Thimo 24

Ndũkanaigue ũiru nĩ ũndũ wa andũ arĩa mekaga maũndũ moru, Na ndũkanerirĩrie thiritũ yao,

Tondũ ngoro yao ĩĩcũranagia maũndũ ma kwananga, Na mĩromo yao ĩkaria ndeto cia kũnyarira andũ.

Na njĩra ya ũũgĩ wa ma nyũmba ĩgagĩakwo Naguo ũtaũku nĩ ũtũmaga ĩĩhande.

Ũmenyo nĩ ũtũmaga rumu ciayo ciyũre Mĩthemba yothe ya mĩthithũ ya goro na mĩega.

Mũndũ mũũgĩ nĩ akoragwo na hinya, Na ũmenyo nĩ ũteithagia mũndũ kuongerera hinya ũcio wake

Mũndũ arũaga mbara ena ũtaaro wa ũũgĩ Na ataarani aingĩ nĩ matũmaga kũgĩe na ũgitĩri.

Ũũgĩ wa ma ũrĩ igũrũ mũno handũ ũtangĩkinyĩrĩka nĩ kĩrimũ, Gĩtikoragwo na ũndũ wa kuuga kĩhingo-inĩ gĩa itũũra.

Mũndũ wothe ũthugundaga maũndũ moru Arĩtagwo muungumania.

Rĩciria rĩa ũrimũ nĩ rĩhia, Na ũrĩa wa kĩnyũrũri nĩ kĩndũ kĩ magigi andũ-inĩ.

Ũngĩringĩka hĩndĩ wa ũgwati, Hinya waku ũkoragwo ũrĩ mũnini.

Ũngĩĩrigithia wage kũhonokia arĩa matuĩrĩirwo gũkua, Na wage gũthara arĩa maratũgũga merekeire gĩthĩnjĩro-rĩ,

Ũcoke kuga atĩrĩ, “Ithuĩ tũtiroĩ ũhoro ũcio,” Githĩ Ũrĩa ũthimaga ngoro ndegwĩcũũrania ũndũ ũcio na amenye atĩ nĩ wa maheni? Ti itherũ, kaĩ ũrĩa ũmenyagĩrĩra muoyo waku atekũmenya ũndũ ũcio? Na nĩ kũrĩ hingo atakaarĩha o mũndũ kũringana na ciĩko ciake?

Mũrũ wakwa, rĩa ũũkĩ, tondũ nĩ mwega; O naguo mũũruru tondũ ũrĩ mũrĩo ũkĩũcamacama.

Ũndũ ũmwe na ũguo, ũmenyo wa ũũgĩ wa ma nĩ mwega harĩ muoyo waku. Ũngĩwona, nĩ ũgaakorũo na ngerenwa, Na kĩĩrĩgĩrĩro gĩaku gĩtigatemwo kĩhukio.

Wee kĩmaramari gĩkĩ! Tiga gũcemerera nyũmba ya mũndũ mũthingu; Na ndũkanathũkie handũ hake ha kũhurũka.

Nĩ gũkorũo mũndũ mũthingu no agũe maita mũgwanja, o agĩũkĩraga, No arĩa aganu mahĩngagwo makagũa ũũru-inĩ.

Rĩrĩa thũ yaku yagũa, ndũgakenerere, Na rĩrĩa yahĩngwo-rĩ, ndũkarekage ngoro yaku ĩcanjamũke.

Na hihi Yahweh one ũndũ ũcio ta arĩ mũũru, Na eherie marakara make kuuma harĩ thũ ĩyo.

Ndũgatangĩkage nĩ ũndũ wa andũ arĩa mekaga maũndũ moru; Ndũkaigue ũiru nĩ ũndũ wa andũ arĩa aganu,

Tondũ mũndũ wothe wĩkaga maũndũ moru ndarĩ na mwĩhoko wa mahinda mokĩte; Tawa wa andũ arĩa aganu nĩ kũhorio ũhoragio.

Mũrũ wakwa, wĩtigĩre Yahweh na mũthamaki. Na ndũkanyitanagĩre na mĩgarũ,

Nĩ gũkorũo kwanangwo kwao kumagĩra o rĩmwe. Nũũ ũĩ mwanangĩko ũrĩa acio eerĩ makaarehe?

Ciugo ici o nacio nĩ cia andũ arĩa ogĩ: Gũkorũo na mũthutũkanio ciira-inĩ ti ũndũ mwega.

Mũndũ wothe wĩraga ũrĩa mwaganu atĩrĩ, “Wee ũrĩ mũthingu,” Nĩ arĩrumagwo nĩ irĩndi cia andũ na akanyararwo nĩ ndũrĩrĩ.

No maũndũ nĩ marĩthiaga wega harĩ arĩa mamũrũngaga; Nĩ marĩgĩaga na irathimo cia maũndũ mega.

Mũndũ ũcoketie ũhoro ũrĩa kwagĩrĩire, no ta amumunyana mũndũ iromo.

Amba ũtue mwako waku wĩ na kũu nja, na ũhaarĩrie wega wĩna kũu gĩthaka-inĩ; Ũcoke wake nyũmba yaku.

Ndũkanarute ũira ũgĩthitanga mũndũ ũrĩa mũrigainie hatarĩ gĩtũmi. Ndũkanahũthĩre mĩromo yaku kũheenania.

Ndũkanoige atĩrĩ: “Ngũmwĩka o ta ũrĩa anjĩkire; Ndĩhaga o mũndũ kũringana na ũrĩa ekĩte.”

Ndahĩtũkĩire mũgũnda-inĩ wa mũndũ kĩgũũta, Mũgũnda-inĩ wa mĩthabibũ wa mũndũ ũtarĩ wĩcirio:

Ngĩona atĩ waiyũrĩte ria rĩa mĩigua; Tĩri wahumbĩrĩtwo nĩ thabai, Na rũthingo rwaguo rwa ihiga nĩ rwamomokete.

Ngĩĩrorera ũndũ ũcio na ngĩwĩcũrania ngoro-inĩ yakwa; Ngĩwona na ngĩĩruta ũndũ ũyũ:

Gũkomakoma hanini, gũcũnga hanini, Gũkũnja moko hanini nĩguo ũhurũke,

Gũgũtũma ũthĩni waku ũũke o ta mũtunyani, Na wagi waku ũgũka ũtegũtigithĩria. Na ũbataro waku ta mũndũ ũrĩ na matharaita.