Thimo 26
O ta mbarabu hĩndĩ ya ũrugarĩ na mbura hĩndĩ ya magetha, No taguo gĩtĩo gĩtagĩrĩire mũndũ mũkĩgu.
O ta ũrĩa nyoni yangangaga, nayo thũngũrũrũ ĩkeerera No taguo kĩrumi gĩtarĩ gĩtũmi.
Kĩboko nĩ kĩa mbarathi, matamu nĩ ma ndigiri, Naruo rũthanju nĩ rwa mũgongo wa irimũ.
Ndũgacokagĩrie kĩrimũ kũringana na ũrimũ wakĩo, Nĩgetha ndũkae kũhaana ta kĩo.
Cokagĩria kĩrimũ kũringana na ũrimũ wakĩo, Nĩgetha gĩtikeone ta gĩ kĩũgĩ.
Ũrĩa ũnenganagĩra ndũmĩrĩri na guoko gwa kĩrimũ, nĩ kũrenga erenga magũrũ, na gwĩkundia ekundia ngero.
O ta magũrũ maniginĩte ma mũndũ muonju, No taguo thimo ĩtariĩ ĩrĩ kanua-inĩ ka andũ ariitu.
O ta mũndũ kuoherera ihiga kĩgũtha-inĩ, No taguo kũhe ũtarĩ mbuguĩro riri gũtariĩ.
O ta ũrĩa mũigua ũthecaga guoko kwa mũrĩĩu, No taguo thimo ĩtariĩ ĩrĩ kanua-inĩ ka andũ akĩgu.
O ta mũikia wa mĩguĩ ũrĩa ũtihagia mũndũ, No taguo ũrĩa ũheaga wĩra kĩrimũ kana mwĩhĩtũkĩri atariĩ.
O ta ngui ĩrĩa ĩcokagĩrĩra matahĩko mayo, O uguo noguo mũndũ ũrĩa mũkĩgu acokagĩra ũkĩĩgu wake.
Hihi nĩ wonete mũndũ wĩciragia atĩ nĩ mũũgĩ? Kwĩ na kĩĩrĩgĩrĩro kĩnene harĩ kĩrimũ gũkĩra mũndũ ũcio.
Gĩthayo kiugaga atĩrĩ: “njĩra-inĩ kwĩ na mũnyambu! Kũrĩ na mũrũthi mũrĩani mũno barabara-inĩ!”
Mũrango ũikaraga ũkĩgarũrũkaga ihocio-inĩ ciaguo, Nakĩo kĩgũũta gĩkaga o ũguo ũrĩrĩ-inĩ wakĩo.
Kĩgũũta kĩrikagia guoko gwakĩo mbakũri-inĩ ya iruga, Ĩndĩ gĩkanoga mũno gũgũcokia kanua-inĩ.
Kĩgũũta gĩĩciragia atĩ nĩ kĩũgĩ gĩkĩyoona, Gũkĩra andũ mũgwanja megũtarana.
O ta mũndũ ũnyitĩte kĩgui matũ, No taguo mwĩhĩtũkĩri ũrĩa wĩtonyagia ngũĩ-inĩ itamũkoniĩ atariĩ.
O ta mũgũrũki ũrĩa ũnyugutaga icinga cia mwaki, mĩguĩ, na gĩkuũ
No taguo mũndũ atariĩ ũrĩa wahenirie mũndũ wa itũra rĩao agacoka akoiga, “No itherũ nyuma narĩo!”
Nĩ ũndũ wa kwaga ngũ, mwaki nĩ kũhora ũhoraga, Nake mũhuhungi aingatwo agwoo, ngũĩ nĩ ithiraga.
O ta ũrĩa makara mathegeagia mangĩ marakana, na o na ngũ cigakania mwaki, No taguo mũndũ wa mahiũrania akagĩrĩria ngũĩ.
Ciugo cia mũndũ wa mũhuhu itariĩ ta cienyũ cia irio irĩ na cama; Imeragio igaikũrũka o nginya tũturi-inĩ twa ngoro thĩinĩ.
O ta betha ĩhakĩtwo igũrũ rĩa gĩcere kĩa nyũngũ No taguo iromo cia kĩgaathi ciumĩte ngoro-inĩ njũru itariĩ.
Mũndũ ũrĩa ũthũire arĩa angĩ ahithaga ũndũ ũcio na mĩromo yake, No thĩinĩ wake akoragwo ahithĩte waara wa gwĩkana ũũru.
O na angĩaria ciugo cia ũtugi atĩa, ndũkamwĩtĩkie, Tondũ thĩinĩ wa ngoro yake kũrĩ na maũndũ mũgwanja marĩ magigi.
O na gũtuĩka rũthũũro rwake rũhumbĩrĩtwo na maheeni, Ũũru wake nĩ ũkoimbũranio kĩũngano-inĩ.
Mũndũ ũrĩa wenjaga irima nĩwe ũkaagũa thĩinĩ warĩo, Na mũndũ wothe ũgaragaragia ihiga akĩrĩeheria, kũhigũka no rĩmũhigũkĩre.
Rũrĩmĩ rũrĩa rũheenanagia nĩ rũthũire arĩa atiihie nĩruo, Nako kanua ga kĩgaathi karehaga mwanangĩko.