Timotheo wa Mbere 1
Nĩ niĩ Saũlũ mũtũmwo wa Messiya Yahshua nĩ ũndũ wa gwathwo nĩ Yahweh Mũhonokia witũ o na nĩ Messiya Yahshua ũrĩa arĩ we mwĩhoko witũ,
Ndĩrakwandĩkĩra marũa maya wee Timotheo, mũrũ wakwa kũna thĩinĩ wa wĩtĩkio: Wega, na tha, na thayũ kuuma kũrĩ Yahweh Ithe witũ o na kũrĩ Messiya Yahshua Mwathi witũ irogĩa nawe.
O ta ũrĩa ndakũringĩrĩirie ngĩthiĩ Makedonia, atĩ ũikare kũu Efeso o na rĩu ndĩrenda ũikare kuo nĩgetha ũgiragie andũ amwe kũu matigacoke kũrutana ũrutani wa maheni,
na ningĩ matigathikagĩrĩrie ngʼano cia tũhũ, kana ũhoro wa njiarwa ũrĩa ũtathiraga. Maũndũ ta macio makagĩrĩria ngarari handũ ha gũkũria wĩra wa Yahweh, ũrĩa ũrutagwo na njĩra ya wĩtĩkio.
Muoroto wa Watho ũyũ nĩ wendo, ũrĩa uumaga thĩinĩ wa ngoro ĩtarĩ ũcuke, na thamiri njega, o na wĩtĩkio ũtarĩ na ũhinga
Andũ amwe nĩ matiganĩte na ũhoro ũcio na makerekera mĩario-inĩ ya tũhũ.
Mendaga gũtuĩka arutani a Watho, o na gũtuĩka matiũĩ gĩtũmi kĩa ũhoro ũrĩa maheanaga o na kana gĩtũmi kĩa maũndũ marĩa maaragia magwatĩirie.
Nĩ tũũĩ atĩ Watho nĩ mwega mũndũ angĩũhũthĩra kũringana na ũrĩa kwagĩrĩire
O na ningĩ nĩ tũũĩ atĩ Watho ndũthondekeirwo andũ arĩa athingu no ũthondekeirwo arĩa moinaga Watho na arĩa aremi, na arĩa matetigĩrĩte Yahweh na arĩa ehia, na arĩa matarĩ aamũre na arĩa matarĩ etĩkia; o na arĩa moragaga maithe na manyina mao, na aiti a thakame,
o na nĩ ũndũ wa itharia na arĩa mogomagia mĩtugo magethahia na ũmũndũ, na anyiti andũ mĩgwate nĩguo monjorie nao, na arĩa mahenanagia, na arĩa mehĩtaga na maheni, o na ũndũ ũngĩ o wothe ũtaringaine na ũrutani ũrĩa mwagĩrĩru,
ũrĩa ũringaine na Ũhoro-ũrĩa-Mwega ũrĩ riri wa Yahweh ũrĩa mũrathime, o ũhoro ũcio ndehokeirwo ndĩũrutage.
Nĩ ngũcokeria Messiya Yahshua Mwathi witũ ngatho, ũrĩa ũheete hinya, tondũ nĩ anduire wa kwĩhokeka, na akĩnyamũra nduĩke wa kũmũtungatagĩra.
O na gũtuĩka rĩmwe ndaarĩ mũrumi Yahweh, na mũnyarirani, na mũndũ wa ngũĩ, nĩ ndaiguĩrĩirwo tha tondũ ndekaga ũguo itekũmenya na itarĩ mwĩtĩkia
Naguo wega mũingĩ wa Yahweh witũ ũkĩnjiyũrĩrĩra, hamwe na wĩtĩkio o na wendani ũrĩa uumaga thĩinĩ wa Messiya Yahshua.
Ũhoro ũyũ nĩguo wa kwĩhokeka na nĩguo wagĩrĩire gwĩtĩkĩrwo kũna: Atĩ Messiya Yahshua ookire thĩ kũhonokia ehia, na harĩ acio-rĩ, nĩ niĩ wa mbere
No nĩ ũndũ wa gĩtũmi kĩu, niĩ nĩ ndaiguĩrĩirwo tha nĩ Yahweh nĩgetha thĩinĩ wakwa, Messiya Yahshua onanie ũkirĩrĩria wake ũtarĩ mũthia, nĩguo niĩ ndaarĩ mwĩhia makĩria, nduĩke kĩonereria harĩ arĩa marĩmwĩtĩkagia na makegĩĩra na muoyo wa tene na tene
Na rĩu, kũrĩ Mũthamaki ũrĩa ũtũũraga tene na tene, ũrĩa ũtathiraga, na ũrĩa ũtonekaga-rĩ, o we Kĩhoti wiki wĩna ũũgĩ ũrĩa Wa Ma, arotĩagwo na agoocagwo tene na tene. Amein.
Wee Timotheo, mũrũ wakwa, ndĩrakũhe ũtaaro ũyũ kũringana na mohoro marĩa maarathĩtwo hĩndĩ ĩmwe ũhoro-inĩ waku, nĩgetha wamarũmĩrĩra ũhotage kũrũa mbaara wega,
na ũtũũre ũrũmĩtie wĩtĩkio, na ũrĩ na thamiri ĩtarĩ na ũcuke. Andũ angĩ nĩ mareganĩte na kũrũmĩrĩra thamiri ciao, na nĩ ũndũ ũcio magathũkia wĩtĩkio wao.
Amwe ao nĩ Humenayo, na Alekisandero, arĩa neanĩte kũrĩ Shaitani nĩgetha marutwo, matige kũruma Yahweh.