Zakariya 12

Ĩno nĩ ndũmĩrĩri nditũ: “Gĩkĩ nĩkĩo kiugo kĩa Yahweh gĩkoniĩ Isiraeli,” ũguo nĩguo Yahweh ekuuga, O we watambũrũkirie igũrũ, Na akĩiga mũthingi wa thĩ, Na nowe wathondekire roho wa mũndũ thĩinĩ wake.

“Nĩ ngũtũma Yahrushalayim ĩtuĩke gĩkombe gĩa gũtũma ikundi ciothe cia andũ iria irigicĩirie itũgũge; na Yahuda nĩ ĩkaarigicĩrio o hamwe na Yahrushalayim

Mũthenya ũcio nĩ ngaatũma Yahrushalayim ĩtuĩke ihiga iritũ harĩ ikundi ciothe cia andũ. Na andũ arĩa othe makaarĩoya na igũrũ hatarĩ nganja nĩ makaagurario mũno; na ndũrĩrĩ ciothe cia thĩ nĩ igaacokanĩrĩra imĩũkĩrĩre.”

Yahweh ekuuga atĩrĩ, “Mũthenya ũcio, nĩ ngaatũma mbarathi o yothe ĩnyitwo nĩ guoya na ũrĩa ũramĩtwarithia agũrũke. Maitho makwa magaaikara marorete nyũmba ya Yahuda, no nĩ ngaatumumaria mbarathi ciothe cia ikundi cia andũ

Nao anene a Yahuda nĩ makoiga ũũ ngoro-inĩ yao, ‘Aikari a Yahrushalayim nĩo hinya witũ kũgerera harĩ Yahweh mũnene wa ita, o we Kĩhoti wao.’

Mũthenya ũcio nĩ ngaatũma anene a Yahuda mahaane ta nyũngũ ĩrĩ na mwaki ĩrĩ gatagatĩ-inĩ ka ngũ na mahaane ta gĩcinga kĩa mwaki kĩrĩ kĩohe-inĩ kĩa ngano ĩrĩa ĩtinĩtio, na nĩ magaacina ikundi ciothe cia andũ iria irigicĩirie mwena wa ũrĩo na wa ũmotho; na aikari a Yahrushalayim nĩ magaatũũra rĩngĩ handũ hao, thĩinĩ wa Yahrushalayim.

“Na Yahweh akaamba kũhonokia hema cia Yahuda, nĩguo ũthaka wa nyũmba ya Daudi na ũthaka wa aikari a Yahrushalayim wage gũkorũo ũrĩ mũnene mũno gũkĩra wa Yahuda

Mũthenya ũcio Yahweh agaakorũo arĩ ũgitĩri gũthiũrũrũkĩria aikari a Yahrushalayim; mũthenya ũcio, mũndũ ũrĩa ũkaahĩngwo gatagatĩ-inĩ kao akaahaana o ta Daudi, nayo nyũmba ya Daudi ĩhaane o ta Kĩhoti, ta mũraika wa Yahweh ũrĩa ũthiaga arĩ mbere yao

Na mũthenya ũcio hatarĩ nganja nĩ ngaaniina ndũrĩrĩ ciothe iria igookĩrĩra Yahrushalayim.

“Nĩ ngaaitĩrĩria nyũmba ya Daudi na aikari a Yahrushalayim roho wa gwĩtĩkĩrĩka na gũthaithana, na nĩ makeerorera mũndũ ũrĩa maathecire, na nĩ makaamũrĩrĩra ta ũrĩa mangĩrĩrĩra mũrũ wa mũmwe; na nĩ makaamũcakaĩra marĩ na ruo rũingĩ ta ũrĩa mangĩcakaĩra mũrũ wa irigithathi

Mũthenya ũcio, kĩrĩro kĩrĩa gĩgaakorũo Yahrushalayim gĩgaakorũo kĩrĩ kĩnene, o ta kĩrĩro kĩa Hadadirimoni Werũ-inĩ wa Megido

Na bũrũri ũcio nĩ ũkaagĩa na kĩrĩro, o mbarĩ ĩrĩ iki; mbarĩ ya nyũmba ya Daudi ĩrĩ iki, na andũ-a-nja ao marĩ oiki; mbarĩ ya nyũmba ya Nathani ĩrĩ iki, na andũ-a-nja ao marĩ oiki;

Mbarĩ ya nyũmba ya Lawii ĩrĩ iki, na andũ-a-nja ao marĩ oiki; mbarĩ ya Ashimei ĩrĩ iki, na andũ-a-nja ao marĩ oiki;

na mbarĩ ciothe iria itigarĩte, o nyũmba ĩrĩ iki, na andũ-a-nja ao marĩ oiki.