Thimo 18

Mũndũ wothe wĩyamũranagia na arĩa angĩ athingataga merirĩria make ma mwĩyendo; Nĩ kũrega aregaga ũũgĩ wothe.

Kĩrimũ gĩtikenagio nĩ ũtaũku; Kĩendaga o kũguũria kĩrĩa kĩrĩ ngoro-inĩ yakĩo.

Rĩrĩa guoka mũndũ mwaganu, kĩnyũrũri o nakĩo nĩ gĩũkaga, Na ũhoro wa njono hamwe na ũmeneku.

Ciugo cia kanua ka mũndũ nĩ maĩ mariku. Itherũkĩro rĩa ũũgĩ nĩ karũũĩ karatherera.

Ti wega gũkorũo na kĩmenyano kwerekera mũndũ ũrĩa mwaganu Kana kũima mũndũ ũrĩa mũthingu itua rĩa cira rĩrĩa rĩrũngĩrĩru.

Iromo cia mũndũ mũkĩgu itonyaga ngũĩ-inĩ, Na kanua gake gakeĩtĩria magũthwo.

Kanua ga kĩrimũ nĩko mwanangĩko wakĩo, Na mĩromo yakĩo nĩ mũtego harĩ muoyo wakĩo.

Ciugo cia mũndũ wa mũhũhũngo itariĩ ta cienyũ cia irio irĩ na cama; Imeragio igaikũrũka o nginya hau ngoro thĩinĩ mũno.

O na atĩ, mũndũ kĩgũũta wĩra-inĩ wake Nĩ mũrũ wa nyina na mwanangi ũrĩa mũthomeru wĩra wega.

Rĩĩtwa rĩa Yahweh nĩ nyũmba ĩ hinya mũthiringo mũrũmu mũno. Arĩa athingu mateng’eraga makaingĩra thĩinĩ wayo makona ũgitĩri.

Ũtonga wa mũndũ mũtongu nĩ itũũra rĩake rĩĩ hinya; Meciria-inĩ make onaga ũhaana ta rũthingo rũraihu rwa kũmũgitĩra.

Mbere ya mwanangĩko, ngoro ya mũndũ nĩ ĩkoragwo ĩĩgoceete, Na mbere ya gũtĩĩo nĩ wĩnyihia.

Ũrĩa ũcokagia ũndũ atambĩte kũigua ũhoro wothe, Ũcio ũtũĩkaga nĩ ũrimũ na ũndũ wa kũmũconorithia.

Roho wa mũndũ nĩ ũmũtũũragia muoyo rĩrĩa e mũrũaru, No rĩrĩ, nũũ ũngĩhota gwĩtiiria roho mũthuthĩku?

Ngoro ya mũndũ ũrĩ na ũtaũku nĩ ĩgĩaga na ũmenyo, Na gũtũ kwa andũ ogĩ nĩ gũcaragĩrĩria ũmenyo.

Kĩheo kĩa mũndũ nĩ kĩmũhingũragĩra njĩra; Nĩ kĩmũteithagia gũkinyĩra andũ arĩa marĩ igweta.

Mũndũ wa mbere kũrehe thitango yake onekaga ta araria ma, O nginya rĩrĩa ũcio ũngĩ arĩũka amũthuthurie.

Gũcuka mĩtĩ nĩ kũniinaga ngarari, Na gũgatuithanagia makaraũ.

Mũndũ kũiguithia mũrũ wa ithe rĩrĩa arakarĩte nĩ ũndũ mũritũ gũkĩra kwĩgwatĩra itũũra rĩrĩ na ũgitĩri, Na nĩ kũrĩ ngucanio itariĩ ta mĩgĩĩko ĩrĩa ĩhingaga njera.

Nda ya mũndũ nĩ ĩrĩhũnagio nĩ maciaro ma kanua gake; Nĩ arĩhũnagio nĩ umithio wa mĩromo yake.

Rũrĩmĩ nĩ rũrĩ ũhoti wa kũrehe gĩkuũ kana muoyo; Na arĩa marwendete marĩrĩaga maciaro maruo.

Mũndũ ũrĩa ũgĩĩte na mũtumia nĩ agĩĩte na kĩndũ kĩega, Nĩ atugĩĩtwo nĩ Yahweh.

Mũndũ mũkĩa nĩ athaithanaga rĩrĩa araria, No gĩtonga gĩcokagia ũhoro na mũgoromoko.

O na mũndũ wĩ arata aingĩ no matũme anangĩke athire biũ, No nĩ kũrĩ Mwendwa Ũmwe ũnyitanaga na mũndũ gũkĩra mũrũ wa nyina.