Thimo 17
Kaba kenyũ ka mũgate mũũmũ harĩa he thayũ Gũkĩra nyũmba ĩiyũire mahaki ma ngũĩ.
Ndungata njũgĩ nĩ ĩgaatha mũrũ wa mwathi wayo ũrĩa wĩkaga maũndũ ma thoni; Nĩ ĩkaamũkĩra igai o ta ĩrĩ ũmwe wa ariũ a mwathi wayo.
Nyũngũ ĩtaahagĩrũo betha na kĩrugutĩro nĩ kĩa gũthererio thahabu, Ĩndĩ Yahweh nĩwe ũroragia ngoro.
Mũndũ wĩkaga ũũru ategagĩra gũtũ iromo njaganu, Nake mũndũ wa maheeni athikagĩrĩria rũrĩmĩ rwĩ thuti.
Mũndũ o wothe ũnyũrũragia mũthĩni nĩ Mũũmbi wake airaga, Na ũrĩa ũkenaga rĩrĩa mũndũ ũngĩ ona ndirũ ndakaaga kũherithio.
Thũmbĩ ya athuri akũrũ nĩ ciana cia ciana ciao, Na ũgemu wa ciana nĩ riri wa maithe.
Mĩario mĩrũngĩrĩru ndĩagagĩrĩra kĩrimũ. Nake ũrĩa wĩ ngumo githĩ ndagĩthũkĩirũo o na makĩria nĩ mĩario ya maheeni!
Kĩheo gĩtariĩ ta ihiga rĩa goro harĩ mwene; Harĩa hothe athiaga, nĩ agaacagĩra.
Ũrĩa ũhumbagĩra ihĩtia nĩ wendo acaragia, No mũndũ ũrĩa ũinagĩrĩra ũndũ nĩ atigithũkanagia arata a hakuhĩ.
Irũithia nĩ rĩkoragwo na ũguni mũnene harĩ mũndũ ũrĩa ũrĩ na ũtaũku Gũkĩra njamiũ igana rĩmwe harĩ kĩrimũ.
Mũndũ mũũru acaragia o ũrĩa angĩrema, Kuoguo mũrekio ũtarĩ tha nĩwe ũgaatũmwo nĩguo amũherithie.
Kaba gũcemania na nduba ĩtunyĩtwo twana twayo, Gũkĩra gũcemania na kĩrimũ na ũrimũ wakio.
Mũndũ o wothe angĩrĩha wega na ũũru, Ũũru ndũgathenga nyũmba-inĩ yake.
Kwambĩrĩria mbaara nĩ ta kũhingũrĩra maĩ ma mũiyũro; Kuoguo rigĩrĩriai haaro itanatuthũka.
Ũrĩa ũtuaga atĩ mũndũ mwaganu ndarĩ mahĩtia na ũrĩa ũtuagĩra mũndũ mũthingu atĩ nĩ ahĩtĩtie —Acio eerĩ nĩ kĩndũ kĩrĩ magigi harĩ Yahweh.
Karĩ ũndũ ũrĩkũ ũyũ! Atĩ kĩrimũ gũkorũo na ũhoti wa kũgũra ũũgĩ wa ma Na gĩtirĩ na wĩcirio?
Mũrata onanagia wendo hingo ciothe, Na mũrũ wa nyina na mũndũ aciarĩtwo wa gũteithia hĩndĩ ya mĩnyamaro.
Mũndũ ũtarĩ wĩcirio ageithanagia na guoko na agetĩkĩra kũruta kĩndũ gĩa kũrũgamĩrĩra thiirĩ nĩ ũndũ wa mũratawe.
Ũrĩa wenda kwagarara watho nowe wendete njũgitano. Mũndũ ũtũgagĩria kĩhingo gĩake erehagĩra mwanangĩko.
Mũndũ wa ngoro hotomu ndagaacagĩra, Na ũrĩa waragia ndeto cia ũũra-thoni agũaga ũũru-inĩ.
Ũrĩa ũciaraga kĩrimũ akoragwo na kĩeha tu nĩ ũndu wa ũndũ ũcio; Na ithe wa mwana ũrĩa ũtarĩ mbuguĩro ndakoragwo na gĩkeno.
Ngoro njanjamũku nĩ kĩhonia kĩega, No roho mũthuthĩku nĩ kũng'aria ũng'aragia mahĩndĩ.
Mũndũ mwaganu nĩ amũkagĩra ihaki na hitho Nĩguo ogomie matua ma cira marĩa marũngĩrĩru.
Ũũgĩ ũrĩa wa ma ũrĩ o ũthiũ-inĩ wa mũndũ ũrĩa mũtaukũ, No maitho ma kĩrimũ mariũngaga o nginya ituri-inĩ ciothe cia thĩ.
Mwana kĩrimũ arehagĩra ithe kĩeha Na akaiguithia nyina mũmũciari ruo ngoro.
Kũherithia mũndũ ũrĩa mũthingu ti ũndũ mwega, Na kũhũũra andũ arĩa atĩĩku iboko nĩ ũndũ wa ũrũngĩrĩru wao.
Mũndũ ũrĩ na ũmenyo ndaingĩhagia ndeto, Na mũndũ ũrĩ na ũtaũku nĩ roho ũhoreire.
O na kĩrimũ kĩngĩikara gĩkirĩte kĩrĩonagwo kĩrĩ na ũũgĩ, Na ta kĩũĩ maũndũ gĩaikara gĩtumĩtie mĩromo yakĩo.