Zakariya 11
“Hingũra mĩrango yaku, wee Lebanoni, Nĩgetha mwaki ũcine mĩtarakwa yaku.
Cakaya wee mũthengera, tondũ mũtarakwa nĩ ũgũĩte; Mĩtĩ ĩrĩa mĩnene nĩ yanangĩtwo! Cakayai, inyuĩ mĩgandi ya Bashani, Nĩ gũkorũo mũtitũ ũrĩa mũtumanu nĩ mwanangĩku!
Thikĩrĩriai! Gũcakaya kwa arĩithi, Tondũ riri wao nĩ wanangĩtwo. Thikĩrĩriai! Mũraramo wa ngatia, Nĩ gũkorũo ihinga iria ndumanu rũteere-inĩ rwa Jorodani nĩ cianangĩtwo.
“Ũũ nĩguo Yahweh Kĩhoti wakwa ekuuga, ‘Rĩithia rũũru rwa ngʼondu rũrĩa rũrongoreirio gũthĩnjwo,
o icio ithĩnjagwo nĩ agũri a cio na makaga kuonwo mahĩtĩtie. Na arĩa maciendagia moigaga atĩrĩ, “Yahweh arorathimwo, tondũ nĩ ngũtonga.” Na arĩithi a cio maticicayagĩra.’
“‘Nĩ gũkorũo ndigaacaĩra aikari a bũrũri rĩngĩ,’ ũguo nĩguo Yahweh ekuuga. ‘Kwoguo nĩ ngaatũma o mũndũ agũe guoko-inĩ kwa mũndũ ũrĩa ũngĩ na kwa mũthamaki wake; na nĩ makaahehenja bũrũri, na ndikaamahonokia kuuma guoko-inĩ kwao.’”
Na niĩ ngĩambĩrĩria kũrĩithia rũũru rũu rwarongoreirio gũthĩnjwo, nĩ ũndũ wanyu, inyuĩ mũranyamarĩka gatagatĩ-inĩ ka rũũru. Nĩ ũndũ ũcio ngĩoya thanju igĩrĩ, rũmwe ngĩrwĩta Ũtugi, na rũu rũngĩ ngĩrwĩta Ũrũmwe, na ngĩambĩrĩria kũrĩithia rũũru rũu
Na ngĩingata arĩithi atatũ ihinda-inĩ rĩa mweri ũmwe, nĩ gũkorũo nĩ ndarakaririo nĩo, na makĩmena o nao
Na niĩ ngiuga ũũ: “Ndigũthiĩ na mbere kũmũrĩithia. Wa gũkua nĩ akue, na wa gũthira athire. Nao arĩa megũtigara, o mũndũ atambure nyama cia ũrĩa ũngĩ.”
Kwoguo ngĩoya rũthanju rũu rwakwa rwetagwo Ũtugi ngĩrũtinania, ngĩgĩthũkia kĩrĩkanĩro gĩakwa kĩrĩa ndarĩkanĩire na ikundi ciothe cia andũ
Nakĩo gĩgĩthũka mũthenya ũcio, na andũ arĩa maanyamarĩkaga gatagatĩ-inĩ ka rũũru arĩa manjĩĩroragĩra makĩmenya atĩ kĩu kĩarĩ kiugo kĩa Yahweh.
Ngĩcoka ngĩmeera atĩrĩ: “Angĩkorũo nĩ mũkuona arĩ wega, hei mũcara wakwa; no angĩkorũo ti ũguo, ikarai naguo.” Nao makĩndĩha mũcara wakwa, icunjĩ 30 cia betha.
Nake Yahweh akĩnjĩra atĩrĩ: “Ciikie kĩgĩna-inĩ—thogora ũcio mwega moonire ũnjiganĩte.” Nĩ ũndũ ũcio ngĩoya icunjĩ icio 30 cia betha na ngĩciikia kĩgĩna-inĩ thĩinĩ wa nyũmba ya Yahweh.
Ngĩcoka ngĩtinania rũthanju rwakwa rwa kerĩ, rũu rwetagwo Ũrũmwe, ngĩgĩthũkia ũiguano gatagatĩ-inĩ ka Yahuda na Isiraeli.
Nake Yahweh akĩnjĩra ũũ: “Rĩu oya indo cia mũrĩithi ũtarĩ kĩene
Nĩ gũkorũo nĩ ngũtũma mũrĩithi arahũke thĩinĩ wa bũrũri. Nake ndakaarũmbũiya ngʼondu iria irathira; na ndagaacaria tũũri kana ahonie iria igurarĩtio o na kana ahe iria irahota kũrũgama irio. Handũ ha ũguo, agaatamburaga nyama cia ĩrĩa noru na agakũũra mahũngũ ma ngʼondu.
Kaĩ mũrĩithi wakwa ũtarĩ kĩene o ũcio ũtiganagĩria rũũru arĩ na haaro-ĩ! Rũhiũ rwa njora nĩ rũgaatharĩkĩra guoko gwake na riitho rĩake rĩa ũrĩo. Guoko gwake nĩ gũkonja biũ, Na riitho rĩake rĩa ũrĩo nĩ rĩgaatumumara biũ.”