Timotheo wa Mbere 4

Na rĩrĩ, Roho nĩ oigaga atekũhithĩrĩra atĩ matukũ ma thutha andũ amwe nĩ magatiganĩria wĩtĩkio na marũmĩrĩre maroho marĩa mahenanagia o na maũndũ marĩa marutanagwo nĩ ndaimono.

Morutani ta macio mahunjagio nĩ andũ arĩa marĩ ũhinga, arĩa maaragia maheni, na arĩa thamiri ciao ihaana ta icinĩtwo na ruoro.

Acio nĩo makaanagia andũ kũhikania na makamera megirĩrĩrie kũrĩaga irio cia mĩthemba ĩmwe, iria Yahweh oombire nĩguo ciamũkagĩrwo na ngatho nĩ arĩa metĩkĩtie na arĩa moĩ ũhoro-ũrĩa-wa-ma.

Tondũ-rĩ, kĩrĩa gĩothe Yahweh oombire nĩ kĩega, na gũtirĩ kĩndũ kĩagĩrĩirwo nĩ kũregwo angĩkorwo kĩamũkĩrĩtwo na ngatho,

tondũ nĩ kĩrĩkĩtie kwamũrwo nĩ kiugo kĩa Yahweh na mahoya.

Ũngĩruta ariũ na aarĩ a Ithe witũ maũndũ maya-rĩ, nĩ ũgũtuĩka ndungata njega ya Messiya Yahshua, ĩrĩa ĩreretwo na ciugo cia ũhoro-ũrĩa-wa-ma wa wĩtĩkio o na cia ũrutani mwega ũrĩa wee ũtũire ũrũmĩrĩire.

Reganaga na ngʼano cia tũhũ iria itarĩ cia gũtĩithia Yahweh, o na ngʼano ta iria iganagwo nĩ iheti; nĩ kaba wĩmenyerie gũikara wĩyamũrĩire Yahweh

Nĩgũkorwo gwĩka maũndũ ma gwĩkĩra mwĩrĩ hinya nĩ kũrĩ bata wakuo, no kwĩyamũrĩra Yahweh kũrĩ bata harĩ maũndũ mothe, nĩ ũndũ kũrehaga kĩĩrĩgĩrĩro muoyo-inĩ ũyũ tũrĩ o na muoyo-inĩ ũrĩa ũgoka.

Ũhoro ũyũ nĩguo wa kwĩhokeka na nĩ wagĩrĩire gwĩtĩkĩrĩka o biũ

(na ũhoro ũcio nĩguo ũtũmaga twĩrutanagĩrie na twĩnogagie), na tũkaiga mwĩhoko witũ harĩ Kĩhoti ũrĩa ũrĩ muoyo, ũrĩa arĩ we Mũhonokia wa andũ othe, na makĩria arĩa metĩkĩtie.

Athanaga atĩ maũndũ macio mekagwo.

Ndũkanareke mũndũ o na ũrĩkũ akũire tondũ atĩ wĩ mũndũ mwĩthĩ, no tuĩka kĩonereria kũrĩ andũ arĩa metĩkĩtie rĩrĩa ũkwaria, na ha ũhoro wa mũtũũrĩre, na wa wendani, o na ha wĩtĩkio, na ha ũhoro wa mĩtugo mĩamũre.

Wĩheane gũthomagĩra andũ Maandĩko marĩa Maamũre, na kũhunjia, na kũrutana, o nginya rĩrĩa ngoka.

Ndũkanaage kũhũthĩra kĩheo gĩaku kĩrĩa waheirwo na ũndũ wa mohoro marĩa maarathirwo, rĩrĩa athuri maakũigĩrĩire moko.

Ĩkagĩra kĩyo harĩ maũndũ macio; wĩheane kũna kũrĩ mo, nĩgetha andũ othe monage ũrĩa ũrathiĩ na mbere

Menyagĩrĩra wega mũtũũrĩre waku na ũrutani waku. Kiragĩrĩria thĩinĩ wa maũndũ macio, tondũ weka ũguo, nĩ ũkwĩhonokia wee mwene na ũhonokie o na arĩa magũthikagĩrĩria.