Timotheo wa Keerĩ 1

Nĩ niĩ Saũlũ, mũtũmwo wa Messiya Yahshua nĩ ũndũ wa kwenda kwa Yahweh. Ndatũmirwo nĩ Yahweh kũringana na kĩĩranĩro kĩa muoyo ũrĩa ũrĩ thĩinĩ wa Messiya Yahshua,

Ndakwandĩkĩra wee Timotheo, o we mũrũ wakwa nyendete mũno: Wega, na tha, na thayũ kuuma kũrĩ Yahweh Ithe witũ, na Messiya Yahshua Mwathi witũ, irogĩa nawe.

Nĩ njokagĩria Yahweh ngatho, ũrĩa niĩ ndungatagĩra ndĩ na thamiri ĩtarĩ na ũcuke, o ta ũrĩa maithe makwa ma tene meekaga, o ngĩkũririkanaga hĩndĩ ciothe ũtukũ na mũthenya, mahoya-inĩ makwa itegũtigithĩria.

Nĩ ndĩĩriragĩria mũno gũkuona, ndaririkana maithori maku, nĩgetha njiyũrwo nĩ gĩkeno.

Nĩ ndirikanĩtio ũhoro wa wĩtĩkio waku ũrĩa ũtarĩ ũhinga, o ta ũrĩa watũire na cũguo Loisi, na nyũkwa Eunike, na rĩu nĩ njĩtĩkĩtie atĩ wĩtĩkio ũcio ũrĩ o thĩinĩ waku

Nĩ ũndũ wa gĩtũmi gĩkĩ nĩ ngũkũririkania atĩ ũhuhagĩrĩrie kĩheo kĩrĩa ũheetwo nĩ Yahweh, kĩrĩa wagĩire nakĩo rĩrĩa ndakũigĩrĩire moko.

Nĩgũkorwo Yahweh ndaatũheire roho wa gũtwĩkagĩra guoya, no aatũheire roho wa gũtwĩkĩra hinya, na wa wendani, na wa ũũgĩ wa kwĩnyita maũndũ-inĩ mothe.

Nĩ ũndũ ũcio ndũkanaconoke ũkiumbũra ũira wa Mwathi witũ, kana ũconoke nĩ ũndũ wakwa niĩ njohetwo nĩ ũndũ wake. No nyitanĩra na niĩ kũnyarirwo nĩ ũndũ wa Ũhoro-ũrĩa-Mwega, nĩ ũndũ nĩ ũrĩheagwo hinya nĩ Yahweh.

Yahweh nĩwe watũhonokirie na agĩtwĩtĩra mũtũũrĩre mwamũre, ti tondũ wa ũndũ twĩkĩte, no nĩ ũndũ wa ũrĩa aatanyĩte gwĩka na nĩ ũndũ wa wega wake. Twaheirwo wega ũyũ thĩinĩ wa Messiya Yahshua mbere ya kĩambĩrĩria gĩa thĩ,

no wega ũcio rĩu nĩ ũguũranĩirio nĩ ũndũ wa kuonekana kwa Mũhonokia witũ, Messiya Yahshua, ũrĩa waninire gĩkuũ, na akĩrehe muoyo o na ũhoro wa kwaga kũbutha akĩũiga ũtheri-inĩ nĩ ũndũ wa Ũhoro-ũrĩa-Mwega.

Na nĩ ũndũ wa Ũhoro-ũcio-Mwega-rĩ, nĩ ndaamũrirwo nduĩke mũhunjia, na mũtũmwo, na mũrutani waguo.

Ũhoro ũcio nĩguo ũtũmĩte nyamarĩke ũguo. No ndiconokaga, tondũ ũrĩa niĩ njĩtĩkĩtie nĩ ndĩmũũĩ, na ndĩ na ma atĩ arĩ na ũhoti wa kũgitĩra kĩrĩa ndĩmwĩhokeire o nginya rĩrĩa mũthenya ũcio ũgakinya.

Rũmia ũhoro ũrĩa waiguire kuuma kũrĩ niĩ, ũrĩ kĩonereria kĩa ũrutani mwega, ũrĩ na wĩtĩkio na wendani thĩinĩ wa Messiya Yahshua.

Menyerera ũndũ ũrĩa mwega ũrĩa wehokeirwo, na ũũmenyerere ũteithĩtio nĩ Roho Mwamũre ũrĩa ũikaraga thĩinĩ witũ.

Wee nĩ ũũĩ atĩ andũ othe thĩinĩ wa bũrũri wa Asia nĩ mandiganĩirie, o hamwe na Fugelo, na Herimogene.

Yahweh aroiguĩra andũ a nyũmba ya Onesiforo tha tondũ aananyamarũra kaingĩ na ndaconokire nĩ ũndũ wakwa kuohwo na mĩnyororo.

No we, hĩndĩ ĩrĩa ookire Roma, nĩ anjaririe na kĩyo o nginya akĩnyona.

Yahweh aroĩtĩkĩra atĩ akaaiguĩrwo tha mũthenya ũcio wakinya! Wee nĩ ũũĩ wega mũno ũrĩa aandeithirie na njĩra nyingĩ rĩrĩa ndaarĩ Efeso.