Thimo 29

Mũndũ ũrĩa ũmagia ngingo yake thutha wa kũrũngwo mũno Akooinwo o rĩmwe ũndũ atangĩhona.

Rĩrĩa andũ athingu maingĩha, andũ nĩ gũkena makenaga, No rĩrĩa mũndũ mwaganu atuĩka mũtongoria, andũ nĩ gũcaya macayaga.

Mũndũ ũrĩa wendete ũũgĩ wa ma nĩ atũmaga ithe akene, No ũrĩa ũthiaga thiritũ na arĩa mahũũraga ũmaraya nĩ aitangaga ũtonga akaũnina.

Mũthamaki ũrĩa ũhũthagĩra matua ma Yahweh ma cira mũrũngĩru nĩ atũmaga bũrũri wĩhande, No mũndũ ũrĩa wamũkagĩra mahaki atũmaga bũrũri wanangĩke.

Mũndũ ũrĩa ũgaathagĩrĩria ũrĩa marigainie gũkĩria njano, Akoragwo akĩambĩra magũrũ make neti.

Mũndũ mũũru ategagwo nĩ wagarari watho, No ũrĩa mũthingu aikaraga agĩkũngũyagia na agacanjamũka.

Mũndũ mũthingu nĩ oĩ ihoya rĩa arĩa athĩni, mũndũ mwaganu ndataũkagĩrwo nĩ ũmenyo.

Anyũrũrania maikagia itũũra mũtego-inĩ, No arĩa ogĩ nĩ gũthengia mathengagia marakara.

Mũndũ mũũgĩ angĩkararania na kĩrimũ, O na anegene kana atheke, gũtionekaga thayũ.

Aiti-thakame nĩ mathũire mũndũ mũkinyanĩru, Na nĩ macaragia ũrĩa mangĩruta andũ arĩa arũngĩrĩru muoyo.

Kĩrimũ gĩitũrũraga marakara makio mothe, No mũndũ ũrĩa mũũgĩ nĩ agakĩhooreria.

Mũtongoria angĩthikĩrĩria maheeni, Ndungata ciake ciothe ituĩkaga andũ aganu.

Mũthĩni na mũhinyanĩrĩria makoragwo na ũndũ ũyũ ũhaanaine: Yahweh nĩwe ũheaga maitho mao eerĩ ũtheri.

Mũthamaki ũrĩa ũtuagĩra arĩa athĩni ciira arũngĩrĩirie na Ũhoro wa ma, Gĩtĩ gĩake kĩa ũnene gĩtũũraga kĩrũmĩte tene tene.

Rũthanju na kũrũithio nĩ itũmaga mũndũ agĩe na ũũgĩ wa ma. No mwana mũrekererie nĩ aconorithagia nyina.

Rĩrĩa andũ aganu mongerereka, wagarari Watho nĩ wongererekaga, No arĩa athingu nĩ makerorera andũ acio makĩgũa.

Rũngaga mũrũguo, nake nĩ arĩtũmaga ũgĩe na ũhurũko; Na nĩ arĩtũmaga ũiguage wega ngoro.

Kũndũ gũtakoragwo na kĩoneki, andũ mekaga maũndũ matekwĩgirĩrĩria, No kũrathimwo nĩ ũrĩa ũmenyagĩrĩra Watho wa Yahweh.

Ndungata ndĩrũngagwo na ciugo theri, Nĩ gũkorũo o na gũtuĩka nĩ ĩtaũkagĩrũo, ndĩathĩkaga.

Hihi nĩ wonete mũndũ ũhiũhaga kwaria? Kwĩ na kĩĩrĩgĩrĩro kĩnene harĩ kĩrimũ gũkĩra mũndũ ũcio.

Ndungata ĩngĩtũnio kuuma ũnyinyi wayo, Thutha-inĩ ĩtuaga ta mũrũwe wa mũmĩathi.

Mũndũ ũhiũhaga kũrakara atũmaga kũgĩe na ngũĩ; Mũndũ wa marũrũ-rĩ, nĩ ehagia maita maingĩ.

Mwĩtĩo wa mũndũ nĩ ũrĩmũnyihagia, No mũndũ wothe mwĩnyihia roho-inĩ nĩ arĩamũkagĩra riri.

Ũrĩa ũgayanaga indo na mũici nĩ kũmena amenete muoyo wake mwene. Aiguaga njama ĩkĩbangwo, na ndamenyithanie.

Gwĩtigĩra mũndũ kũrehaga mũtego, No mũndũ ũrĩa wĩhokaga Yahweh nĩ arĩtũgagĩrio.

Andũ aingĩ methaga ũrĩa mangĩyona na mũtongoria, No matua ma cira marũngĩrĩru maumaga kwĩ Yahweh.

Mũndũ ũtarĩ mũthingu nĩ kĩndũ kĩ magigi harĩ andũ arĩa athingu, Nake ũrĩa ũrũngĩrĩirie njĩra-inĩ ya Yahweh nĩ kĩndũ kĩrĩ magigi harĩ mũndũ ũrĩa mwaganu.