Timotheo wa Mbere 5
Ndũkanakũũme mũndũ mũkũrũ, kaba ũmũthaithage ta arĩ thoguo, nao andũ arĩa ethĩ ta marĩ ariũ a thoguo,
Andũ-a-nja arĩa akũrũ, ũmatuage ta marĩ aa maitũguo, nao arĩa anini matuage ta aarĩ a nyũkwa, na wĩkage ũguo na mĩthiĩre yothe ya wĩyamũrĩri Yahweh.
Rũmbũyagia atumia arĩa a ndigwa kũna, na ũmatĩage.
No mũtumia wa ndigwa angĩkorwo arĩ na ciana, kana ciana cia ciana ciake-rĩ, ciana icio nĩ ciambe ciĩrute kũrutithia wĩtĩkio wacio wĩra na ũndũ wa kũmenyagĩrĩra andũ arĩa marĩ a nyũmba ciao kĩũmbe; tondũ gwĩka ũguo nĩ gũcokeria aciari a cio na aciari a aciari a cio ngatho nĩgũkorwo ũndũ ũcio nĩ ũkenagia Yahweh.
Mũtumia wa ndigwa ũrĩa ũbataire kũna, na ũtigĩtwo arĩ wiki-rĩ, ũcio aigaga mwĩhoko wake harĩ Yahweh, na akahoyaga ũtukũ na mũthenya, akĩũria Yahweh ũteithio ategũtigithĩria
No mũtumia wa ndigwa ũrĩa ũikaraga agĩĩkenagia na maũndũ ma thĩ-rĩ, ũcio nĩ mũkuũ o na arĩ muoyo.
Rutaga andũ maũndũ macio o namo, nĩgetha gũtikagĩe mũndũ ũgũikara arĩ na ũcuke
Mũndũ wothe angĩaga gũteithia andũ ao, na makĩria arĩa marĩ a gwake mũciĩ-rĩ, mũndũ ũcio nĩ akaanĩte wĩtĩkio na nĩ mũũru gũkĩra ũrĩa ũtetĩkĩtie.
Gũtirĩ mũtumia wa ndigwa wagĩrĩire kwandĩkwo mũtaratara-inĩ wa atumia a ndigwa atakinyĩtie mĩaka mĩrongo ĩtandatũ, na akorwo aarĩ wa mũthuri ũmwe,
na akorwo nĩ oĩkaine wega nĩ ũndũ wa gwĩkaga ciĩko njega, ta kũrera ciana, na gũtugaga ageni, na gũthambia nyarĩrĩ cia andũ arĩa aamũre, na gũteithagia andũ arĩa marĩ thĩna-inĩ, na kwĩrutagĩra we mwene gwĩkaga maũndũ marĩa mothe mega.
Ha ũhoro wa atumia a ndigwa arĩa ethĩ-rĩ, ndũkamekĩre mũtaratara-inĩ ta ũcio, tondũ no matigane na Messiya makahike
Nĩ ũndũ wa ũguo magatuĩka a gũtuĩrwo cira, tondũ nĩ mathũkĩtie kĩĩranĩro kĩao kĩa mbere.
Ningĩ nĩ memenyagĩria ũgũta, magatuĩka a kũũrũra kuuma nyũmba ĩmwe nginya ĩrĩa ĩngĩ. Na to ũgũta wiki, o na nĩ matuĩkaga a kwaria ndeto cia mũhuhu na magetonyereria maũndũ-inĩ ma andũ angĩ, makaaragia maũndũ marĩa mataagĩrĩirwo nĩ kwaria.
Nĩ ũndũ ũcio-rĩ, niĩ ngũtaara atumia a ndigwa arĩa ethĩ mahike, na magĩe ciana, na marũgamagĩrĩre mĩciĩ yao, nĩguo matikae kũhe thũ iitũ mweke wa gũcambania.
Ti-itherũ o na rĩu amwe ao nĩ marĩkĩtie kũgarũrũka na makarũmĩrĩra Shaitani.
Mũndũ-wa-nja o wothe mwĩtĩkia angĩkorwo arĩ na atumia a ndigwa a nyũmba yake-rĩ, nĩ amateithagie arĩ we na ndagakuuithie ũngano mũrigo wao, nĩgetha ũngano ũhote gũteithia atumia arĩa a ndigwa kũna, arĩa mabataire.
Athuri a ũngano arĩa matongoragia maũndũ ma ũngano wega nĩ magĩrĩirwo nĩ kũheo gĩtĩo mũno, na makĩria arĩa marutaga wĩra wa kũhunjia na kũrutana.
Nĩgũkorwo Maandĩko marĩa Maamũre moigĩte atĩrĩ, “Ndũkanohe ndegwa kanua rĩrĩa ĩkũranga ngano ĩkĩmĩhũra,” na ningĩ nĩ moigĩte atĩrĩ, “Mũruti wĩra nĩ agĩrĩirwo nĩ kũheo mũcara wake.”
Ndũkanetĩkĩrie mũthuri wa ũngano athitangwo, tiga hakorirwo na ũira wa andũ erĩ kana atatũ.
Andũ arĩa maikaraga makĩĩhagia-rĩ, makaanagie mbere ya andũ othe, nĩguo arĩa angĩ maikarage metigĩrĩte.
Ndakwĩra atĩrĩ na ma ndĩ mbere ya Yahweh, na Messiya Yahshua o na araika arĩa athure, ũmenyagĩrĩre morutani maya ũtegũthutũkania, na ndũkaneke ũndũ o na ũmwe na kĩmenyano.
Ndũkahiũhage kũigĩrĩra mũndũ moko, na ndũkanagwatanĩre na mehia ma andũ arĩa angĩ. Ikaraga ũtarĩ na ũcuke.
Tiga kũnyuaga o maĩ matheri, nyuaga maciaro manini ma mĩthabibũ mahihwo o ũguo tondũ wa nda yaku, na nĩ ũndũ wa ũrĩa ũrũaraga kaingĩ.
Mehia ma andũ amwe nĩ meyonanĩtie, makamatongoragia cira-inĩ no mehia ma andũ angĩ mamoimaga thutha.
O ũndũ ũmwe, noguo ciĩko njega ciĩyonanagia, nacio iria itarĩ njega itingĩhithĩka.