Timotheo wa Keerĩ 4

Ndagwatha mbere ya Yahweh na Messiya Yahshua, o ũcio ũgaatuĩra arĩa marĩ muoyo na arĩa akuũ, na kũgerera kũguũrio gwake o na Ũthamaki wake:

Hunjia kiugo; ĩka ũguo ũtekũmaĩrĩria mahinda marĩa magĩrĩru o na marĩa maritũ; rũngaga andũ, ũkamakaania, na ũkamataaraga ũrĩ na wetereri wothe o na ũhoti mwega wa kũrutana.

Tondũ nĩ gũkaagĩa na ihinda andũ matagaakirĩrĩria marutwo ũrutani ũrĩa wagĩrĩire, no kũringana na merirĩria mao ene, nĩ makeyũnganĩria arutani a gũkenagia matũ mao

Nĩ magaatiga gũthikĩrĩria ũhoro ũrĩa wa ma na mathikagĩrĩrie ng’ano cia maheni

No wee-rĩ, tũũria ũhoti waku wa gwĩciria maũndũ-inĩ mothe, kiragĩrĩria moritũ, rutaga wĩra wa mũhunjia, ũkĩyonanie kũna ũkinyanĩru wa ũtungati waku.

Nĩ gũkorũo rĩu niĩ ndĩhaarĩirie ndutwo ta igongona, na ihinda rĩakwa rĩa gũthiĩ rĩrĩ hakuhĩ

Nĩ ndũĩte mbaara ĩrĩa njega, nĩ ndeng’erete ihenya nginya mũthia, nĩ nũmĩtie wĩtĩkio.

Kuuma rĩu, kĩrĩa niĩ njigĩirũo nĩ thũmbĩ ya ũthingu, ĩrĩa ngaaheo mũthenya ũcio ĩrĩ kĩheo nĩ Yahshua, o we mũtuanĩri cira mũthingu, no to niĩ nyiki ngaaheo, no nĩ nginya arĩa othe mendete kũguũrio gwake.

Ĩka ũrĩa wothe ũngĩhota ũũke kũrĩ niĩ o na ihenya

Nĩ gũkorũo Dema nĩ aandiganĩirie tondũ nĩ eendire mũtabarĩre ũyũ wa maũndũ ma thĩ, na nĩ athiĩte Thesalonike, Kreseni nake agathiĩ Galatia, nake Tito agathiĩ Dalamatia

Luka wiki nowe ũrĩ hamwe na niĩ. Oya Mariko mũũke nake, tondũ nĩ andeithagia ũtungata-inĩ

No nĩ ndatũma Tikiko athiĩ Efeso

Na ũgĩũka-rĩ, ndehera kabuti karĩa ndatigire gwa Karipo kũu Teroa, na ikũnjo, makĩria iria cia njũa.

Aleksanda ũrĩa mũturi wa indo cia gĩcango nĩ aanjĩkire ũũru mũno. Yahweh nĩ akaamũrĩha kũringana na ciĩko ciake

O nawe nĩ ũrabatara kũmwĩmenyerera, tondũ nĩ aakararirie ndũmĩrĩri itũ na gĩkĩro kĩnene mũno.

Hĩndĩ ĩrĩa ndetetagĩra riita rĩa mbere-rĩ, gũtirĩ mũndũ wokire kũndeithia, othe no kũndiganĩria maandiganĩirie—matikanatuĩrũo nĩ ũndũ wa ũguo

No Yahweh nĩ aarũgamire hakuhĩ na niĩ na akĩnjĩkĩra hinya, nĩguo kũgerera harĩ niĩ, wĩra wa kũhunjia ũhingio biũ na ndũrĩrĩ ciothe ciigue ndũmĩrĩri ĩyo; na nĩ ndahonokirio kuuma kanua-inĩ ka mũrũthi

Yahweh nĩ akaahonokia kuumana na gĩĩko o gĩothe kĩa waganu na aahonokie nĩ ũndũ wa Ũthamaki wake wa igũrũ. We arogĩa na riri tene na tene. Amein.

Ngeithĩria Priska na Akila na nyũmba ya Onesiforo.

Erasito aatigirũo Korintho, no Trofima ngĩmũtiga Mileto arĩ mũrũaru

Ĩka ũrĩa wothe ũngĩhota ũkinye gũkũ mbere ya hĩndĩ ya heho. Nĩ wageithio nĩ Eubulu, na Pudene, Lino, Kilaudia, o hamwe na ariũ a Ithe witũ othe.

Mwathi Yahshua Messiya aroikara na roho waku. Naguo ũtugi wa Yahweh ũroikara hamwe na inyuĩ.