Timotheo wa Keerĩ 3
No rĩrĩ, menya atĩ matukũ ma kũrigĩrĩria nĩ gũkagĩa na mahinda ma ũgwati.
Andũ magaatuĩka eyendi, na endi mbeca, na egani, na egathi, na arumi Yahweh, na andũ mataiguaga aciari ao, na matarĩ ngatho, na matarĩ aamũre.
Ningĩ makorwo matarĩ na wendani ũrĩa wa ndũire, na matarekanagĩra, na a gũcambania, na matangĩhota kwĩgirĩrĩria merirĩria ma mwĩrĩ, na matarĩ tha, na matendaga maũndũ mega,
na andũ mendaga gũkunyanĩra andũ arĩa angĩ, na arũgĩrĩri, na eĩkĩrĩri, na endi gwĩkenia gũkĩra ũrĩa mendete Yahweh
Andũ acio metuaga ta meyamũrĩire Yahweh no nĩ makaanaga hinya wake. Wĩthemage andũ ta acio.
Acio nĩo arĩa matonyagĩrĩra nyũmba ciene na makaguucagĩrĩria andũ-a-nja arĩa ahũthũ ngoro, arĩa maiyũrĩtwo nĩ mehia, na arĩa matwaragĩrĩrio nĩ merirĩria moru ma mĩthemba yothe.
No kwĩruta merutaga hĩndĩ ciothe, no matirĩ hĩndĩ mamenyaga ũhoro ũrĩa wa ma.
O ta ũrĩa Janne na Jambare maakararirie Musa-rĩ, no taguo andũ acio mehotoraga makararie ũhoro ũrĩa wa ma. Meciria mao nĩ moru, nao ha ũhoro ũkoniĩ wĩtĩkio nĩ a kũregwo biũ.
No rĩrĩ, matingĩthiĩ haraya, tondũ ũrimũ wao nĩ ũkamenyeka nĩ andũ othe, o ta ũrĩa ũhoro wa andũ acio wamenyekire.
No wee-rĩ, nĩ ũũĩ ũhoro wothe wa ũrutani wakwa, na mũtũũrĩre wakwa, na matanya makwa, na wĩtĩkio wakwa, na ũkirĩrĩria wakwa, na wendani wakwa, na kũũmĩrĩria gwakwa,
na kũnyarirwo gwakwa, na mathĩna makwa, o na mĩthemba ya maũndũ marĩa maangorire kũu Antiokia, na Ikonia, o na Lusitera, mĩnyamaro ĩrĩa niĩ ndomĩrĩirie. No Yahweh nĩ ahonokirie kuuma kũrĩ mathĩna macio mothe.
Ti-itherũ, mũndũ o wothe ũrĩa ũkwenda gũtũũra mũtũũrĩre wa gũkenia Yahweh arĩ thĩinĩ wa Messiya Yahshua nĩ arĩnyariragwo,
No andũ arĩa aaganu na arĩa ahenania nĩ marĩkĩragĩrĩria kwagana, makahenanagia na makahenagio.
No wee-rĩ, tũũra wĩkaga maũndũ marĩa wĩrutĩte na ũkametĩkia wega atĩ nĩ ma ma, tondũ nĩ ũũĩ arĩa maakũrutire,
na ũrĩa wamenyire Maandĩko marĩa Maamũre kuuma rĩrĩa warĩ kaana, marĩa mangĩhota gũkũũhĩgia nĩguo ũkaahonokio nĩ ũndũ wa gwĩtĩkia thĩinĩ wa Messiya Yahshua.
Ũhoro wothe ũrĩa wandĩkĩtwo Maandĩko-inĩ wekĩrirwo thĩinĩ wa mũwandĩki nĩ Yahweh, na nĩ ũrĩ ũguni harĩ ũhoro wa kũrutana, na wa gũkaania andũ, na wa kũrũnga mahĩtia, o na wa kũrutana mĩikarĩre ya ũthingu,
nĩgetha mũndũ wa Yahweh akoragwo arĩ mũkinyanĩru, na athagathagĩtwo biũ kũruta wĩra o wothe mwega.