Timotheo wa Mbere 6

Andũ arĩa marĩ rungu rwa icoki rĩa ũkombo nĩ mathiĩ na mbere kuonaga athani ao magĩrĩire kũheo gĩtĩo gĩothe, nĩgetha rĩĩtwa rĩa Yahweh o hamwe na ũrutani itikanacambio.

Ningĩ-rĩ, arĩa mathagwo nĩ andũ metĩkĩtie matikanamaagĩre gĩtĩo atĩ tondũ nĩ ariũ a Ithe witũ. Ithenya rĩa ũguo, magĩrĩirũo gũtungataga meyendeire o na makĩria, nĩ gũkorũo arĩa magunĩkaga nĩ ũtungata wao mwega nĩ etĩkia na nĩ mendetwo.

Mũndũ o wothe angĩrutana ũrutani ũngĩ ũtaratwarana na ũrutani ũrĩa wagĩrĩire, ũrĩa uumĩte kũrĩ Mwathi witũ Yahshua Messiya, o na kana ũrutani ũrĩa ũratwarana na wĩrutĩri Yahweh-rĩ,

nĩ mwĩtĩo arĩ naguo na ndarataũkĩrũo nĩ ũndũ o na ũrĩkũ. Aiyũrĩtwo nĩ ngarari na ngucanio ciĩgiĩ ciugo. Maũndũ macio marehaga ũiru, ngũĩ, njambanio, gwĩkũũanĩra ũũru,

ngucanio hĩngĩcanu itarathira cia andũ arĩa mathũkĩtio meciria na matarĩ na ũhoro ũrĩa wa ma, magĩĩciragia atĩ wĩrutĩri Yahweh nĩ njĩra ya kwĩguna

Nĩ ma, kwĩrutĩra harĩ Yahweh o hamwe na kũiganĩra nĩ kũrĩ ũguni mũnene

Nĩ gũkorũo gũtirĩ kĩndũ twarehire thĩinĩ wa thĩ, na gũtirĩ kĩndũ tũngiuma nakĩo kuo.

Nĩ ũndũ ũcio, tũngĩkorũo na irio na nguo-rĩ, nĩ tũrĩiganagĩra na indo icio.

No arĩa makoragwo matuĩte itua rĩa gũtonga magũaga magerio-inĩ na mũtego-inĩ na merirĩria-inĩ maingĩ ma ũrimũ na moru marĩa matũmaga andũ manangwo na maninwo

Nĩ gũkorũo kwenda mbeca nĩ kĩhumo kĩa maũndũ moru ma mĩthemba yothe, na andũ amwe nĩ ũndũ wa gũthingata wendo ũcio nĩ mahĩtithĩtio makehera thĩinĩ wa wĩtĩkio na magetheca ngoro na kĩeha kĩingĩ.

No rĩrĩ, wee mũndũ ũyũ wa Yahweh, ũragĩra maũndũ macio. Ĩndĩ thingataga ũthingu, wĩrutĩri Yahweh, wĩtĩkio, wendani, ũkirĩrĩria, na ũhoreri

Rũaga mbaara ĩrĩa njega ya wĩtĩkio; rũmia biũ muoyo wa tene na tene ũrĩa wetĩirũo na ũkiumbũra na njĩra njega ũhoro waguo mbere ya aira aingĩ.

Ndagwatha mbere ya Kĩhoti ũrĩa ũtũũragia indo ciothe muoyo, na mbere ya Messiya Yahshua, o ũcio woimbũrire na njĩra njega arĩ mũira mbere ya Pontio Pilato

atĩ ũrũmagĩrĩre Rĩathani rĩu na njĩra ĩtarĩ kameni na ĩtarĩ na ũcuke o nginya hĩndĩ ya kũguũrio kwa Mwathi witũ Yahshua Messiya,

ũndũ ũrĩa akoonania hĩndĩ yake njagĩrĩru yakinya, atĩ ũcio nĩ mũrathime, ũrĩa wiki Mũtongoria ũrĩ Hinya na ũrĩ gĩkeno mahinda marĩa matuĩtwo maakinya. Ũcio nĩwe Mũthamaki wa arĩa mathanaga marĩ athamaki na Mwathi wa arĩa mathanaga marĩ athani,

ũrĩa wiki ũtangĩkua, o we ũtũũraga ũtheri-inĩ ũtangĩkinyĩrĩka, na gũtirĩ mũndũ ũrĩ wamuona kana ũngĩmuona. Ũcio arogĩa na gĩtĩo na ũhoti tene na tene. Amein.

Taara arĩa atongu thĩinĩ wa mũtabarĩre ũyũ wa maũndũ matigakorũo na mwĩtĩo, na matikaigage kĩĩrĩgĩrĩro kĩao harĩ ũtonga ũrĩa ũtamenyagĩrũo, ĩndĩ maigage kĩĩrĩgĩrĩro kĩao harĩ Yahweh, ũrĩa ũtũheaga na ũtana indo ciothe iria tũkenagĩra

Meere mekage maũndũ mega, makĩragĩrĩrie harĩ ciĩko njega, matuĩke atana, mehaarĩirie kũgayagĩra andũ arĩa angĩ indo ciao,

makĩĩigagĩra mũthithũ wa mũthingi mwega wa mahinda marĩa maroka, nĩgetha marũmie biũ muoyo ũrĩa wa ma.

Wee Timotheo, gitagĩra kĩrĩa wĩhokeirũo, ũgethemaga mĩario ya tũhũ ĩrĩa ĩthahagia maũndũ Maamũre o na ngarari cia ũmenyo hatarĩ wa ũmũndũ

Nĩ ũndũ wa kwĩyonania na ũmenyo ta ũcio, andũ amwe nĩ meherete wĩtĩkio-inĩ. Ũtugi mũnene wa Yahweh ũroikara hamwe na inyuĩ.