Tito 2
No wee-rĩ, no nginya ũrutanage maũndũ marĩa maringaine na ũrutani ũrĩa mwagĩrĩru.
Rutaga athuri arĩa akũrũ maikarage matarĩ arĩĩu, na marĩ a gũtĩĩka, na a kwĩgirĩrĩria merirĩria ma mwĩrĩ, na marĩ arũmu ũhoro-inĩ wa gwĩtĩkia, na makoragwo marĩ na wendani o na ũkirĩrĩria.
O nao atumia arĩa akũrũ marutage gũikaraga na mĩikarĩre ya kwĩyamũrĩra Yahweh, na matigatuĩke a gũcambania o na kana mamenyere kũnyuaga ndibei nyingĩ matuĩke ta ngombo ciayo, no nĩ matuĩke a kũrutanaga maũndũ marĩa mega,
nĩgetha mahote kũruta atumia arĩa ethĩ kwenda athuri ao na ciana ciao,
na matuĩke a kwĩgirĩrĩria merirĩria ma mwĩrĩ, na aamũre, na amenyereri a mĩciĩ yao, na matuĩke atugi, na maathĩkagĩre athuri ao, nĩgetha gũtikanagĩe mũndũ ũngĩcambia kiugo kĩa Yahweh.
O ta ũguo-rĩ, ũmagĩrĩria aanake, na ũmataarage matuĩke a kwĩgirĩrĩria merirĩria ma mwĩrĩ.
Maũndũ-inĩ mothe, tuĩka kĩonereria gĩa gwĩkaga wega maũndũ-inĩ mothe. Rĩrĩa ũkũrutana onanagia ũrũngĩrĩru, na ũtarĩ na itherũ,
o na waragie ciugo iria ciagĩrĩire, itangĩrutĩka mahĩtia, nĩgetha arĩa matũkararagia maconorithio tondũ wa kwaga ũndũ mũũru mangĩaria igũrũ riitũ.
Taaraga ngombo atĩ ciathĩkagĩre aathani a cio maũndũ-inĩ mothe, na igeragie kũmakenia, no itigacokanagĩrie nao,
na itikamaiyage indo ciao, no cionanagie atĩ no ciĩhokwo kũna, nĩguo itũmage ũrutani wa ũhoro wa Yahweh Mũhonokia witũ wendekage maũndũ-inĩ mothe.
Nĩ ũndũ wega wa Yahweh ũrĩa ũrehaga ũhonokio nĩ ũguũranĩirio kũrĩ andũ othe.
Wega ũcio wa Yahweh nĩguo ũtũrutaga kũregana na maũndũ marĩa matarĩ ma kwĩyamũrĩra Yahweh, na merirĩria moru ma gũkũ thĩ, na ũgatũruta gũtũũra twĩgirĩrĩirie merirĩria ma mwĩrĩ, na gũtũũra twiĩguĩte na tũrĩ athingu o hamwe na kwĩyamũrĩra Yahweh mahinda-inĩ maya tũrĩ,
o tũgĩetagĩrĩra kĩĩrĩgĩrĩro kĩrĩa kĩrĩ na kĩrathimo, hĩndĩ ĩrĩa gũkaaguũranĩrio riri wa Yahshua Messiya, ũrĩa arĩ Kĩhoti witũ mũnene na Mũhonokia.
Nake nĩwe werutire nĩ ũndũ witũ, nĩguo atũkũũre waganu-inĩ wothe, na amũre andũ matuĩke ake kĩũmbe, arĩa marĩ na kĩyo gĩa gwĩkaga maũndũ mega.
Rĩu-rĩ, maũndũ macio nĩmo wagĩrĩirwo nĩ kũrutanaga. Ũmanagĩrĩria na ũkaananagie wĩ na wathani wothe. Ndũkanareke mũndũ o na ũrĩkũ akũire.