Thimo 27

Ndũkerahage nĩ ũndũ wa rũciũ, Tondũ ndũĩ kĩrĩa mũthenya ũngĩrehe.

Reke mũndũ ũngĩ akũgaathĩrĩrie, no ti kanua gaku mwene; Reke andũ angĩ makũgaathĩrĩrie, no ti mĩromo yaku mwene.

Ihiga nĩ iritũ na mũthanga o naguo nĩ mũritũ, No marakara ma kĩrimũ nĩ maritũ gũkĩra icio cierĩ.

Mang’ũrĩ matirĩ tha na marakara matariĩ ta mũiyũro, No rĩrĩ, nũũ ũngĩhota gwĩtiiria ũiru?

Kũrũnga mũndũ ũtekũhithĩrĩra nĩ kwega gũkĩra wendo mũhithanie.

Nguraro cia gwĩkĩrũo nĩ mũrata nĩ cia wĩhokeku, No thũ ĩmumunyaga mũndũ na gĩcacĩ.

Mũndũ mũhũnu nĩ aregaga ũũkĩ wa magua-inĩ, No mũndũ mũhũtu, o na kĩndũ kĩrũrũ aiguaga kĩrĩ na cama.

O ta nyoni ĩrĩa ĩtiganagĩria gĩtara kĩayo ĩgathiĩ kwanganga, No taguo mũndũ ũrĩa ũtiganagĩria gwake atariĩ.

Maguta na ũbumba nĩ itũmaga ngoro ĩigue wega; Na noguo ũtaaro mwega utariĩ harĩ mũrata wa mũndũ.

Ndũkanatiganĩrie mũrata waku kana mũrata wa thoguo, Na ndũkanaingĩre kwa mũrũ wa nyũkwa mũthenya ũrĩa ũũru ũgaagũkora; Kaba mũndũ wa itũũra ũrĩa ũrĩ hakuhĩ gũkĩra mũrũ wa nyina na mũndũ ũrĩa ũrĩ kũraihu.

Mũrũ wakwa, tuĩka mũndũ mũũgĩ, ũkenagie ngoro yakwa, Nĩgetha hotage gũcokeria ũrĩa ũnyũrũragia.

Mũndũ mũũgĩ onaga ũgwati akehitha, No arĩa matarĩ na ũmenyeru mathiaga o na mbere o nginya makaherithio.

Oya nguo ya mũndũ angĩkorũo arutĩte kĩndũ gĩa kũrũgamĩrĩra thiirĩ wa mũgeni; Mĩtue kĩndũ gĩa kũrũgamĩrĩra thiirĩ wa mũka mũgeni.

Mũndũ angĩgeithia mũndũ ũrĩa ũngĩ na mũgambo mũnene rũcinĩ tene, Ũndũ ũcio ũrĩonagwo ũrĩ kĩrumi harĩ we.

Mũtumia wa kĩmbĩmbĩ atariĩ ta matata ma mbura maratatanga nyũmba thĩini mategũtigithĩria.

Mũndũ ũregia kũmũgirĩrĩria no ta kũgeria kũgirĩrĩria rũhuho Na no ta kũgeria gũkumbatĩria maguta manyoroku na guoko gwake kwa ũrĩo.

O ta ũrĩa kĩgera kĩnooraga kĩgera, No taguo mũndũ ohĩgagia ũthiũ wa mũratawe.

Mũndũ ũrĩa ũrũmbũyagia mũkũyũ nĩ akaarĩa maciaro maguo, Na ũrĩa ũgitagĩra mwathi wake nĩ atĩithagio.

O ta ũrĩa mũndũ onaga ũthiũ wake maĩ-inĩ, No taguo ngoro ya mũndũ yonanagia ũrĩa ya mũndũ ĩhaana.

Mbĩrĩra na mwanangĩko itiiganagia, O uguo noguo maitho ma mũndũ gũtirĩ hĩndĩ maiganagia.

Nĩ Nyũngũ ĩtaahagĩrwo betha narĩo irugutĩro nĩ rĩa gũtheria thahabu, No taguo mũndũ aroragio na rũgooco rũrĩa agaathagĩrĩrio naruo.

O na ũngĩhũũra kĩrimũ na mũũthĩ Ta ngano ĩrahũũrĩrũo thĩinĩ wa ndĩrĩ, Gĩtingiumwo nĩ ũrimũ wakĩo.

Nĩ wagĩrĩirũo kũmenya wega ũrĩa rũũru rwaku rũhaana. Rũmbũyagia ng’ondu ciaku na njĩra njega,

Tondũ ũtonga ndũtũũraga tene na tene, O na thũmbĩ ndĩtũũraga njiarũa-inĩ ciothe.

Nyeki nyũmũ nĩ ĩthiraga, gũgakunũka nyeki ĩngĩ ya mũmerano, Namo mahuti ma irĩma-inĩ marĩkia gũtuwo makainũkio-rĩ;

Hĩndĩ ĩyo tũgondu nĩ tũkũonere gĩa kwĩhumba, Nacio thenge ikuonere marĩhi ma mũgũnda;

Na nĩ kũrĩkoragwo na iria rĩiganu rĩa mĩgoma rĩa gũkũhe irio, Rĩa kũigana andu a gwaku, o na gũtũũria ndungata ciaku cia airĩtu.