Thimo 30

Ĩno nĩ ndũmĩrĩri ya bata ĩrĩa ĩrĩ ciugo-inĩ cia Aguri mũrũ wa Yaki, ĩrĩa mũndũ ũyũ eerire Ithieli, akĩĩra Ithieli na Ukali.

Niĩ njagĩte ũmenyo gũkĩra mũndũ ũngĩ o wothe, Na ndirĩ na ũtaũku ũrĩa mũndũ agĩrĩirũo gũkorũo naguo.

Niĩ ndiĩrutĩte ũũgĩ ũrĩa wa ma, atĩ nĩguo ngĩe ũmenyo wa Ũrĩa Mwamũre.

Nũũ ũrĩ wambata igũrũ agĩcoka agĩikũrũka? Nũũ wanacokanĩrĩria rũhuho ngundi-inĩ cia moko make? Nũũ wanakũnjania maĩ nguo-inĩ yake? Nũũ wathondekire ituri ciothe cia thĩ? Etagwo atĩa, nake mũrũwe etagwo atĩa—angĩkorũo nĩ ũĩ?

Uuge wothe wa Eloah nĩ mũthuranĩre. We nĩ ngo harĩ arĩa moragĩra harĩ we.

Ndũkongerere ũndũ harĩ ciugo ciake, Ndakae gũkũrũithia, Nawe woneke atĩ ũrĩ mũheenania.

Nĩ harĩ maũndũ merĩ ndĩrakũhoya. Ndũkage kũhingĩria maũndũ macio itanakua.

Eheria ũhoro ũtarĩ wa ma o na maheeni haraihu na niĩ. Ndũkahe ũthĩni kana ũtonga. Reke o ndĩage mũgate ũrĩa ũnjigaine,

Nĩgetha ndikahũne na niĩ ngũkaane njuge atĩrĩ, “Yahweh akĩrĩ we ũũ!” Ningĩ ndũkareke nduĩke mũthĩni o nginya njiye, njonorithie rĩĩtwa rĩa Kĩhoti wakwa.

Ndũkanacambie ndungata harĩ mwathi wayo, Ndĩkanae gũkũgeka nawe woneke ũrĩ na mahĩtia.

Nĩ kũrĩ rũciaro rũgekaga ithe wao Na rũtirathimaga nyina mũmaciari.

Nĩ kũrĩ rũciaro rwĩyonaga rwagĩrĩire maitho-inĩ maruo, No rũtithambĩtio rũkaninĩrwo gĩko kĩaruo.

Nĩ kũrĩ rũciaro naruo-rĩ; Kaĩ maitho maruo me ngũrũ-ĩĩ! Na gũikara rũikaraga rũmonoretie imone cia maitho.

Nĩ kũrĩ cora wĩ magego mahaana hiũ cia njora Na ngambucu ciao itariĩ ta tũhiũ twa gũthĩnja; Cora ũcio ũrambagia arĩa athĩni ũkĩenda mahuke thĩinĩ wa thĩ O na ũkarambia andũ arĩa aagi mathire kĩrĩndĩ-inĩ kĩa andũ.

Thambara ikoragwo na airĩtu erĩ managĩrĩra makoiga atĩrĩ, “Tũhei! Tũhei!” Nĩ kũrĩ indo ithatũ itaiganagia, O na nĩ inya iria itarĩ hĩndĩ ciugaga, “Nĩ ndaigania!”

Mbĩrĩra na nda ĩrĩa thata, Bũrũri mũng’aru ũtahũnaga maĩ, Na mwaki ũrĩa gũtarĩ hĩndĩ uugaga, “Nĩ ndaigania!”

Riitho rĩa mũndũ ũnyũrũragia ithe na akarurũka kũigua nyina —Mahuru ma mũkuru-inĩ nĩ marĩkũũraga, Nacio ciana cia nderi nĩ ikarĩrĩa.

Nĩ kũrĩ maũndũ matatũ ma magegania mũno harĩ niĩ, O na nĩ mana itataũkagĩrũo nĩmo:

Mũgendere wa nderi ĩ rĩera-inĩ, Mũgendere wa nyoka ĩrĩ igũrũ rĩa rwaro rwa ihiga, Mũgendere wa meri ngoro-inĩ ya iria, Na mũgendere wa mũndũ makĩendana na mũirĩtu.

Ũyũ nĩguo mũthiĩre wa mũka mũtharia : Arĩaga na akehuura kanua; Agacoka akoiga atĩrĩ, “Gũtirĩ ũndũ mũũru njĩkĩte.”

Nĩ kũrĩ maũndũ matatũ matũmaga thĩ ĩthingithe O na nĩ mana marĩa ĩtangĩhota gwĩtiiria:

Rĩrĩa ndungata yatuĩka mũthamaki, Rĩrĩa kĩrimũ kĩarĩa kĩahũna,

na mũndũ-wa-nja ũthũirwo arĩkia kũhika, Na rĩrĩa ndungata ya mũirĩtu yoya ithenya rĩa mũtumia ũrĩa ũmĩathaga.

Harĩ indo ici inya cia iria nini mũno thĩinĩ wa thĩ, No nĩ irĩ ũũgĩ mũingĩ makĩria:

Thigiriri ti ciũmbe irĩ hinya, No nĩ ihaaragĩria irio ciacio hĩndĩ ya ũrugarĩ.

Ikami nĩ rũruka rũhũthũ, No nĩ ciakaga nyũmba ciacio ndwaro-inĩ cia mahiga.

Ngigĩ itikoragwo na mũthamaki, No nĩ irũmanagĩrĩra ii mbũtũ.

Mbũmbũĩ ĩĩnyitagĩrĩra na magũrũ mayo merĩ, Na ĩgathiĩ thĩinĩ wa nyũmba ya mũthamaki.

Nĩ kũrĩ indo ithatũ ina mũkinyĩre ũrĩa mũgaacĩru, O na nĩ inya i ngacĩru rĩrĩa irathiĩ:

Mũrũthi, nyamũ ĩrĩa ĩrĩ hinya mũno harĩ iria ingĩ, Na gũtirĩ kĩndũ yeheragĩra;

Ngui ĩrĩa ĩhĩtaga; thenge; Na mũthamaki atongoirie ita ciake.

Angĩkorũo nĩ wĩtũũgĩrĩtie na njĩra ya ũrimũ Kana angĩkorũo nĩ ũthugundĩte gwĩka ũũru, Humbĩra kanua gaku na rũhĩ.

Nĩ gũkorũo o ta ũrĩa kũhũũra iria kũrutaga thiagĩ Nakuo kũhihinya iniũrũ gũgatũmaga aure thakame akĩnunuha, No taguo gũthooria marakara gũciaraga ngũĩ.