Thimo 25
Ici o nacio nĩ thimo cia Suleimani, iria ciakobirio nĩ andũ a Hezekia mũthamaki wa Yahuda:
Nĩ ũndũ ũtĩithagia Kĩhoti kũiga ũndũ ũrĩ hitho, Naguo riri wa athamaki nĩ gũtuĩria ũndũ biũ.
O ta ũrĩa igũrũ rĩraihĩte na igũrũ, nayo thĩ ĩkarika, No taguo ngoro ya athamaki ĩtangĩtuĩrĩka.
Eheria gĩko kuuma harĩ betha, Nakĩo kĩndũ gĩkeyumĩria he mũruguti.
Eheria mũndũ ũrĩa mwaganu kuuma harĩ mũthamaki, Nakĩo gĩtĩ kĩa mũthamaki kĩa ũnene nĩ gĩkwĩhanda wega na njĩra ya ũthingu.
Ndũgetũũgĩrie wĩ mbere ya mũthamaki, Na ndũkarũgame harĩa hathondekere arĩa marĩ igweta,
Tondũ nĩ kaba we akwĩre atĩrĩ, “ambata ũke haha,” Gũkĩra ũharũrũkio mũkĩonanaga maitho kwa maitho na ũcio wĩ igweta.
Ndũkanahĩkĩke gũthiĩ ngucanio-inĩ, Tondũ ũgeeka atĩa thutha-inĩ rĩrĩa mũndũ ũcio mũrigainie agagũconorithia?
Wĩtetere mũrĩ o na mũndũ ũcio mũrigainie tu, No ndũkaguũrie ũndũ wa mũndũ ũngĩ ũrĩa werĩirũo hitho-inĩ,
Nĩguo mũndũ ũrĩa ũkũũigua ndagagũconorithie, Naguo ũtheremie ũhoro waku mũũru ũreme kwehereka.
O ta matunda ma thahabu marĩ tũtiti-inĩ twa betha No taguo kiugo kĩrĩa kĩarĩtio hĩndĩ ĩrĩa yagĩrĩire gĩtariĩ.
O ta gĩcũhĩ gĩa thahabu na ithaga rĩa thahabu ĩrĩa njega No taguo ikania rĩa mũtaarani mũũgĩ rĩtariĩ harĩ gũtũ kũrĩa gwĩtĩkagĩra gũthikĩrĩria.
O ta ũhehu wa mbarabu hĩndĩ ya magetha No taguo mũtũmwo mwĩhokeku atariĩ harĩ arĩa mamũtũmĩte, Tondũ nĩ acanjamũraga muoyo wa mwathi wake.
O ta matu na rũhuho iria itarehaga mbura No taguo mũndũ ũrĩa wĩrahaga na maheni igũrũ rĩgiĩ ĩheo.
Na njĩra ya weetereri mũtongoria nĩ agucagĩrĩrio agetĩkĩre ũndũ, Na rũrĩmĩ ruororo rũhehenjaga ihĩndĩ.
Nĩ wonete ũũkĩ?, rĩa o ũrĩa ũrabatara, Ndũgakĩrĩe ũhũne ũkĩrie, ũũtahĩke.
Gitia makinya maku gũceraga kaingĩ mũciĩ kwa mũndũ ũrĩa mũrigainie, Nĩguo ndakanogio nĩwe na agũthũũre.
O ta ndotono na rũhiũ rwa njora na mũguĩ mũnoore wega No taguo mũndũ ũrĩa ũrutaga ũira wa maheeni wĩgiĩ ũrĩa maakanĩtie atariĩ.
O ta igego riunĩku kana kũgũrũ gũcomoku harĩa gũkoragwo, No taguo kwĩhoka ũcio mũgarũ mũkunyanĩri hĩndĩ ya ũgwati gũtariĩ.
O ta mũndũ ũrĩa ũtunyanaga nguo kwĩna heho Na o ta thiki ĩitĩrĩirio igata-inĩ No taguo mũndũ ũrĩa ũinagĩra mũndũ ũrĩ na ngoro nditũ nyĩmbo atariĩ.
Thũ yaku ĩngĩkorũo ĩhũtiĩ, mĩhe mũgate ĩrĩe; Ĩngĩkorũo ĩnyotiĩ, mĩhe maĩ ĩnyue,
Tondũ ũgũkorũo ũkĩmĩigĩrĩra makara mahiũ mũtwe, Nake Yahweh nĩ egũkũhe ngerenwa.
Rũhuho rwa mwena wa rũgongo rũrehaga mbura, Naruo rũrĩmĩ rwa njukũ rũtũmaga ũthiũ ũthimbe.
Nĩ kaba gũtũũra nyũmba igũrũ handũ kona-inĩ Gũkĩra gũtũũra nyũmba ĩmwe na mũtumia wa kĩmbĩmbĩ.
O ta maĩ mahehu harĩ mũmero mũng'aru No taguo riboti njega kuuma bũrũri wa kũraya ĩtariĩ.
Gĩthima kiunjuge! Itherũkĩro rĩthũkie! No taguo mũndũ mũthingu ũrĩa ũterũmagia harĩ arĩa aganu atariĩ.
Ti wega kũrĩa ũũkĩ mũingĩ makĩria, O na ti ũndũ wa gĩtĩĩo mũndũ gwĩcarĩria riri wake mwene.
O ta itũũra rĩanangĩku, rĩtarĩ na rũthingo, Ũguo nĩguo mũndũ ũrĩa ũtahotaga gwatha roho wake atariĩ.