Thimo 13

Mwana ohĩgaga nĩ ũndũ wa ũtaaro wa ithe, No mũndũ wa kĩnyũrũri ndathikagĩrĩria akĩrũngwo.

Mũndũ nĩ arĩrĩaga kĩndũ kĩrĩa kĩega kiumanĩte na maciaro ma kanua gake, No andũ arĩa makunyanagĩra meriragĩria maũndũ ma ũhinya.

Mũndũ ũrĩa ũmenyagĩrĩra kanua gake nĩ muoyo wake agitagĩra, No mũndũ ũrĩa ũtumũraga mĩromo yake mũno nĩ akaanangĩka.

Kĩgũũta nĩ gĩkoragwo na merirĩria makĩo, no gĩtikoragwo na kĩndũ, No mũndũ ũrĩa ũrĩ kĩyo nĩ kũnorio arĩnoragio.

Mũndũ ũrĩa mũthingu nĩ athũire ũhoro wa kũhenania, No mũndũ mwaganu ee kĩheera kĩũru na nĩ gũconoka aconokaga.

Ũthingu nĩguo ũgitagĩra mũndũ mũkinyanĩru ee njĩrainĩ ya Yahweh, No waganu nĩ ũng'aũranagia ũcio mwĩhia.

Nĩ kũrĩ mũndũ wĩtuaga gĩtonga, no ndakoragwo na kĩndũ; Nĩ kũrĩ ũngĩ wĩtuaga ta mũthĩni, no akoragwo na ũtonga mũingĩ.

Gĩkũũri kĩa muoyo wa mũndũ nĩ ũtonga wake, No ũrĩa mũkĩa ndathikagĩrĩria agĩkanio.

Ũtheri wa andũ arĩa athingu nĩ ũcangararaga, No tawa wa andũ arĩa aganu nĩ ũkaahorio.

Mwĩĩkĩrĩro ũrehaga o ngũĩ, No ũũgĩ wa ma ũkoragwo na andũ arĩa maiguaga ũtaaro.

Ũtonga ũtarĩ wa kĩhoto ũikaraga o ũkĩnyiihaga, No ũtonga wa mũndũ ũrĩa ũcokanagĩrĩria na moko make nĩ ũingĩhaga.

Ũndũ ũrĩa wĩrĩgĩrĩirũo ũngĩtĩrio mũno nĩ ũtũmaga ngoro ĩrũare, No ũndũ ũrĩa wĩrirĩirio ũngĩkinyanĩra nĩ mũtĩ wa muoyo.

Mũndũ o wothe ũnyararaga ũrutani ndagaakorũo na moimĩrĩro mega, No mũndũ ũrĩa ũtĩĩte Rĩathani nĩ arĩgwataga ngerenwa.

Ũrutani wa mũndũ ũrĩa mũũgĩ nĩ kĩhumo kĩa muoyo, Nĩ ũgarũraga mũndũ kuuma mĩtego-inĩ ya gĩkuũ.

Ũtaũku mwega nĩ ũtũmaga mũndũ etĩkĩrĩke, No njĩra ya andũ arĩa makunyanagĩra ĩrĩ moritũ maingĩ.

Mũndũ wothe ũtuĩrĩtie ũndũ wega ekaga maũndũ na ũmenyo, No kĩrimũ nĩ gũtandamũra gĩtandamũraga ũrimũ wakĩo.

Mũtũmwo mwaganu agũaga thĩna-inĩ, No mũrekio mwĩhokeku arehaga kĩhonia.

Mũndũ o wothe ũtatindanagĩra na ũtaaro nĩ athĩnaga na akanyitwo nĩ gĩconoko, No mũndũ ũrĩa wĩtĩkagĩra kũrũngwo nĩ atũũgagĩrio.

Ũndũ ũrĩa ũrerirĩrio wakinyanĩra nĩ ũkoragwo na cama harĩ mũndũ, No kwĩhũgura ũtigane na ũndũ mũũru, arĩa akĩgu monaga ta arĩ ũndũ wĩ magigi.

Mũndũ ũrĩa ũtwaranaga na andũ arĩa ogĩ nĩ arĩũhĩgaga, No mũndũ ũrĩa ũthiaga thiritũ na irimũ nĩ arĩonaga ũũru.

Ũũru ũthingataga andũ arĩa ehia, No arĩa athingu nĩ kũrĩhwo marĩhagwo na maũndũ mega.

Mũndũ ũrĩa mwega nĩ atigagĩra ciana cia ciana ciake igai, No ũtonga wa mũndũ ũrĩa mwĩhia ũigĩtwo wĩ mũhoohio wa arĩa athingu.

Mũgũnda ũngĩrĩmĩka wa mũthĩni no ũrute irio nyingĩ, Ĩndĩ no ihaatwo cieherio nĩ wagi wa matua ma cira marũngĩrĩru.

Ũrĩa wothe ũgiragĩrĩria rũthanju rwake nĩ athũire mũrũ wake, No ũrĩa ũmwendete nĩ kũmwetha amwethagĩrĩra na njĩra ya kũmũrũnga.

Mũndũ ũrĩa mũthingu arĩaga nginya akaigania, No nda ya mũndũ ũrĩa mwaganu ndĩonaga o na kĩ.