Timotheo wa Keerĩ 2

Nĩ ũndũ wa ũguo, wee mũrũ wakwa-rĩ, gĩa na hinya thĩinĩ wa wega-wa-Yahweh ũrĩa ũrĩ thĩinĩ wa Messiya Yahshua.

Namo maũndũ marĩa waiguire ngĩaria mbere ya aira aingĩ-rĩ, mehokere andũ ehokeku arĩa ũũĩ atĩ no mahote kũruta andũ angĩ.

Ũmĩrĩria gũthĩnĩka hamwe na ithuĩ ta ũrĩ mũthigari mwega wa Messiya Yahshua

Gũtirĩ mũndũ ũrutaga wĩra wa mũthigari ũngĩĩohania na maũndũ ma mũtũrĩre ũyũ: we endaga o gũkenia mũnene wake ũrĩa ũmwathaga.

Ũguo no taguo, mũndũ ũrĩa ũhanyũkaga mathako-inĩ ma mahenya ndangĩheo thũmbĩ ya ũhootani atathakĩte kũringana na ũrĩa gwathanĩtwo.

Ningĩ-rĩ, mũrĩmi ũrĩa wĩnogagia akĩrĩma mũgũnda nĩwe wagĩrĩirwo gũtuĩka wa mbere kwamũkĩra maciaro maguo.

Cũranagia maũndũ marĩa ndĩroiga, nĩgũkorwo Yahweh nĩ arĩkũũhĩgagia maũndũ-inĩ macio mothe.

Ririkanaga Yahshua Messiya, ũrĩa wariũkirio akiuma kũrĩ arĩa akuũ, na aarĩ wa rũciaro rwa Daudi, kũringana na Ũhoro-ũrĩa-Mwega, ũrĩa niĩ hunjagia.

Ũhoro ũcio nĩguo niĩ nyariragĩrwo o nginya ngohwo na mĩnyororo ta ndĩ mũgeri ngero. No kiugo kĩa Yahweh ti kĩohe.

Nĩ ũndũ ũcio, niĩ nĩ nyũmagĩrĩria maũndũ mothe nĩ ũndũ wa arĩa aamũre, nĩgetha o nao megĩĩre na ũhonokio ũrĩa ũrĩ thĩinĩ wa Messiya Yahshua, na magĩe na riri wa tene na tene.

Ũhoro ũyũ nĩ wa kwĩhokeka, atĩrĩ: Angĩkorwo nĩ twakuire hamwe nake-rĩ, o na gũtũũra nĩ tũgaatũũra muoyo hamwe nake;

na tũngĩkirĩrĩria-rĩ, o na gũthamaka nĩ tũgaathamaka hamwe nake. No tũngĩmũkaana-rĩ, o nake nĩ agatũkaana;

na tũngĩaga kwĩhokeka, we egũtũũra arĩ o mwĩhokeku, nĩgũkorwo we ndangĩhota gwĩkaana.

Ririkanagia andũ maũndũ macio. Makaanagie ũrĩ mbere ya Yahweh nĩguo matige gũkararanĩria ndeto itarĩ kĩene; ndeto icio itirĩ kĩguni, no gũthũkia ithũkagia arĩa maciiguaga.

Geria mũno wĩonanagie harĩ Yahweh wĩ mwĩtĩkĩrĩku, na wĩ mũruti-wĩra ũtarĩ ũndũ ũngĩmũconora, na ũrutanage ũhoro ũrĩa wa ma ũrũngĩrĩirie.

Ehagĩrĩra mĩario ĩtarĩ ya gwĩtigĩra Yahweh, tondũ arĩa mekenagia na ndeto icio makĩragĩrĩria kwaga gwĩtigĩra Yahweh.

Ũrutani wao ũtheaga ta kĩronda kĩa ndĩĩra. Amwe ao nĩ Humenayo, na Fileto,

arĩa maturuurĩte na magatiga ũhoro wa ma. Moigaga atĩ ũhoro wa kũriũka nĩ ũrĩkĩtie kũhĩtũka, na nĩ mathũkĩtie wĩtĩkio wa andũ amwe.

No rĩrĩ, mũthingi ũrĩa mũrũmu wa Yahweh nĩ wĩhandĩte wega naguo wĩkĩrĩtwo rũũri na ciugo ici: “Yahweh nĩ oĩ andũ arĩa marĩ ake,” na ningĩ atĩrĩ, “Ũrĩa wothe uumbũraga rĩĩtwa rĩa Yahweh no nginya agarũrũke atigane na waganu.”

Thĩinĩ wa nyũmba yothe nene-rĩ, to indo cia thahabu na betha ikoragwo kuo ciiki, no nĩ kũrĩ indo cia mĩtĩ na cia rĩũmba; imwe nĩ cia wĩra ũrĩa mũtĩĩe, na imwe nĩ cia wĩra ũrĩa ũtangĩtĩĩka.

Mũndũ angĩhaata gĩko kĩu gĩothe agĩte atigane na maũndũ macio matangĩtĩĩka, no atuĩke ta kĩndũ gĩa kũruta wĩra wa gĩtĩo, kĩndũ kĩamũre, kĩrĩa kĩagĩrĩire Mwathi wa nyũmba ĩyo na kĩhaarĩirio gĩa kũrutaga wĩra o wothe mwega.

Na rĩrĩ, ũragĩra merirĩria moru ma wĩthĩ, na ũthingatage ũthingu, na wĩtĩkio, na wendani, na thayũ, mũrĩ hamwe na arĩa makayagĩra Yahweh marĩ na ngoro ĩtarĩ ũcuke

Reganaga na ngarari cia ũrimũ na cia arĩa matarutĩtwo wega maũndũ, tondũ nĩ ũũĩ irehage ngũĩ.

Nayo ndungata ya Yahweh ndĩagĩrĩirwo nĩ gũtuĩka ya ngũĩ; handũ ha ũguo, yagĩrĩirwo nĩ gũtuĩka ya gũtuga mũndũ o wothe, na ĩrĩ mũndũ wĩ na ũhoti wa kũrutana, na ĩrĩ mũndũ mũkirĩrĩria

Ningĩ arutage arĩa mamũkararagia ahoreire, arĩ na mwĩhoko atĩ Yahweh no atũme merire, nĩguo mamenye ũhoro wa ma,

na atĩ matuĩke a gwĩcokera, na meteithũkie mũtego-inĩ wa mũcukani ũrĩa ũmanyitĩte mĩgwate nĩguo mekage ũrĩa ekwenda.