩthemage maũndũ marĩa moru.

Ũndũ ũcio nĩ ũrĩhonagia mũkonyo waku Na ũigũ wa mahĩndĩ maku.

Tĩithagia Yahweh na indo ciaku, Ũmũtĩage na maciaro ma mbere ma umithio waku wothe;

Na hĩndĩ ĩyo makũmbĩ maku nĩ marĩiyũraga bũthi, Nacio irũrĩ ciaku cikaiyũrĩrĩra ndibei ya mũhihano.

Mũrũ wakwa, ndũgatirike kũrũngwo nĩ Yahweh Na rĩrĩa warũithio nĩwe, ndũkamene ũndũ ũcio,

Nĩ gũkorũo Yahweh arũithagia andũ arĩa endete, O ta ũrĩa ithe wa mũndũ arũithagia mũriũ ũrĩa akenagio nĩwe.

Kũrathimwo nĩ mũndũ ũrĩa wĩyoneire ũũgĩ-ũrĩa-wa-ma, Na mũndũ ũrĩa ũgĩaga na ũtaũku;

Amu wonjoria waguo nĩ mwega gũkĩra wonjoria wa betha, Naguo umithio waguo ũgakĩrũka wa thahabu therie mũno.

Mũndũ-wa-nja ũcio wĩtagwo Ũũgĩ-ũrĩa-Wa-Ma e bata gũkĩra ruru iria ndune; We gũtirĩ kĩndũ ũngĩĩrirĩria kĩngĩgerekanio nake.

Ũraihu wa matukũ ũrĩ guoko-inĩ gwake kwa ũrĩo; Ũtonga na gĩtĩo irĩ guoko-inĩ gwake kwa ũmotho.

Njĩra ciake irĩ o maũndũ ma kuiguithia mũndũ wega, Na tũcĩra twake tuothe no twa thayũ.

Nĩ mũtĩ wa muoyo harĩ arĩa mamwĩgwatagĩra, Na arĩa megũtũra mamwĩnyitĩire marĩtuĩkaga andũ arathime.

Yahweh atũmire thĩ ĩhande na ũũgĩ ũcio wake Wa Ma, Aahandire igũrũ akĩrĩrũmia na ũtaũku ũcio wake.

Kũgerera ũmenyo wake maĩ ma kũrĩa kũriku nĩ maagayũkanire icunjĩ icunjĩ Namo matu nĩ matatagia ime.

Mũrũ wakwa, ndũkanareke maũndũ maya mathenge maitho-inĩ maku. Gitagĩra ũũgĩ ũrĩa mũkinyanĩru na ũgerereri wa maũndũ;

Hĩndĩ ĩyo irĩtuĩkaga cia gũtũũria roho waku muoyo, Na ituĩke ithaga rĩa kũgemia ngingo yaku;

Nawe ũgĩthiagĩre njĩra-inĩ yaku ũrĩ na ũgitĩri, Na gũtirĩ hĩndĩ kũgũrũ gwaku gũkaahĩngwo.

Rĩrĩa wakoma, ndũrĩkoragwo na guoya; Ũrĩkomaga, na toro waku ũgakorũo ũrĩ mwega.

Ndũrĩĩtigagĩra kĩmakania o gĩothe kĩa hinahi Kana mwanangĩko wa arĩa aganu hĩndĩ ĩrĩa woka.

Tondũ Yahweh arĩkoragwo e mwena-inĩ waku; Nĩ arĩmenyagĩrĩra kũgũrũ gwaku gũtikagwatio nĩ mũtego.

Ndũkanage gwĩka maũndũ mega andũ arĩa mabataire gwĩkĩrwo maũndũ mega, Angĩkorũo guoko gwaku kwĩ na ũhoti wa gwĩka ũguo.

Ndũkanere mũndũ ũcio mũrigainie atĩrĩ, “Thiĩ, ũũke hĩndĩ ĩngĩ! Nĩ ngaakũhe kĩrĩa ũrenda rũciũ,” Angĩkorũo no ũhote kũmũhe ihinda-inĩ rĩu.

Ndũkanabange gwĩka mũndũ ũcio mũrigainie ũũru, Kuona atĩ mũtũranĩtie nake atarĩ na ũndũ angĩĩgigima.

Ndũkahiũranie na mũndũ tũhũ, Angĩkorũo hatirĩ ũndũ mũũru agwĩkĩte.

Ndũkanerirĩrie gũtũkia mũndũ mũtoi, Menya kũrũmĩrĩra mũthiĩre o na ũmwe wake,

Amu mũrathoni ũcio nĩ kĩndũ kĩ magigi harĩ Yahweh, No we Yahweh agĩaga ndundu ya ũtaari na arĩa arũngĩrĩru.

Kĩrumi kĩa Yahweh gĩkoragwo harĩ nyũmba ya mũndũ ũrĩa mwaganu, No nĩ arathimaga mũciĩ wa mũndũ ũrĩa mũthingu.

Nĩ gũkorũo hatarĩ nganja Yahweh nĩ anyũrũragia arĩa manyũrũranagia, Naguo wega wake agakinyĩria arĩa menyihagia.

Arĩa mena ũũgĩ-ũrĩa-wa-ma igai rĩao nĩ riri, No arĩa irimũ ngatho ciao no njono!