Tito 1

Nĩ niĩ Saũlũ, ndungata ya Yahweh na mũtũmwo wa Yahshua Messiya. Ndũmĩtwo nĩguo andũ arĩa athure nĩ Yahweh mongererwo wĩtĩkio na ũmenyo wa kũmenya ũhoro-ũrĩa-wa-ma ũrĩa ũkaga thutha wa kwĩyamũrĩra Yahweh,

na nĩguo wĩtĩkio na ũmenyo iria irĩ na kĩĩrĩgĩrĩro kĩa muoyo wa tene na tene, iria Kĩhoti ũrĩa ũtahenanagia eeranĩire o kuuma kĩambĩrĩria.

Narĩo ihinda rĩake rĩrĩa rĩagĩrĩire rĩakinya, nĩ aguũranĩirie kiugo gĩake kĩrĩa ndehokeirwo ndĩkĩhunjagie kũringana na ũrĩa njathĩtwo nĩ Yahweh Mũhonokia witũ,

Ndĩrakwandĩkĩra marũa maya wee Tito, o wee mũriũ wakwa kũna thĩinĩ wa wĩtĩkio ũrĩa tũgwatanĩire nawe: Wega na thayũ kuuma kũrĩ Yahweh Ithe na kũrĩ Messiya Yahshua Mũhonokia witũ, irogĩa nawe.

Atĩrĩrĩ Tito, gĩtũmi kĩrĩa gĩatũmire ngũtige kũu Kirete nĩ atĩ ũthondeke maũndũ marĩa mataarĩkĩte na ũthure athuri thĩinĩ wa o itũũra, o ta ũrĩa ndakwĩrire.

Mũthuri wa ũngano aagĩrĩirwo akorwo atarĩ na ũcuke, na akorwo arĩ mũthuri wa mũtumia o ũmwe tu, na arĩ mũndũ ũrĩ na ciana ciĩtĩkĩtie na itarĩ kaũndũ ingĩcukĩrwo nĩ ũndũ wa ũmaramari kana kwaga gwathĩka.

Kuona atĩ mũrori wa maũndũ ma ũngano nĩ mwĩhokere wĩra wa Yahweh, no nginya akorwo atarĩ na ũcuke, na ndagakorwo arĩ mũndũ wa kwĩĩgũmĩra, kana wa kũhiũha kũrakara, kana arĩ mũnyui wa njohi, kana wa kũhũthĩra hinya o na mbaara, kana mũndũ wa gũkorokera indo na njĩra ĩrĩa ĩtagĩrĩire.

Nĩ kaba akorwo arĩ mũndũ ũũĩ gũtugana, na wendete maũndũ marĩa mega, na ũhotete kwĩgirĩrĩria merirĩria ma mwĩrĩ, na arĩ mũrũngĩrĩru ngoro, na arĩ mũthingu, o na mũndũ ũmenyagĩrĩra mĩtugo yake.

Ningĩ no nginya arũmagie ũhoro ũrĩa wa kwĩhokeka, o ta ũrĩa ũrutanĩtwo, nĩguo ahotage kũũmĩrĩria arĩa angĩ na ũrutani ũrĩa mwagĩrĩru, na ahotage kũregana na arĩa maũkararagia.

Nĩgũkorwo nĩ kũrĩ andũ aingĩ aremi, andũ a mĩario ya tũhũ na ahenania, na makĩria arĩa a thiritũ ya arĩa maruaga.

Andũ acio no nginya makirio, tondũ nĩ marathũkia mĩciĩ mĩingĩ nĩ kũrutanaga maũndũ marĩa mataagĩrĩire kũrutana, na mekaga ũguo nĩgetha monage mbeca iria itamagĩrĩire.

O na mũnabii ũmwe wao nĩ oigĩte atĩrĩ, “Andũ a Kirete matũũraga mahenanagia hĩndĩ ciothe, na mahaana ta nyamũ njũru, na nĩ igũta ngoroku.”

Ũira ũcio nĩ wa ma. Nĩ ũndũ ũcio-rĩ, makaanagie ũgwatĩirie, nĩgetha mehande wega ũhoro-inĩ wa gwĩtĩkia,

na nĩguo matikarũmbũyagie ngʼano cia Ayahudi kana mawatho ma andũ arĩa mareganaga na ũhoro-ũrĩa-wa-ma

Kũrĩ andũ arĩa marĩ meciria matheru, maũndũ mothe nĩ matheru, no kũrĩ andũ arĩa marĩ na meciria mathũku na matetĩkĩtie-rĩ, gũtirĩ ũndũ mũtheru. Ti-itherũ, meciria mao na thamiri ciao nĩ thũku.

Kuuga nĩ moigaga atĩ nĩ moĩ Yahweh, no nĩ mamũkaanaga na ciĩko ciao. Nĩ andũ imaramari, na matiathĩkaga, na gũtirĩ ũndũ o na ũmwe mwega mangĩĩka.