Zakariya 6

Ningĩ ngĩtiira maitho o rĩngĩ ngĩona ngaari inya cia mbarathi igĩũka ciumĩte gatagatĩ ka irĩma igĩrĩ, na irĩma icio ciarĩ cia gĩcango

Ngaari ya mbere yarĩ na mbarathi cia rangi mũtune, na ngaari ya kerĩ yarĩ na mbarathi cia rangi mũirũ

Ngaari ya gatatũ yarĩ na mbarathi cia rangi mwerũ, na ngaari ya kana yarĩ na mbarathi irĩ na marooro na cia marangi matiganĩte.

Ngĩũria mũraika ũcio waaragia na niĩ atĩrĩ: “Mwathi wakwa, ici nĩ ndũĩ?”

Mũraika ũcio akĩnjokeria akĩnjĩra ũũ: “Nĩ maroho marĩa mana ma igũrũ marĩa maroimagara thutha wa kũrũgama mbere ya Mwathi wa thĩ yothe

Ĩrĩa ĩrĩ na mbarathi cia rangi mũirũ ĩrathiĩ bũrũri wa mwena wa rũgongo; nacio cia rangi mwerũ irathiĩ gĩcigo kĩrĩa kĩrĩ mbere ya iria; nacio iria irĩ na marooro irathiĩ bũrũri wa mwena wa mũhuro

Nacio iria ciarĩ na marangi matiganĩte nĩ cieriragĩria mũno gũthiĩ kũndũ na kũndũ thĩinĩ wa thĩ.” Nake agĩciĩra: “Umagarai mũthiĩ kũndũ na kũndũ thĩinĩ wa thĩ.” Nacio ikĩambĩrĩria gũthiĩ kũndũ na kũndũ thĩinĩ wa thĩ.

Agĩcoka akĩanĩrĩra akĩnjĩra atĩrĩ: “Ta rora, iria irathiĩ bũrũri wa mwena wa rũgongo nĩ itũmĩte roho wa Yahweh ũgĩe na ũhurũko bũrũri-inĩ wa mwena wa rũgongo.”

Kiugo kĩa Yahweh gĩkĩnginyĩra o rĩngĩ ngĩrũo atĩrĩ:

“Amũkĩra kuuma kũrĩ Helidai, Tobija, na Jedaia kĩrĩa marehete kuuma kũrĩ andũ arĩa marĩ ithamĩrio; na mũthenya ũcio, no mũhaka ũgaathiĩ nyũmba-inĩ ya Josia mũrũ wa Zefaniya hamwe na acio mokĩte kuuma Babuloni

Wagĩrĩirũo kuoya betha na thahabu ũthondeke thũmbĩ na ũmĩigĩrĩre mũtwe wa Joshua mũrũ wa Jehozadaku, mũthĩnjĩri-Yahweh ũrĩa mũnene

Na ũmwĩre atĩrĩ,

Nĩwe ũgaaka hekarũ ya Yahweh, na nĩwe ũkaagĩa na riri. Nĩ agaaikarĩra gĩtĩ gĩake kĩa ũnene na aathanage, na ningĩ agaakorũo arĩ mũthĩnjĩri-Yahweh gĩtĩ-inĩ gĩake kĩa ũnene, na nĩ gũgaakorũo na ũiguano wa thayũ gatagatĩ ka mawĩra macio merĩ

Na thũmbĩ ĩyo ĩgaakorũo ĩrĩ kĩririkano harĩ Helemu, Tobija, Jedaia, na Heni mũrũ wa Zefaniya, thĩinĩ wa hekarũ ya Yahweh

Nao andũ arĩa marĩ kũraihu nĩ magooka na manyitanĩre harĩ gwaka hekarũ ya Yahweh.” Na nĩ mũkaamenya atĩ Yahweh mũnene wa ita nĩwe ũndũmĩte kũrĩ inyuĩ. Na ũndũ ũcio nĩ ũgeekĩka—angĩkorũo nĩ mũgũthikĩrĩria mũgambo wa Yahweh Kĩhoti wanyu.’”