Thimo 14

Mũndũ-wa-nja wothe mũũgĩ kũna nĩ gwaka akĩte nyũmba yake, No ũrĩa mũkĩgu amĩmomoraga na moko make mwene.

Mũndũ ũrĩa ũthiaga na mĩthiĩre ya ũrũngĩrĩru nĩ etigĩrĩte Yahweh, No ũrĩa ũthiaga na mĩthiĩre mĩogomu nĩ amũnyararĩte.

Rũthanju rwa mwĩtĩo rũkoragwo kanua-inĩ ga kĩrimũ, No mĩromo ya andũ arĩa ogĩ nĩ ĩrĩmagitagĩra.

Kũndũ kũrĩa gũtarĩ ndegwa mũharatĩ ũkoragwo ũrĩ mũtheru, No hinya wa ndegwa nĩ ũrehaga ũmithio mũingĩ.

Mũira mwĩhokeku ndaragia mathaara, No mũira wa ũrongo gũtumũka gwake no maheeni aitũrũraga.

Mũndũ wa kĩnyũrũri acaragia ũũgĩ no ndawonaga, No ũmenyo nĩ wonekaga na njĩra hũthũ harĩ mũndũ ũrĩa ũrĩ na ũtaũku.

Ehera ũikare haraya na kĩrimũ, Tondũ ndũĩkũrana ũmenyo kuuma ĩromo-inĩ ciakĩo.

Ũũgĩ wa mũndũ mũbarĩrĩri nĩ gũtaũkĩrwo nĩ njĩra ya Yahweh, No ũrimũ wa arĩa matarĩ mbuguĩro nĩ wara wa kũhenania.

Irimũ cionaga gũkorũo ihĩtĩtie ta arĩ o ithaako, No harĩ andũ arĩa arũngĩrĩru, gũkoragwo wega wa Yahweh.

Ngoro nĩyo ĩmenyaga ruo rwayo, Na gũtirĩ mũndũ ũngĩ ũngĩnyitanĩra nayo gĩkeno-inĩ kĩayo.

Nyũmba ya andũ arĩa aganu nĩ yanangagwo, No hema ya andũ arĩa arũngĩrĩru nĩ ĩgaacagĩra.

Kũrĩ njĩra yonekaga ĩrĩ njagĩrĩru harĩ mũndũ, No marigĩrĩrio-inĩ mayo nĩ njĩra ya gĩkuũ.

O na hĩndĩ ya gũtheka, ngoro no ĩkorũo na ruo, Na gĩkeno kĩu no kĩrĩkĩrĩrie na kieha.

Mũcoki na thutha ngoro-inĩ yake aiganĩire nĩ mĩthiĩre yake, No mũndũ ũrĩa mwega nĩ ahũnagio nĩ maũndũ ma na igũrũ.

Mũndũ ũrĩa ũtarĩ na ũmenyeru etĩkagia kiugo o gĩothe, No ũrĩa wĩna ũbarĩrĩri nĩ ecũranagia ikinya o rĩothe.

Mũndũ mũũgĩ nĩ etigagĩra na akagarũrũka agatigana na ũndũ mũũru, No ũrĩa ũtarĩ mbuguĩro ndamakagio nĩ ũndũ na ndaiguaga o na akanio.

Mũndũ ũtetagĩrĩra nĩ ekaga maũndũ na ũrimũ, Nake ũrĩa ũthugundaga waganu nĩ athũirwo.

Andũ arĩa matarĩ ogĩ marĩgayaga o ũrimũ, No andũ ara mahumbagwo thũmbĩ ya ũmenyo.

Andũ arĩa oru no mũhaka makaainamĩrĩra andũ arĩa ega, Nao arĩa aganu nĩ makaainamĩrĩra ihingo-inĩ cia andũ arĩa athingu.

Mũndũ mũthĩni amenagwo nginya nĩ andũ arĩa marigainie nake, No mũndũ ũrĩa mũtongu akoragwo na arata aingĩ.

Mũndũ ũrĩa ũnyararaga mũndũ ũrĩa marigainie nĩ kwĩhia ehagia, No ũrĩa ũcayagĩra arĩa matarĩ hinya kaĩ akoragwo e ũmũrathimeĩ!

Na githĩ andũ arĩa mabangaga maũndũ moru matikĩũraga njĩra? No ũtugi na ũhoro wa ma ikinyagĩra arĩa mathugundaga maũndũ mega.

Wĩra-inĩ wothe nĩ harĩ na ũguni, No mĩario mĩtheri ĩrehaga wagi.

Thũmbĩ ya arĩa oogĩ nĩ ũtonga wao; No ũrimũ wa arĩa matarĩ mbuguĩro no ũrimũ mũtheri.

Mũira wa ma nĩ ahonokagia mĩoyo, No mũira ũtumũkaga maheeni nĩ mũkunyanĩri.

Thĩiniĩ wa wĩtigĩri Yahweh kwĩ mwĩhoko mũnene, Na ciana ciake ĩkagĩa ha kũũrĩra.

Gwĩtigĩra Yahweh nĩ itherũkĩro rĩa muoyo, Nĩ kũgarũraga mũndũ kuuma mĩtego-inĩ ya gĩkuũ.

Kĩrĩndĩ kĩnene nĩkĩo riri wa mũthamaki, No mwathi ũtarĩ na andũ a gwatha nĩ mwanangĩku.

Mũndũ ũkiragĩrĩria akoragwo na ũtaũku mũnene, No ũrĩa wa ngoro hiũ atũgagĩria ũrimũ.

Ngoro ĩgaacĩrĩte nĩ ĩheaga mwĩrĩ muoyo, No ũiru nĩ kĩoria kĩa mahĩndĩ.

Ũrĩa ũhinyagĩrĩria andũ arĩa athĩni nĩ Mũũmbi wake airaga, No ũrĩa Ũmũtĩĩte acayagĩra arĩa athĩni.

Mũndũ ũrĩa mwaganu arĩtungumanagio thĩ nĩ ũũru wake mwene, No ũrĩa mũthingu, hĩndĩ yake ya gũkua, akoragwo ena irahĩro.

Ũũgĩ ũikaraga ũhooreire ngoro-inĩ ya mũndũ ũrĩa ũkoragwo na ũtaũku, Ĩndĩ gatagatĩ-inĩ ka andũ arĩa akĩgu no nginya wĩmenyithanie.

Ũthingu nĩ ũtũũgagĩria rũrĩrĩ, No mehia nĩ gĩconoko harĩ kĩrĩndĩ kĩa andũ.

Mũthamaki nĩ akenagio nĩ ndungata ĩrĩa ĩkaga maũndũ na ũtaũku, No erekagĩria mang’ũrĩ make kũrĩ ndungata ĩrĩa ĩkaga maũndũ ma thoni.