Timotheo wa Mbere 2

Ningĩ, nĩ ngũkũringĩrĩria atĩ mbere ya maũndũ mothe kũhoyagwo mahoya ma kũhoera mabata ma andũ na ma kũhoyanĩra, na ma gũthaithanĩrĩra, na ma gũcokia ngatho, nĩ ũndũ wa andũ othe:

Ningĩ mũhoyagĩre athamaki na arĩa othe mathanaga. Hoyagai nĩgetha tũtũũrage na mũtũũrĩre wa thayũ na tũhoreire tũgĩtĩaga Yahweh maũndũ-inĩ mothe na tũrĩ na wĩyamũrĩri Yahweh.

Ũndũ ũcio nĩ mwega, na nĩ ũkenagia Yahweh Mũhonokia witũ,

o we wendete andũ othe mahonokio na mamenye ũhoro-ũrĩa-wa-ma.

Nĩgũkorwo kũrĩ Yahweh o ũmwe, na mũiguithania o ũmwe wa kũiguithania Yahweh na andũ, nake nĩwe mũndũ, o we Messiya Yahshua,

ũrĩa werutire atuĩke wa gũkũũra andũ othe. Naguo ũira wa ũhoro ũcio nĩ waheanirwo ihinda rĩaguo rĩrĩa rĩagĩrĩire rĩakinya

Na ũhoro ũcio nĩguo watũmire nduĩke mũhunjia o na mũtũmwo waguo na niĩ ndĩraaria ũhoro wa ma, ndirahenania. Ndatuĩkire mũrutani wa kũrutaga andũ-a-Ndũrĩrĩ ũhoro wa gwĩtĩkia o na ũhoro wa ma.

Ngwenda atĩ arũme mahoithagie kũndũ guothe moete moko mamũre na igũrũ, matarĩ na marakara kana ngarari.

Na ningĩ ngwenda atĩ andũ-a-nja mehumbage wega na nguo itarĩ cia kwĩonania marĩ na mĩthiĩre yagĩrĩire, na marĩ na ũũgĩ wa ngoro, no ti na kũrama njuĩrĩ, kana na thahabu, kana ruru, o na kana nguo iria cia goro mũno,

no makoragwo marĩ na ciĩko njega, iria ciagĩrĩire andũ-a-nja arĩa moimbũraga atĩ nĩ ahoi Yahweh.

Mũndũ-wa-nja aagĩrĩirwo erutage maũndũ akindĩirie na agĩathĩkaga biũ.

Ndingĩĩtĩkĩria mũndũ-wa-nja arutanage kana aathage mũndũ mũrũme; no nĩ aikarage ekirĩire.

Nĩgũkorwo Adamu nĩwe wombirwo mbere, Hawa agĩcokerera.

Ningĩ Adamu tiwe wahenirio; nĩ mũndũ-wa-nja wahenirio agĩtuĩka mwĩhia

No rĩrĩ, andũ-a-nja nĩ makaahonoka nĩ ũndũ wa gũciara ciana, mangĩtũũra metĩkĩtie na marĩ atugi na andũ aamũre, o na marĩ na ũũgĩ wa ngoro.