Thimo 16

Mũndũ nĩwe ũhaaragĩria meciria ma ngoro yake, No Yahweh nĩwe macokio ma rũrĩmĩ.

Njĩra ciothe cia mũndũ cionekaga irĩ njagĩrĩru maitho-inĩ make mwene, No Yahweh athimaga maaroho.

Rekagĩrĩria Yahweh mawĩko maku, Na mĩbango yaku nĩ ĩrĩgaacagĩra.

Yahweh nĩ atũmire indo ĩgĩe kuo ihingie muoroto wake, O na andũ arĩa aganu nĩ ũndũ wa mũthenya ũrĩa wa ũũru.

Mũndũ wothe ũrĩ ngoro ya ngũrũ nĩ kĩndũ kĩrĩ magigi harĩ Yahweh. Gĩa na ma atĩ! ona mangĩnyitana moko ndakaaga kũherithio.

Kũgerera ũtugĩ na ũhoro wa ma, mehia nĩ mahumbagĩrũo, Na nĩ ũndũ wa gwĩtigĩra Yahweh, mũndũ nĩ agarũrũkaga agatigana na maũndũ moru.

Rĩrĩa Yahweh akenio nĩ njĩra cia mũndũ, Nĩ atũmaga nginya thũ cia mũndũ ũcio cikaranie nake na thayũ.

Kaba gũkorũo na kenyũ kanini na ũthingu Gũkĩra uumithio mũnene gũtarĩ matua ma cira marũngĩrĩru.

Mũndũ nĩ athugundaga njĩra yake ngoro-inĩ yake, No Yahweh nĩwe ũtongoragia makinya make.

Mwĩhĩtwa ũkoragwo iromo-inĩ cia mũthamaki; Kanua-inĩ gake gatikanoneke wagarari wa matua ma cira marũngĩrĩru.

Kĩgeri kiega o na ratiri nĩ cia Yahweh; Na mahiga me mondo, marĩa na gũthima ciothe nĩ wĩra wake.

Nĩ ũndũ wĩ magigi athamaki kwĩhia, Nĩ gũkorũo gĩtĩ kĩa ũnene gĩikaraga kĩrũmĩte nĩ ũndũ wa ũthingu.

Mĩario ya ũthingu nĩyo ĩkenagia athamaki. Nĩ mendete ũrĩa waragia ndeto nũngĩrĩru.

Mang’ũrĩ ma mũthamaki matariĩ ta mũrekio wa gĩkuũ, No mũndũ ũrĩa mũũgĩ nĩ amahooragĩria.

Gũthererwo gĩthiithi nĩ mũthamaki nĩ kũrĩ muoyo; Gũkenerwo nĩwe nĩ ta itu rĩa mbura ĩrĩa ya thutha.

Kaĩ kũgĩa na ũũgĩ wa ma nĩ kwega atĩa gũkĩra kũgĩa na thahabu! Na gũthuura kũgĩa na ũtaũku gũkĩra kũgĩa na betha.

Barabara ya andũ arĩa arũngĩrĩru nĩ kũhũndũka magathema maũndũ marĩa moru. Mũndũ ũrĩa ũmenyagĩrĩra mĩthiĩre yake nĩ muoyo wake agitagĩra.

Mbere ya mwanagĩko nĩ mwĩgatho, Na roho wa ngũrũ ũgoka mbere ya kũgũa.

Kaba gũkorũo ũrĩ na ngoro ĩnyihĩtie gatagatĩ-inĩ ka andũ arĩa athĩĩni Gũkĩra kũgayana indo cia gũtahwo hamwe na arĩa etĩi.

Mũndũ ũrĩa wĩkaga ciĩko cia ũũgĩ ũhoro-inĩ wa Yahweh nĩ arĩgaacagĩra, Na kũrathimwo nĩ mũndũ ũrĩa wĩhokaga Yahweh.

Mũndũ wa ngoro njũhĩgĩrĩru arĩtagwo mũgerereki, Na mĩromo yaragia mĩario ĩĩ mũrio nĩ yongagĩrĩrithagia andũ wĩĩruti.

Ũtaũku nĩ itherũkĩro rĩa muoyo harĩ arĩa makoragwo naguo, No kũrũnga irimũ nĩ ũkĩgu.

Ngoro ya mũndũ mũũgĩ nĩ ĩheaga kanua gake ũgerereki, Agakĩyongerera wĩruti iromo-inĩ ciake.

Ciugo njega nĩ ta mũruru wa ũũkĩ, Ũkagĩa mũrio he muoyo wake na nĩ kĩhonia kĩa mahĩndĩ.

Kũrĩ njĩra yonekaga ĩrĩ njagĩrĩru harĩ mũndũ, No marigĩrĩrio-inĩ mayo nĩ njĩra ya gĩkuũ-inĩ.

Ũrĩa wĩnogagia akĩruta wĩra, ekaga ũguo no ũndũ wake mwene Nĩ gũkorũo ng’aragu yake nĩyo ĩmũtindĩkagĩrĩria gũthiĩ na mbere.

Mũũra-huhu athugundaga ũũru; Iromo ciake ĩtariĩ ta mwaki wa gũcina.

Mũndũ mũũra thoni athogaga thogothogo, Na ũcio wa mũhuhu nĩ atigithũkanagia arata a hakuhĩ mũno.

Ũrĩa wendagĩra andũ ũũru aheenagĩrĩria ũrĩa maikaranĩtie Na akamũtwarĩrĩria njĩra-inĩ ĩrĩa ĩtagĩrĩire.

Oinaga riitho akĩbanga maũndũ moru. Oyoyagia mĩromo yake agĩthugunda ũũru.

Mbuĩ nĩ thũmbĩ ya ũthaka Yoonekaga njĩra-inĩ ya ũthingu.

Mũndũ mũkirĩrĩria nĩ akĩrĩte arĩa karaũ, Na nĩ kaba mũndũ ũrĩa ũhotaga gwatha ngoro yake gũkĩra ũrĩa wĩgwatagĩra itũũra.

Mũtĩ ũcukagĩrũo kĩero-inĩ, No itua o rĩothe rĩaguo riumaga kũrĩ Yahweh.