Timotheo wa Mbere 3
Ũhoro ũyũ nĩguo wa kwĩhokeka: Atĩ mũndũ o wothe angĩĩrirĩria gũtuĩka mũrori wa maũndũ ma ũngano, mũndũ ũcio nĩ erirĩirie wĩra wa bata.
Rĩu-rĩ, mũrori wa maũndũ ma ũngano no nginya akorwo atarĩ na ũcuke, na akorwo nĩ mũthuri wa mũtumia ũmwe. No nginya akorwo arĩ mũhoreri, na ũũĩ kwĩgirĩrĩria merirĩria ma mwĩrĩ, na mũndũ mũtĩĩku, na mũndũ ũnyitaga andũ ũgeni, na ũngĩhota kũrutana maũndũ
No ndagakorwo arĩ mũrĩĩu, kana arĩ wa ngũĩ, no akorwo arĩ mũhoreri, na mũndũ ũtarĩ wa mbaara, na ũtarĩ thuti ya mbeca.
Ningĩ akorwo ahotete gwatha mũciĩ wake wega, na one atĩ ciana ciake nĩ imwathĩkagĩra na gĩtĩo kĩrĩa kĩagĩrĩire.
(Mũndũ angĩkorwo ndangĩhota gwatha mũciĩ wake mwene-rĩ, angĩhota atĩa kũmenyerera ũngano wa Yahweh?)
Ningĩ ndagakorwo arĩ mũndũ mwerũ wĩtĩkio-inĩ ndakae kũgĩa na mwĩtĩo, nake atuĩrwo cira ta ũrĩa mũcukani aatuĩrĩirwo.
Ningĩ no nginya akorwo arĩ na ngumo njega kũrĩ andũ arĩa matarĩ a thiritũ iitũ, nĩgetha ndagatuĩke wa gũconorithio kana agũe mũtego-inĩ wa mũcukani.
Nao ateithĩrĩria a ũngano, nĩ magĩrĩirwo makoragwo marĩ andũ a gũtĩĩka na ehokeku, matigatuĩke anyui a ndibei mũno, na makorwo matarĩ a gũkorokera ũtonga na njĩra ĩtagĩrĩire
No nginya marũmie ũhoro-ũrĩa-wa-ma wa wĩtĩkio ũrĩa mũrikĩru marĩ na thamiri itarĩ na mwĩcuko
Nao mambe magerio; na thutha ũcio marekwo matuĩke ateithĩrĩria a maũndũ ma ũngano maakorwo matarĩ na ũcuke.
Ũndũ ũmwe, nao atumia ao nĩ makorwo marĩ atumia a gũtĩĩka, matigakorwo marĩ andũ a gũcambania, no makorwo matarĩ arĩĩu na matuĩke a kwĩhokeka maũndũ-inĩ mothe.
Mũteithĩrĩria wa ũngano no nginya akorwo arĩ mũthuri wa mũtumia ũmwe, na no nginya akorwo ahotete gwatha ciana ciake na mũciĩ wake wega
Arĩa matungatĩte wega nĩ megĩagĩra na ngumo njega, na makomĩrĩria mũno ũhoro-inĩ wa wĩtĩkio wao ũrĩa wa gwĩtĩkia Messiya Yahshua.
O na gũkorwo ndĩ na mwĩhoko atĩ nĩ ndĩrĩũka kũrĩ we narua-rĩ, ndĩrakwandĩkĩra maũndũ maya nĩgetha,
ingĩaga gũũka narua, ũmenye ũrĩa andũ magĩrĩirwo nĩ gũikaraga marĩ thĩinĩ wa nyũmba ya Yahweh, na nĩyo ũngano wa Kĩhoti ũrĩa ũrĩ muoyo, naguo nĩguo gĩtugĩ na mũthingi mũrũmu wa kũnyitĩrĩra ũhoro-ũrĩa-wa-ma.
Na hatarĩ nganja, ũhoro wa kwĩyamũrĩra Yahweh nĩ hitho nene ma, atĩ: We oonanirio arĩ na mwĩrĩ, agĩtuwo mũthingu nĩ Roho, akĩonwo nĩ araika, na ũhoro wake ũkĩhunjio kũrĩ ndũrĩrĩ ciothe, agĩĩtĩkio nĩ andũ a gũkũ thĩ, na akĩamũkĩrwo riri-inĩ kũrĩa igũrũ.