Thimo 15

Icokio ihooreru nĩ rĩeheragia mang’ũrĩ, No njinũ nĩ gũthombotha ithombothaga marakara.

Rũrĩmĩ rwa andũ arĩa ogĩ rũtũmaga ũmenyo ũgĩe cama, No kanua ka irimũ gatothoraga o ũrimũ.

Maitho ma Yahweh makoragwo kũndũ guothe, Magacũthagĩrĩria andũ arĩa oru o na arĩa ega.

Rũrĩmĩ rwĩna ciugo cia kũhonania nĩ mũtĩ wa muoyo, No rũrĩa rwĩna mĩario ya ũũra thoni nĩ gũthutha rũthuthaga ngoro.

Kĩrimũ kĩagagĩra ũtaaro wa ithe bata, No mũndũ ũrũmbũyagia akĩrũithio atuĩkaga mũbaarĩrĩri.

Mũciĩ wa mũndũ mũthingu ũkoragwo wĩ mũthithũ mũnene, No ũmatho wa mũndũ mwaganu no mĩtangĩko mĩtheri.

Mĩromo ya andũ arĩa ogĩ ĩtheremagia ũmenyo, No tiguo ngoro ya mũndũ mũkĩgu ĩkaga.

Igongona rĩa arĩa aganu nĩ kĩndũ kĩrĩ magigi harĩ Yahweh, No mahoya ma andũ arĩa arũngĩrĩru nĩ mamũkenagia.

Njĩra ya arĩa aganu nĩ kĩndũ kĩ magigi he Yahweh, No nĩ endete mũndũ ũrĩa ũthingataga ũthingu.

Ũtaaro nĩ igũtha inene harĩ ũrĩa ũtiganĩirie njĩra ya Yahweh, No mũndũ wothe ũthũire kũrũngwo nĩ akuaga.

Mbĩrĩra na kũrĩa kwĩ mwanangĩko ciĩ he Yahweh. Githĩ ndakĩonaga o na makĩria ngoro cia ariũ a andũ!

Mũndũ wa kĩnyũrũri ndendete mũndũ ũrĩa ũramũrũnga. O na ndacaragia ũtaaro kũrĩ andũ arĩa ogĩ.

Ngoro ngenu nĩ ĩtũmaga gĩthiithi kĩa mwene gĩthere, No ruo rwa ngoro nĩ rũhehenjaga roho.

Ngoro ya ũcio mũtaũku nĩ ĩcaragia ũmenyo, No kanua ka andũ arĩa akĩgu karĩaga ũkĩgu.

Matukũ mothe ma mũndũ ũranyamarĩka nĩ moru, No mũndũ ũrĩ na ngoro njanjamũku akoragwo na ndĩa hĩndĩ ciothe.

Kaba kĩndũ kĩnini hamwe na gwĩtigĩra Yahweh, Gũkĩra ũtonga mũnene hamwe na mĩtangĩko.

Kaba kũrĩa nyeni harĩa harĩ na wendo Gũkĩra kũrĩa ndegwa norie harĩa harĩ na rũmena.

Mũndũ wa kũrakara na ihenya athothoraga ngũĩ, No mũndũ mũkirĩrĩria nĩ ahooragĩria ngarari.

Njĩra ya kĩgũũta ĩtariĩ ta rũgiri rwa mĩigua, No njĩra ya andũ arĩa arũngĩrĩru nĩ ta barabara njaraganu.

Mwana mũũgĩ nĩ atũmaga ithe akene, No mũndũ kĩrimũ nĩ anyararaga nyina.

Ũrimũ nĩ gĩkeno harĩ mũndũ ũtarĩ wĩcirio, No mũndũ ũrĩ na ũtaũku nĩ kũrũnga erũngagĩra mũgendere wake.

Mĩbango nĩ ĩthararaga hangĩaga ũtaaro, No ataarani oogĩ nĩ matũmaga mĩbango ĩkinyanĩre.

Mũndũ nĩ akenagio nĩ macokio ma kanua gake, Na kiugo kĩarĩtio ihinda rĩrĩa rĩagĩrĩire-rĩ, kaĩ nĩ kĩega-ĩ!

Njĩra ya muoyo nĩ ya naigũrũ harĩ mũndũ ũrĩa ũrĩ na ũtaũku, Nĩguo ahũndũke aume nakũu thĩ Mbĩrĩra-inĩ.

Yahweh nĩ amomoraga nyũmba ya andũ arĩa etĩi, Nĩwe ũhandaga mũhaka wa mũtumia wa ndigwa.

Meciria ma waganu nĩ kĩndũ kĩ magigi harĩ Yahweh, No ciugo njega ikoragwo irĩ theru.

Mũndũ ũrĩa ũkorokagĩra uumithio ũtarĩ wa kĩhooto arehagĩra nyũmba yake thĩna, No mũndũ ũrĩa ũthũire mahaki nĩ egũthiĩ na mbere gũtũũra muoyo.

Ngoro ya mũndũ mũthingu nĩ ĩĩcũranagia ĩtanacokia, No kanua ka andũ arĩa aganu gaitũrũraga maũndũ moru.

Yahweh akoragwo haraihu mũno na andũ arĩa aganu, No nĩ aiguaga mahoya ma andũ arĩa athingu.

Maitho makengu nĩ matũmaga ngoro ĩkene; Ndũmĩrĩri njega yakinya ĩtũmaga mahĩndĩ maiyũre tombo.

Gũtũ kũrĩa gũthikagĩrĩria ikanania rĩrĩa rĩrehanagĩra muoyo gũikaranagia hamwe na andũ arĩa ogĩ.

Mũregi gũtaarwo nĩ mwĩmeni we mwene, No ũrĩa ũthikagĩrĩria akĩrũngwo nĩ agĩaga na ũtaũku.

Gwĩtigĩra Yahweh nĩkuo ũtaari ũrĩa wĩkanagĩra ũũgĩ wa ma, Na gũtĩo gũtongoragio nĩ wĩnyihia.